Read Jinghpaw Common Language Bible 2009 2 HKAWHKAM LABAU 22 Bible Online

2 HKAWHKAM LABAU 22 - Jinghpaw Common Language Bible 2009 bible

2 HKAWHKAM LABAU 22

¹Arab masha nkau mi gaw dap shang hpya nna Hkawhkam Yehoram a kasha hpungdim Ahazia hta kaga, ngam ai ni yawng hpe sat kau ma ai. Dai rai nna Yerusalem mare masha ni gaw shi kawa a hkang hta Ahazia hpe hkawhkam shatai da nga ma ai.

²Ahazia gaw asak hkun lahkawng ning hta hkawhkam tai wa nhtawm Yerusalem mare hta laning mi up nga ai. Shi a kanu Ahab a shayi sha Israela Hkawhkam Omri a kashu shayi sha Ahtalia gaw n hkru ai de lam woi shadam na matu shi hpe hpaji jaw ai majaw Hkawhkam Ahab a dinghku masha ni a kasi hta hkan nang wu ai.

⁴Shi a kawa si mat ai hpang Hkawhkam Ahab a dinghku masha ni shi a hpaji jaw masha ni tai wa nna, shanhte gaw shi hpe hkrat sum mat hkra lam woi shadam kau ma ai majaw dai MADU hpe shi shut kau nga wu ai.

⁵Shanhte a hpaji jaw ai ga hta hkan nang ai rai nna Suri Hkawhkam Hazaela hpe majan sa gasat na matu, Israela Hkawhkam Yoram hte matut mahkai wu ai. Shing rai luksuk ni Gilead mung Ramot mare hta gasat hkat ma yang Yoram hkala hkrum mat nga ai.

⁶Shi a ningma shamai la na nga, Yezrela mare de shi bai nhtang mat wa wu ai rai nna Ahazia mung shi hpe sa gawan yu na nga dai mare de sa mat wa wu ai.

⁷Karai Kasang gaw Ahazia hpe hkrat sum shangun na matu ndai zawn Yoram hpang de sa hpu yu shangun nga ai. Dai yang e Ahazia nga nga yang shi hte Yoram gaw Ahab hkawhkam amyu matu hpe jahten sharun kau na matu dai MADU e lata san da sai Nimshi a kasha Yehu mying ai wa hte man hkrum rai hkrum katut wu ai.

⁸Yehu gaw hkawhkam amyu matu ni hpe Karai Kasang daw dan jeyang ai hpe galaw shatup wu yang, Ahazia kaw hkan gumbawm nang ai Yuda ningbaw ni hte Ahazia a kahkri ni hte hkrum wu ai. Yehu gaw dai ni yawng hpe sat kau wu ai.

⁹Ahazia hpe hkan tam ma yang, shi gaw Samari mare e sa makoi nga ai hpe sa mu ma ai. Yehu a masha ni gaw shi hpe Yehu hpang de woi wa nna sat kau ma ai. Rai ti mung Yehu a masha ni gaw dai MADU hpe daw jau ai amu yawng galaw ya lu ai shi a kaji Hkawhkam Yehoshahpat hpe hkungga ai a majaw shi a mang hpe lup makoi da ma ai. Ahazia a dinghku na mungdan hpe up hkang lu na matu mara langai mi mung n nga nga sai.

¹⁰Hkawhkam Ahazia a kanu Ahtalia gaw shi a kasha sat kau hkrum sai lam hpe chye jang, Yuda hkawhkam dinghku masha ni yawng hpe sat sharu kau na matu shi hkang dat wu ai.

¹¹Ahazia hta Yehoiada mying ai hkinjawng wa hte hkungran ai kamoi Yehosheba nga nga ai. Shi gaw Ahazia a shadang sha ni hta na Yosha hpe machyi shim ai hku hkye mawai la na nga sat kau hkrum na hkawhkam kasha ni kaw na shi hpe woi la nhtawm Nawku Htingnu kata na yup gawk langai mi hta makoi da let bau maka da wu ai. Shi hpe makoi da lu ai majaw Ahtalia a lata hta sat kau hkrum na kaw na shi hpe hkye da lu nga sai.

¹²Num Hkawhkam Ahtalia up nga yang, shi gaw dai yang e kru ning tup makoi nga wu ai.