Read Jinghpaw Common Language Bible 2009 2 HKAWHKAM LABAU 31 Bible Online

2 HKAWHKAM LABAU 31 - Jinghpaw Common Language Bible 2009 bible

2 HKAWHKAM LABAU 31

¹Poi galaw ngut ai hpang, Israela amyu masha ni yawng gaw Yuda mung na mare shagu de pru sa nhtawm nlung shadaw ni hpe agrawp daw kau ma ai. Shanhte gaw Ashera karai num a sumla ni kran daw kau let tawn hkungri ni hte tara maigan masha ni a nawku shara ni mahkra hpe jahten sharun kau ma ai. Shanhte gaw naw ngam nga ai Yuda mung ting hte Benyamin, Ehprim hte Manashe ni a lamu ga ni hpe dai hte maren galaw ma ai. Dai hpang shanhte yawng tinang nang a nta ni de nhtang mat wa shajang ma ai.

²Hkawhkam Hezekia gaw hkinjawng hte Lewi masha ni hpe hpung hpaw shagrin da ya nga ai rai nna shanhte langai hte langai tinang ang ai hpung hta laksan bungli lit lu nga ma ai. Shing re ai bungli lit ni hta wan nat hkungga hte mahku hkungga ni hpe nawng ya ai lam, Nawku Htingnu kata nawku ai hta shang lawm ai hte Nawku Htingnu kata hta shakawn kungdawn let chyeju dum ai lam amyu myu lawm nga ai.

³Shi gaw dai MADU a tara hte maren shi madu da ai yam nga hpung ni hte sagu bainam hpung ni hta na jahpawt shana wan nat hkungga nawng ya na yam nga ni mung, Bansa Nhtoi, Shata Praw e galaw ai Poi hte kaga poi ni hta nawng ya na hkungga ni jaw ya wu ai.

⁴Dai sha n-ga, hkinjawng ni hte Lewi masha ni gaw dai MADU a Tara hte seng ai ra mara ni hpe aten tup sharin ya lu na matu mung, shanhte a matu hkungga ni la sa ya na lam mung, hkawhkam wa gaw Yerusalem mare masha ni hpe hkang dat wu ai.

⁵Shing ngu hkang dat ai ga pru jang, Israela amyu masha ni gaw kaja htum ai nsi naisi, sabyi ntsin, tsanlun sau, lagat ntsin hte kaga yi sun hkauna na pru ai hkai nmai kumhpa ni la sa ya ma ai; shanhte lu ai arai yawng mayawng kaw na htam shi hta na htam mi hpe mung la sa shajang nga ma ai.

⁶Yuda mung na mare ni hta shanu nga ai amyu masha ni yawng gaw shanhte a dumsu, sagu htam shi hta na htam mi la sa nhtawm dai MADU shanhte a Karai Kasang a matu ap nawng da sai kumhpa law law hte hpe mung la sa shajang ma ai.

⁷Dai kumhpa ni gaw shata masum ngu na hta du hpang wa nna shata mali tup matut manoi sa tawn da nga ma ai.

⁸Hkawhkam Hezekia hte shi a du salang ni gaw kade daram sa jaw da nga masai sumpum hpe sa mu jang, dai MADU hte Israela masha ni hpe shanhte shakawn kungdawn ma ai.

⁹Hkawhkam wa gaw dai kumhpa ni hte seng nna hkinjawng ni hte Lewi masha ni hpe san wu yang,

¹⁰Zadok amyu matu na Hkinjawng Kaba Azaria gaw shi hpe, “Amyu masha ni Nawku Htingnu de shanhte a kumhpa ni la sa shajang ai shani kaw nna sha law ai hta sha n-ga, law law naw jan nga ai. Dai MADU gaw shi a amyu masha ni hpe shaman ya nu ai majaw ndai lam yawng mayawng anhte hkam la lu saga ai,” ngu nna tsun wu ai.

¹¹Hkawhkam wa hkang da ai hte maren, Nawku Htingnu wang hta sut gawk ni hpe shanhte hkyen lajang da nhtawm,

¹²kumhpa ni hte htam shi hta na htam mi yawng shim nga lu na matu dai shara ni hta tawn da ma ai. Shanhte gaw Hkonania mying ai Lewi masha langai mi hpe hpareng shangun nga nna, shi a kanau Shime gaw shi hpe karum shingtau ai wa rai nga ai.

¹³Shan a up hkang ai npu hta amu galaw na matu Lewi masha marai shi san da nga ai; dai ni gaw Yehiela, Azazia, Nahat, Asahela, Yerimot, Yozabad, Eliela, Ismahkia, Mahat, hte Benaia ni rai ma ai. Ndai ni yawng gaw Hkawhkam Hezekia hte Hkinjawng Kaba Azaria yan a ahkang aya hte maren hkan galaw ma ai.

¹⁴Nawku Htingnu a Sinpraw Chyinghka sin ai du Lewi masha Imna a kasha Kore gaw dai MADU a matu sak jaw ai kumhpa ni hkap la nna bai garan jaw ya ai hpareng wa rai nga ai.

¹⁵Hkinjawng ni nga ai kaga mare ni hkan shi hpe kangka ai hte karum shingtau ya ai Lewi ni mung nga nga ai; dai ni gaw Eden, Miniamin, Yeshua, Shimaia, Amaria hte Shehkania ni rai nga ai. Shanhte gaw amyu lakung hku n re ai sha, Lewi masha ni gun hpai ai bungli lit hte maren shanhte a kahpu kanau Lewi masha ni hpe lusha maren mara garan jaw ma ai.

¹⁶Shanhte gaw madang hta hkan nna Nawku Htingnu kata shani shagu gun hpai nga ai asak sumshi ning hte dai hta lai sai lasha ni yawng hpe mung gambum langai jaw ma ai.

¹⁷Hkinjawng ni gaw shanhte a bungli lit ni hpe amyu lakung lama dap hku hkan nna san da nga ma ai; asak hkun ning hte dai hta lai sai Lewi masha ni mung shanhte gun hpai na bungli ni hpe hpung hte hpung galaw na matu san da nga ma ai.

¹⁸Shanhte yawng gaw galoi aten hta mung, shanhte a chyoi pra ai bungli lit ni galaw shajin da ra nga ma ai majaw tinang nang a madu jan ni, ma kaji ni hte nga lawm nga nang ai ni a jahpan galaw tawn da ra nga ai.

¹⁹Arun amyu matu ni hpe masat ya ai mare ni hte dai mare ni madu da ai udat shara ni hta nga nga ai hkinjawng ni gaw hkinjawng dinghku ni hta na lasha ni yawng hte Lewi lakung lama hku hkan nna jahpan hta lawm nga ai masha shagu hte hpe lusha garan jaw na lit lu ai masha ni rai ma ai.

²⁰Hkawhkam Hezekia gaw Yuda mung ting hta ding man ai amu hte dai MADU shi a Karai Kasang awng sharawng nga ai amu hpe galaw wu ai.

²¹Shi gaw Nawku Htingnu a matu shi galaw ai amu magup hta mung, Tara hkan ai htung hta mung, tsep kawp sadi dung ai hte shi a Karai Kasang hpe nawku akyu hpyi ai myit masin rawng nga ai majaw awng dang nga wu ai.