Read Jinghpaw Common Language Bible 2009 2 HKAWHKAM LABAU 34 Bible Online

2 HKAWHKAM LABAU 34 - Jinghpaw Common Language Bible 2009 bible

2 HKAWHKAM LABAU 34

¹Yoshia gaw Yuda hkawhkam tai wa ai shaloi asak matsat ning rai nna Yerusalem mare e sumshi langai ning up nga ai.

²Shi gaw dai MADU awng sharawng ai amu galaw nna shi a kaji kawa Hkawhkam Dawi a kasi hkan nang wu ai majaw Karai Kasang a tara yawng mayawng hte hpe ja ja madat mara nga ai.

³Yoshia hkawhkam tai wa ai matsat ning ngu na shi shabrang naw rai nga yang, shi a kaji kawa Hkawhkam Dawi a Karai Kasang hpe nawku hpang wa wu ai. Mali ning na ai hpang, shi gaw tara maigan masha ni a nawku shara ni, Ashera karai num a hkrang sumla ni hte kaga hpara ni yawng hpe jahten sharun hpang wa wu ai.

⁴Shi a masha ni gaw shi reng hkang ai npu hta Bala hpara nawku ai shara hta tawn da ai tawn hkungri ni hpe agrawp mani kau ma ai. Dai makau e nga ai manam pyaw ai baw nat nawng ya ai hkungga ni hpe run hpya kau ya ma ai. Shanhte gaw Ashera hpara sumla hkrang ni hte kaga hpara sumla ni yawng hpe ayun ayaw di agrawp mani kau nna dai ni hpe nawng ya ai masha ni a lup ntsa hkan e gat ayai kau ma ai.

⁵Shi gaw shanhte nawku yu sai shara hkan tawn da ai hkungri ni a ntsa e, tara maigan hkinjawng ni a nrut nra ni hpe nat kau wu ai. Ndai amu ni yawng hpe galaw let shi gaw Yuda hte Yerusalem mare hpe htung hte maren jasan jaseng kau wu ai.

⁶Shi gaw mare ni hte Manashe, Ehprim, Simun, hte dingdung maga Naphtali ginwang hkan na hten za mat sai shara ni hpe dai hte maren sha hkan galaw wu ai.

⁷Shi gaw Dingdung Mungdan ting de du hkra nga ai tawn hkungri ni hpe mung, Ashera hpara sumla hkrang ni hpe mung hpara sumla ni hpe mung ayun ayaw di nna agrawp mani kau nhtawm manam pyaw ai baw nat nawng ya ai tawn hkungri ni yawng hpe mung agrawp mani kau wu ai. Dai hpang Yerusalem de shi bai nhtang mat wa wu ai.

⁸Shi hkaw dung ai shi matsat ning hta mungdan hte Nawku Htingnu jasan jaseng nna tara maigan ni a nawku ai lai ni hpe jahtum kau ngut ai hpang, Yoshia gaw MADU Karai Kasang a Nawku Htingnu hpe gram lajang na matu marai masum rai nga ai Azalia a kasha Shahpan, Yerusalem up ai Masea hte Yoahaza a kasha arawng kaba lu ai Yoa hte hpe shangun dat wu ai.

⁹Lewi masha sin langa wa gaw Nawku Htingnu kata lahkawn da lu sai gumhpraw ni hpe Hkinjawng Kaba Hilkia a lata de ap ya nga ai. (Dai ni gaw Ehprim hte Manashe amyu masha ni kaw na mung, naw ngam nga ai Dingdung Mungdan hte Yuda amyu masha Benyamin mung hte Yerusalem mare ni kaw nna lahkawn la lu ai gumhpraw ni rai nga ai.)

¹⁰Dai gumhpraw hpe Nawku Htingnu gram lajang na hpareng marai masum a lata de ap ya wu ai. Shanhte mung dai hpe

¹¹Yuda hkawhkam ni run kau na ahkang jaw da ai dum nta ni bai gram lajang ai hta lang sai nlung ni hte hpunpyen ni mari na matu lasama ni hte nta gap ai ni a lata de jaw ya ma ai.

¹²Amu galaw masha ni chyawm gaw atsawm sha kangka ai ni rai ma ai. Bungli galaw masha ni hpe yu reng ai Lewi masha mali mung lawm nga ai: dai ni gaw Merari lakung na Yahat hte Obadia, Kohat lakung na Zehkaria hte Meshulam hte rai nga ai. (Lewi masha ni mahtang mahkawn mangoi atsawm sha chye mahkawn ai ni rai ma ai.)

¹³Kaga Lewi masha ni gaw arung arai htaw htinglet ya ai amu hpe woi hpareng ai hte kaga bungli amyu myu galaw ai amu galaw masha ni hpe yu reng nga ai. Bai kaga ni mung ka matsing ni hpe kyem mazing ai hte sin langa amu hta daw jau nga ma ai.

¹⁴Sut gawk kata na gumhpraw ni shaw shapraw ma ai shaloi Karai Kasang Mawshe hpe jaw ya sai dai MADU a Tara Laika Buk hpe Hilkia mu tam wu ai.

¹⁵Shi gaw Shahpan hpe, “Ndai Nawku Htingnu kata hta Tara laika buk ngai mu ni ai,” ngu nna tsun wu ai. Shi gaw dai laika buk Shahpan hpe jaw wu ai rai nna,

¹⁶Shahpan mung dai hpe hkawhkam wa hpang de la wa ya wu ai. Shi gaw, “Anhte gaw nang hkang dat ai lam shagu galaw saga ai.

¹⁷Anhte gaw Nawku Htingnu kata kyem mazing da ai gumhpraw hpe la nna, amu galaw masha ni hte shanhte hpe yu reng ai ni a lata de ap ya saga ai,” ngu nna tang shawn wu ai.

¹⁸Dai hpang shi gaw, “Hilkia ngai hpe jaw ai laika buk langai ndai yang e ngai lu da nngai,” ngu nna tsun kahtap wu ai. Shi gaw dai hpe hkawhkam wa a man e aja awa hti dan wu ai.

¹⁹Ya hkawhkam dai laika hti dan ai hpe na jang, shi gaw shi a hpun palawng ni hpe yawn ai myit hte gang je kau nhtawm,

²⁰Hilkia hpe mung, Shahpan a kasha Ahikam, Mihkaia a kasha Abdon, hkaw wang amu madu Shahpan hte hkawhkam a shangun ma Asaia ni hpe ning ngu hkang dat wu ai:

²¹“Nye a matu mung, Israela hte Yuda mung hta naw ngam nga ai amyu masha ni a matu mung, dai MADU hpe sa san yu mu. Ndai laika hta rawng ai sharin shaga lam ni hpe tam yu mu. Anhte a kaji kawa ni dai MADU a ga hpe n madat ai sha, ndai laika hta ka da ai hte maren galaw ra ai amu n galaw kau ma ai majaw dai MADU anhte hpe pawt nga ai.”

²²Hkawhkam wa hkang ai ga hte maren, Hilkia hte kaga ni mung Yerusalem daw ningnan hta nga ai Hulda mying ai myihtoi num hpang de sa nna san ma ai. (Shi a madu wa Shalum gaw Hara a kashu, Tikwa a kasha rai nna Nawku Htingnu na palawng galu ni woi hpareng ai wa rai nga ai.) Shanhte mung shi hpe byin ai lam tsun dan ma ai rai nna,

²³shi shanhte hpe hkawhkam wa hpang de bai nhtang wa shangun let,

²⁴dai MADU kaw na ning nga nga ai lam shi hpe wa shana na matu tsun dat wu ai: “Hkawhkam wa hpe hti dan sai laika hta rawng ai dagam ga ni hte Yerusalem mare hte dai hta nga ai amyu masha ni yawng hpe ngai ari jaw na nngai.

²⁵Shanhte gaw ngai hpe ningdang kau nna kaga karai shaje ni hpe shagu hkungga ni nawng ya ai amu yawng mayawng galaw let ngai hpe pawt sindawng shangun nga masai. Nye a masin kahtet ai gaw Yerusalem hpe hkap daw na masin shalut ya nga ai rai nna dai gaw krip mat na n rai.

²⁶Hkawhkam wa shi nan chyawm gaw dai MADU Israela a Karai Kasang Ngai ning ngu nna tsun nngai: Laika hta ka da sai hpe nang madat nit dai,

²⁷Yerusalem mare hte dai hta nga ai amyu masha ni hpe ari jaw na matu ngai kaning rai jahkrit shama ai lam hpe nang na ndai shaloi na a hpun palawng ni hpe gang je kau nna hkrap let nye a man e myit malai ai hte nang nan shagrit shanem nga ndai. Na a hpyi nem ai nsen hpe ngai na ni ai majaw,

²⁸Yerusalem mare ntsa e ngai shapraw na ari gaw nang si mat wa ai hpang du hkra du na ra ai n rai. Ngai nang hpe ngwi ngwi pyaw pyaw hte si wa shangun mayu nngai.” Dai masha ni gaw dai mungga gun nna Hkawhkam Yoshia hpang de nhtang mat wa ma ai.

²⁹Hkawhkam Yoshia gaw Yuda hte Yerusalem mare ningbaw ni yawng hpe shaga shinggyin la nna,

³⁰hkinjawng ni, Lewi masha ni, sut su ai, matsan ai mi n nga, naw ngam nga ai amyu masha ni yawng hkan gumbawm nang let Nawku Htingnu de shanhte sa wa ma ai. Shanhte yawng a shawng e hkawhkam wa gaw Nawku Htingnu kata hta mu tam la sai ga shaka laika ting hpe aja awa hti dan wu ai.

³¹Shi gaw hkawhkam shadaw makau e tsap nga let shi a myit masin, wenyi mahkra hte shi a ga hpe madat mara nna tara hte hkang da ai ga ni yawng hpe shadik shatup let, laika hta ka da sai ga shaka hte maren hkan galaw lu hkra nga, dai MADU hte ga shaka shagrin da nu ai.

³²Shi gaw Benyamin amyu masha ni hte Yerusalem mare e nga ai masha shagu, ga shaka hkan shatup lu na matu ga sadi jaw shangun ma ai. Yerusalem mare masha ni gaw shanhte a kaji kawa ni a Karai Kasang hte tawn da manu ai ga shaka a hkan sa ra ai lam ni hpe madat mara nga ma ai.

³³Hkawhkam Yoshia gaw Israela amyu masha ni madu da nga ai lamu ga hta nga ai matsat shabat re ai hpara sumla ni yawng hpe shi naw hkrung nga ai hte yang, sharun jahten kau ya nhtawm dai MADU shanhte a kaji kawa ni a Karai Kasang hpe nawku daw jau na matu amyu masha ni hpe lajin laroi da nga ai.