Read Jinghpaw Common Language Bible 2009 2 HKAWHKAM LABAU 5 Bible Online

2 HKAWHKAM LABAU 5 - Jinghpaw Common Language Bible 2009 bible

2 HKAWHKAM LABAU 5

¹Hkawhkam Shawlumon gaw Nawku Htingnu galaw ai magam amu yawng mayawng hpe galaw ngut jang, shi a kawa Dawi dai MADU a matu ap nawng da sai aja, gumhpraw hte kaga arung arai yawng hte hpe Nawku Htingnu sut gawk hta sa tawn da wu ai.

²Dai hpang Hkawhkam Shawlumon gaw Israela amyu bawsang ni hte lakung lama ni yawng a ningbaw ni hpe Yerusalem mare de sa zup hpawng nhtawm dai MADU a Ga Shaka Sumpu hpe Ziun ngu ai Dawi a Mare kaw nna Nawku Htingnu kata de jashawn da na matu hkang dat wu ai.

³Shanhte yawng mahtang Sum poi aten hta sa zup hpawng nga ma ai.

⁴Ningbaw ni yawng du zup jang, dai Ga Shaka Sumpu hpe Lewi masha ni sharawt nhtawm,

⁵Nawku Htingnu kata de hpai shang wa ma ai. Lewi masha ni hte hkinjawng ni mung dai MADU a hpung shingkang shanu nga ai Sum hte dai hta lang ra ai arung arai ni yawng hpe Nawku Htingnu de htawt sit bang mu ai.

⁶Hkawhkam Shawlumon hte Israela amyu masha ni yawng Ga Shaka Sumpu a man e hpawng let, n dang hti hkra law ai sagu dumsu wunawng wuwa sat nawng ya ma ai.

⁷Dai hpang hkinjawng ni mung Ga Shaka Sumpu hpe Nawku Htingnu kata de hpai jashawn nhtawm Chyoi Pra Htum ai Shara na singkaw tu ai hkrung kanu yan a npu e dai hpe tawn da ma ai.

⁸Shan a shachyen da ai singkaw gaw Sumpu hte dai hpe hpai ai kandang ni hpe ka-up da nga ai.

⁹Chyoi Pra Htum ai Shara a man e tsap ai wa kadai mung kandang matu ni hpe ading tawk mu lu nga ai; kaga shara kaw nna mahtang n mu lu nga ai (Kandang dai ni dai ni du hkra naw nga nga ai.)

¹⁰Israela amyu masha ni Egutu mung na pru wa yang, dai MADU gaw Sina Bum e shanhte hte ga shaka tawn da nhtawm Mawshe tawn da ai lungpa lahkawng hta kaga, dai Ga Shaka Sumpu e hpa mung n rawng nga ai.

¹¹Hkinjawng ni yawng gaw shanhte hkum hpe ap nawng nhtawm tinang hte seng ai hpung hta daw jau nga ma ai n rai. Lewi masha mahkawn mangoi chye ai Asap, Heman, Yeduhtun hte shanhte a amyu lakung ni gaw mani ai lachyit nba ni hpe bu hpun nga ma ai. Dai Lewi masha ni gaw shupsheng hte dawraw tingse ni lang let tawn hkungri a sinpraw maga de tsap nga ma ai; shanhte hte rau pahtau dum ai hkinjawng 120 mung lawm nga ai. Shanhte gaw dai MADU hpe mahkawn mangoi nga ma yang, mahkawn mangoi ai ni gaw pahtau, shupsheng hte kaga madum sumpyi ni a majaw nsen langai sha rai, ra pyaw nga ai: “Dai MADU hpe shakawn kungdawn mu, Hpa majaw nga yang, shi gaw mai kaja nga ai hte Shi a tsaw ra myit htani htana agrin nga ai.” Hkinjawng ni Nawku Htingnu kaw na pru wa nga ma yang, dai MADU a htoi kabrim ai hpung shingkang gaw htoi tu ai sumwi zawn dai shara hpe nan ka-up da nga ai. Shanhte gaw nawku ai amu hpe n matut galaw lu nga ma ai.