Read Jinghpaw Common Language Bible 2009 EZRA 4 Bible Online

EZRA 4 - Jinghpaw Common Language Bible 2009 bible

EZRA 4

¹Yuda hte Benyamin amyu masha ni a gumlau hpyen ni gaw bawng dung ai kaw nna bai nhtang wa sai ni dai MADU Israela a Karai Kasang a Nawku Htingnu hpe bai gaw gap da nga masai shiga na ma ai.

²Dai rai nna shanhte gaw Zerubabela hte amyu lakung ni a ningbaw ni hpe sa jahkrum nhtawm, “Anhte gaw ndai Nawku Htingnu gaw gap ai amu hta nanhte hte rau galaw lu mi ga. Anhte gaw nanhte nawku ai Karai Kasang hpe sha nawku ga ai. Anhte hpe ndai yang e nga na matu shangun dat ai Asuri Hkawseng Esahadon a prat kaw nna shi hpe shagu hkungga ni nawng ya saga ai,” ngu nna tsun ma ai.

³Zerubabela, Yawshu hte amyu lakung ni a ningbaw ni chyawm gaw shanhte hpe, “Anhte gaw dai MADU anhte a Karai Kasang a matu Nawku Htingnu gaw gap ai amu hta nanhte a karum la lam n ra nga ga ai. Persi Hkawseng Kuru anhte hpe hkang da mi ai hte maren, anhte hkum nan dai hpe gap na ga ai,” ngu nna tsun mu ai.

⁴Dai hpang, dai mung hta nga nga masai masha ni gaw dai hpe n gap lu hkra nga, Yuda masha ni hpe n-gun shadaw ya ai hte jahkrit shatsang nga ma ai.

⁵Shanhte gaw dai amu hpe n galaw lu hkra, Persi asuya du salang ni hpe mayun kumhpa jaw ma ai. Dai hpe Hkawseng Kuru a prat kaw nna Dari hkaw dung ai prat dingyang hpaji daw nna gunjang ma ai.

⁶Hkawseng Ahasuru hkaw dung hpang wa ai aten hta, Yuda mung hte Yerusalem mare hta nga ai amyu masha ni a gumlau hpyen ni gaw shanhte hpe mara shagun ai laika ka dat ma ai.

⁷Persi Hkawseng Artazazi hkaw bai dung ai aten hta Bishlam, Mitredat, Tabela hte shanhte a kanawn manang ni gaw hkawseng wa hpang de laika langai ka dat ma ai. Hti ai shaloi ga gale la lu na matu, laika dai hpe Aramik ga hte ka da nga ai.

⁸Munggyi Rehum hte mungdaw amu madu Shimshai yan gaw Yerusalem mare hte seng nna Artazazi hpang de ning ngu nna laika ka dat ma ai:

⁹“Munggyi Rehum, mungdaw amu madu Shimshai yan hte shan a manaw manang ni, tara agyi ni hte Erek, Babelon hte Elam mung na Susa mare kaw na ru di hkrat wa ai kaga du salang ni yawng hte rau,

¹⁰tinang dum nta kaw na htawt sa wa ai dai galu kaba nna daru magam n-gun rawng ai Ashubanipala gaw Samari mare hte Uhprat mungdaw a sinna maga de nga shangun ai kaga masha yawng kaw nna ka dat nga ai.”

¹¹Ndai gaw laika hta rawng ai ga rai nga ai: “Uhprat a sinna maga de na shi a shangun ma masha ni kaw nna Hkawseng Artazazi hpang de ning ngu ka dat nga ai.

¹²“Ya na a kaga lamu ga ni kaw nna ndai de pru sa wa ai Yuda masha ni gaw Yerusalem mare hta nga nga masai rai nna, n hkru n shawp ai hte gumlau ai mare hpe bai de da nga ma ai lam madu hkawhkam hpe chye shangun mayu ga ai. Shanhte gaw mare bunghku ni hpe bai galaw hpang wa masai rai nna kade n na yang, dai hpe shangut lu na rai ma ai.

¹³Anhte a madu hkawhkam e, ndai mare hpe bai de da nna de a bunghku ni ngut wa jang, amyu masha ni ahkun hkanse bang ai hpe jahkring kau na mara ai shaloi, hkawhkam hte seng ai ahkun banda yawm mat na ra ai.

¹⁴Ya chyawm gaw, madu hkawhkam a npu hta lit gunhpai nga ga ai majaw ndai amu byin wa na n yu sharawng nga ga ai; dai re ai majaw anhte gaw na a kaji kawa ni kyem da ai labau gawn ka matsing hta sawk yu na ahkang

¹⁵nang hkang dat n-ga, anhte hpaji jaw ga ai. Dai hku nang galaw ai rai yang, ndai mare gaw moi prat kaw nna tut nawng gumlau nga nna hkawhkam ni hte mungdaw up hkang du ni hpe sharu shatsang nga ai hpe mung, dai mare e nga ai masha ni hpe galoi mung up hkang yak nga ai majaw dai mare jahten sharun kau hkrum nga sai lam hpe nang mu sawk na rin dai.

¹⁶Dai re ai majaw, ndai mare bai de nna, mare bunghku ni hpe gaw sharawt da ngut da ai rai yang, anhte a madu hkawhkam gaw Uhprat mungdaw a sinna maga na shara hpe up lu na ahkang n lu mat na ra ai hpe anhte myit hkrang ga ai.”

¹⁷Hkawseng wa gaw ndai mahtai jaw wu ai: “De, munggyi Rehum, mungdaw amu madu Shimshai hte Samari mare, Uhprat a Sinna maga de naw nga nga ai shan a manaw manang ni hpang de shakram let htang dat ai.

¹⁸“Nanhte ka shagun dat ai laika hpe ga gale nna ngai hpe hti dan masai.

¹⁹Ngai hkang dat nna labau laika hpe sawk tam yu yang, Yerusalem gaw moi prat kaw nna hkawhkam ahkang aya hpe malan gumlang nna gumlau ai hte ru yak tsin-yam tsindam galaw shapraw ai ni hte hpring nga ai hpe kaja wa mu ni ai.

²⁰Daru magam n-gun rawng ai hkawhkam ni dai yang e hkaw dung nna Uhprat a Sinna maga a mungdaw ting hpe up hkang let, ahkun hkanse ni lahkawn la yu nga masai.

²¹Dai re ai majaw, ngai ahkang kaga garai n jaw ai aten du hkra, dai masha ni mare bai de ai amu jahkring da na lam, nanhte hkang da lu na rai myit dai.

²²Nye a akyu loi mi mung n mai machyi hkra nga ai majaw dai amu hpe alawan galaw mu.”

²³Hkawseng Artazazi kaw na ndai laika lu la jang, Rehum, Shimshai hte shan a manaw manang ni a man e hti nhtawm, Yerusalem mare de shanhte tin tin sa wa nna, mare bai de ai amu jahkring da na matu Yuda masha ni hpe shadut ma ai.

²⁴Persi Hkawseng Dari hkaw dung ai lahkawng ning du hkra Nawku Htingnu gaw gap ai amu hpe dai hku naw jahkring tawn da ma ai.