Read Jinghpaw Common Language Bible 2009 EZRA 5 Bible Online

EZRA 5 - Jinghpaw Common Language Bible 2009 bible

EZRA 5

¹Dai aten hta, myihtoi lahkawng rai nga ai Hagi hte Yido a kasha Zehkaria yan gaw, Yuda mung hte Yerusalem e nga ai Yuda masha ni hpe Israela a Karai Kasang a mying ningsang hta ga tsun hpang ma ai.

²Shelatila a kasha Zerubabela hte Yehozadak a kasha Yawshu yan gaw shan a mungga na jang, Yerusalem na Nawku Htingnu hpe bai galaw hpang wa ma ai rai nna, myihtoi lahkawng yan mung shan hpe karum lawm ma ai.

³Uhprat a Sinna maga na munggyi Tateni, Shehta Bozenai yan hte shan a du salang manang ni gaw Yerusalem de sa nhtawm ning ngu tsun ma ai: “Ndai Nawku Htingnu hpe gap nna dai hpe jahting na matu nanhte hpe kadai hkang da myit ta?”

⁴Shanhte mung Nawku Htingnu gap karum nga masai masha ni yawng a mying ni hpe san ma ai.

⁵Rai ti mung, Karai Kasang gaw Yuda ningbaw ni hpe mada yu nga ai rai nna, Dari hpang de laika ka dat ai hte shi kaw na htang ai laika bai lu la ai aten du hkra, shanhte n hkum da na matu Persi du salang ni amu n shapraw na matu daw dan da ma ai.

⁶Ndai gaw hkawseng wa hpang de shanhte ka shagun dat ai lam rai nga ai:

⁷“De, Hkawseng Dari, nang gaw ngwi pyaw sim sa ai hte up nga u ga law.

⁸“Anhte gaw Yuda mungdaw de sa nna galu kaba ai Karai Kasang a Nawku Htingnu galaw nga ai nlung tawng kaba ni hte bunghku hpunngau ni hte bai gaw da nga ma ai hpe mu saga ai. Dai amu hpe sadi sahka myit hte galaw nna angwi ngwi sha kaba wa nga sai gaw madu hkawhkam chye ang nga ndai.

⁹“Nawku Htingnu bai gaw gap na hte dai hpe jahting na matu shanhte hpe ahkaw ahkang kadai jaw ya ai lam anhte hpe tsun dan na matu amyu masha ni a ningbaw ni hpe san yu saga ai.

¹⁰Ndai amu hpe woi ningbaw ai ni kadai dai rai nga ai hpe chye lu hkra shanhte a mying ni hpe mung san yu saga ai.

¹¹“Shanhte gaw, ‘Anhte gaw sumsing lamu hte ginding aga a Karai Kasang a shangun ma ni rai nga ga ai. Daru magam n-gun rawng ai Israela hkawhkam langai mi gaw lai sai shaning law law kaw nna shawng gap hpang da sai Nawku Htingnu hpe bai gap nna ra ai arung arai ni hpe jahting da ga ai.

¹²Rai ti mung, anhte a kaji kawa ni gaw Sumsing Lamu a Karai Kasang hpe masin pawt shangun nga ma ai majaw shanhte gaw Hkalde hkawhkam amyu matu na Babelon mung a Hkawhkam Nebuhkadneza a lata de ap kau ai hkrum ma ai. Dai Nawku Htingnu mung hten run mat nna Babelon mung hta bawng dung na matu woi la ai hkrum ma ai.

¹³Dai hpang, Babelon a hkawseng Hkawhkam Kuru hkaw dung ai shawng shaning hta Nawku Htingnu hpe bai gaw gap da na matu hkang da wu ai.

¹⁴Shi gaw Yerusalem Nawku Htingnu kaw na Nebuhkadneza magawn mat wa nhtawm Babelon mare na htingnu hta wa tawn da ai aja, gumhpraw hte htingnu hkinghku ni hpe bai nhtang jaw wu ai. Shing rai Kuru gaw Yuda munggyi shatai da ai Shebaza mying ai wa a lata de ndai hkinghku arung arai ni hpe ap ya wu ai.

¹⁵Dai hkawseng wa mahtang dai ni hpe Yerusalem Nawku Htingnu de la nhtang mat wa nhtawm shawng de na htingra hta Nawku Htingnu bai gaw gap na matu shi hpe tsun wu ai.

¹⁶Dai rai nna, Shebaza mung de a npawt nhpang hpe sa jahkrat bang wu ai; dai aten kaw nna ya du hkra gaw gap ai amu matut galaw nga ti mung, Nawku Htingnu gaw ya du hkra garai n shangut da lu nga ai.’

¹⁷“Ya chyawm gaw, ndai Yerusalem na Nawku Htingnu bai gaw gap na matu Kuru ahkang n jaw ai hpe tam shapraw lu hkra, Babelon mare na hkawhkam labau gawn ka matsing hta tam sawk yu nna madu hkawhkam ra sharawng ai rai yang, ndai amu hta na a ra sharawng ai lam hpa rai nga ai hpe nhtang shana dat mi.”