Read Jinghpaw Common Language Bible 2009 EZRA 7 Bible Online

EZRA 7 - Jinghpaw Common Language Bible 2009 bible

EZRA 7

¹Shaning ram ram na mat wa ai hpang, Persi Hkawseng Artazazi hkaw dung nga yang, Ezra mying ai masha langai nga nga ai. Shi a kaji kawa ni a labau lasang hpe nhtang gawn yu yang, Hkinjawng Agyi Arun kaw nna ning rai gawn da nga ai. Ezra gaw Seraia a kasha, Seraia gaw Azaria a kasha, Azaria gaw Hilkia a kasha,

²Hilkia gaw Shalum a kasha, Shalum gaw Zadok a kasha, Zadok gaw Ahitub a kasha,

³Ahitub gaw Amaria a kasha, Amaria gaw Azria a kasha, Azaria gaw Meraiot a kasha,

⁴Meraiot gaw Zerahia a kasha, Zerahia gaw Uzi a kasha, Uzi gaw Buki a kasha,

⁵Buki gaw Abishua a kasha, Abishua gaw Hpineha a kasha, Hpineha gaw Eleaza a kasha, Eleaza gaw Arun a kasha rai nga ai.

⁶Ezra gaw dai MADU Israela Karai Kasang Mawshe hpe jaw ya ai Tara hpe azin ayang chye chyang ai hpaji ninghkrin wa rai nga ai. Ezra gaw dai MADU shi a Karai Kasang a shaman chyeju hkam la nu ai majaw hkawseng wa mung shi hpyi mahpyi lam magup jaw ya wu ai. Artazazi hkaw dung ai sanit ning hta Ezra gaw Israela masha ni hta hkinjawng ni, Lewi masha ni, htingnu mahkawn mangoi masha ni, Nawku Htingnu sin ai ni hte amu galaw masha ni lawm ai hpung mi hte Babelon mung kaw nna Yerusalem mare de wa ma ai.

⁸Shanhte gaw shawng na shata a shawng shani e, Babelon mung kaw nna pru wa nhtawm Karai Kasang karum la ai hte shata manga a shawng shani e Yerusalem mare de shanhte du shang wa ma ai.

¹⁰Ezra chyawm gaw dai MADU a Tara hpe sharin achyin ya let dai hpe ta tut hkan sa nna, Israela amyu masha ni hpe de a tara hte hkan sa na matsun maroi ga ni hpe sharin achyin ya na, shi a asak ap nawng da nu ai.

¹¹Artazazi gaw dai MADU Israela hpe jaw ya sai tara hte hkang da ai ga ni hpe azin ayang chye chyang ai hpaji ninghkrin hkinjawng Ezra hpang de ndai laika jaw dat wu ai:

¹²“Hkawseng Artazazi kaw nna Sumsing Lamu a Karai Kasang a Tara hpe chye chyang ai hpaji ninghkrin hkinjawng Ezra hpang de,

¹³“Nye a hkawseng mungdan ting na Israela amyu masha ni yawng, hkinjawng ni hte Lewi masha ni nang hte rau Yerusalem mare de wa na grai sharawng ma yang, ahkang jaw ya na matu ngai hkang da nngai.

¹⁴Nang kamhpa nna madat mara hkan sa nga ai na a Karai Kasang a Tara kade daram kaja nga ai hpe mu lu hkra, Yerusalem hte Yuda mung na mabyin lam ni hpe san sagawn yu na matu nye a hpaji jaw masha sanit hte rau, nang hpe ngai shangun dat nngai.

¹⁵Yerusalem e nga ai Nawku Htingnu na Israela a Karai Kasang a matu ngai hte nye a hpaji jaw masha ni sharawng awng ai myit hte jaw ya ai aja gumhpraw hkungga ni hpe nang hte rau la wa lu na rai ndai.

¹⁶Nang gaw Babelon mungdaw ting na lahkawn la lu ai aja, gumhpraw yawng hpe mung, Israela amyu masha ni hte Yerusalem mare na shanhte a Karai Kasang a Nawku Htingnu a matu shanhte a hkinjawng ni sak jaw ai hkungga kumhpa ni hpe mung la wa na rai ndai.

¹⁷“Nang gaw ndai gumhpraw hpe sadi sahka hte jai nna, usu ni, sagu la ni, sagu kasha ni, nsi naisi ni hte sabyi ntsin mari nhtawm Yerusalem Nawku Htingnu a tawn hkungri ntsa e dai ni hpe nawng ya na rai ndai.

¹⁸Naw ngam nga ai aja gumhpraw hpe nang hte na a manaw manang ni ra sharawng ai hpa lam hta mung, na a Karai Kasang a myit hte maren, mai lang nga ndai.

¹⁹Nawku Htingnu daw jau magam bungli hta lang na matu nang hpe jaw da sai arung arai hkinghku yawng hpe Yerusalem na Karai Kasang hpang de nang sak jaw na rai ndai.

²⁰Nawku Htingnu a matu nang hta lama ma ra ai rai yang, hkawhkam sut dek kaw na lu la mai nga ndai.

²¹Sumsing Lamu a Karai Kasang a Tara hta hpaji ninghkrin rai nga ai hkinjawng Ezra a matu shi nanhte kaw hpyi ai arai magup sumhpa hpe Uhprat a Sinna maga nga ai sut dek up hkang ai du ni yawng hpe,

²²law htum gumhpraw pawng 7,500, hkaulan mam dang 750, sabyi ntsin galan 550, tsanlun sau galan 550 hte jum ra ai made lang lata htuk ya na matu ngai hkang da nngai.

²³Nang gaw Sumsing Lamu a Karai Kasang hkang dat ai hte maren, shi a Nawku Htingnu a matu ra ai lam magup hpe sadi sahka hte jaw ya lu na rai ndai; shaloi, shi gaw ngai hte nye a hpang hkaw dung ai ni hpe teng teng galoi mung masin pawt na wu ai n rai.

²⁴Hkinjawng ni, Lewi masha ni, mahkawn mangoi ai ni, sin langa ni, amu galaw masha ni hte ndai Nawku Htingnu hte matut mahkai nga ai kadai kaw na mung ahkun hkanse n lahkawn la lu na rai ndai.

²⁵“Ezra e, nang gaw na a Karai Kasang nang hpe jaw ya sai hpaji byeng-ya lang nna, na a Karai kasang a tara hpe hkan ai, Uhprat a Sinna maga de nga ai masha ni yawng hpe up hkang na du ni hte tara agyi ni hpe san tawn u. Shing rai Tara a lam n chye ai ni kadai hpe mung dai lam nang sharin ya lu na rai ndai.

²⁶Na a Karai Kasang a tara ni hte hkawseng mungdan a tara ni hpe tawt lai ai wa kadai hpe mung sat kau ai, kaga mungdan de shapraw kau ai, shi a sutgan magawn la kau ya ai, hte htawng bang ai ari kalang lata hkrum lu na rai nga ai.”

²⁷Ezra gaw, “Dai MADU anhte a kaji kawa ni a Karai Kasang hpe shakawn mu! Shi gaw Yerusalem na dai MADU a Nawku Htingnu hpe ndai hku nna shagrau sha-a na matu hkawseng wa hpe myit lawm shangun nu ai.

²⁸Karai Kasang a chyeju gawp e, hkawseng wa, shi a hpaji jaw ni, daru magam atsam hte hpring ai du salang ni yawng a man e ngai hpe myi man pa shangun nga sai. Dai MADU nye a Karai Kasang ngai hpe nden marai jaw ya ni ai majaw ngai hte rau nhtang wa na Israela amyu lakung ni a ningbaw law law ni hpe ngai alau la lu nngai.”