Read Jinghpaw Common Language Bible 2009 NEHEMIA 1 Bible Online

NEHEMIA 1 - Jinghpaw Common Language Bible 2009 bible

NEHEMIA 1

¹Da ndai gaw kung kyang ai Hakalia a kasha Nehemia a lam rai nga ai. Hkun ning ngu na Hkesle shata hta, Ngai Nehemia gaw mare daju Susa hta nga nga yang, Artazazi gaw Persi mung a hkawseng rai nga ai.

²Nye a kanau langai rai nga ai Hanani gaw kaga masha hpung mi hte Yuda mung kaw nna du sa ma ai, ngai gaw shanhte hpe Yerusalem a lam hte Babelon mung hta bawng dung hkrum nna bai nhtang wa sai anhte a hpu nau Yuda ni a lam ni hpe san yu nngai.

³Shanhte gaw ngai hpe naw ngam nga ai ni hte bum ga dum nta de nhtang wa nga ai ni gaw ru yak tsin-yam tsindam kaba hkrum ai hte, makau mayang hkan nga ai maigan masha ni mung shanhte hpe yu kaji nga ma ai ngu nna tsun dan ma ai. Shanhte gaw Yerusalem bunghku ni hten run mat ai hte mare chyinghka ni hkru mat sai lam tsun dan ma ai.

⁴Ndai lam yawng hpe ngai na ai shaloi, dung let hkrap nga nngai. Ngai gaw nhtoi tsawmra mi na mat hkra sharung shayawt ai hte lusha n sha nngai. Ngai gaw Karai Kasang hpe,

⁵“MADU Sumsing lamu a Karai Kasang e! Nang gaw galu kaba nga ndai rai nna, anhte nang hpe hkrit kamyin nga ga ai. Nang hpe tsaw ra ai ni hte tawn da ai ga shaka hpe nang sadi sahka hte shatup ya nga ndai; nang gaw hkang da ai ga hte maren galaw ndai.

⁶MADU e, ngai hpe mada yu nna na a shangun ma ni rai nga ai Israela amyu masha ni a matu shani shana ngai hpyi ai nye a akyu hpyi ga hpe na ya e. Anhte Israela amyu masha ni mung nye a kaji kawa ni hte ngai shut kau sai yubak mara ni a matu mung ngai hpyi nem nngai.

⁷Anhte gaw nang hpe n hkru n shawp ai hku shut hpyit kau saga ai, nang hkang da ai amu hpe mung n hkan galaw kau saga ai. Na a shangun ma Mawshe hku nna anhte hpe jaw ya ai tara ni hpe mung anhte n hkan shatup kau saga ai.

⁸Nang Mawshe hpe tsun da sai ga hpe ya dum nga u: ‘Nanhte Israela amyu masha ni ngai hpe n kam n sham myit dai rai yang, ngai nanhte hpe kaga masha amyu ni a lapran de shabra kau na made ai.

⁹Rai ti mung nanhte ngai kaw bai kayin wa nna nanhte hpe ngai hkang da ai amu galaw myit dai rai yang, lamu ga htum de nanhte shabra kau ai hkrum myit ti mung, ngai hpe nawku na matu lata san da ai shara de ngai nanhte hpe bai woi la na nngai.

¹⁰“Madu e, ndai ni gaw na a shangun ma, na a amyu masha majing ni rai ma ai. Nang gaw shanhte hpe na a daru magam n-gun kaba hte na a ja la ai n-gun atsam hte hkye mawai la nga ndai.

¹¹Nye a akyu hpyi ga hte nang hpe shagrau sha-a mayu ai kaga na a shangun ma ni yawng a akyu hpyi ga ni hpe ya jang madat ya mi. Dai ni jang ngai hpe awng dang ai lam jaw ya let hkawseng wa anhte hpe yu matsan dum shangun mi law.” Ngai chyawm gaw dai aten e hkawseng wa a sabyi jau ai wa rai nga nngai.