Read Jinghpaw Common Language Bible 2009 NEHEMIA 11 Bible Online

NEHEMIA 11 - Jinghpaw Common Language Bible 2009 bible

NEHEMIA 11

¹Ningbaw ni gaw Yerusalem hta nga nga ma ai, naw ngam ai amyu masha ni hta na marai shi hta na dinghku langai mi chyoi pra ai Yerusalem de sa nga nga na matu hte naw ngam nga ai ni kaga kahtawng mare ni hkan sa nga na lam hpaida da ma ai.

²Amyu masha ni gaw madu myit hku Yerusalem hta nga ai ni kadai hpe mung shakawn ma ai.

³Kaga mare kahtawng hkan nga ai Israela amyu masha ni, hkinjawng ni, Lewi masha ni, Nawku Htingnu amu galaw ai ni, Shawlumon a shangun ma ni a amyu matu ni chyawm gaw shanhte a sut gan shanhte a mare ni hta nga nga ma ai. Ndai gaw Yuda mungdaw Yerusalem mare hta nga ai woi awn myit su ni a jahpan rai nga ai.

⁴Zehkaria a kashu, Uzia a kasha Ahtaia. Kaga shi a kaji kawa ni rai nga ai Amaria, Shehpatia, Mahalalela, hte Yuda a kasha Peret a amyu matu ni lawm ma ai.

⁵Hkolahoze a kashu, Baruk a kasha Masea, kaga shi a kaji kawa ni ngu na Hazaia, Adaia, Yoiarib, Zehkaria hte Yuda a kasha Shela a amyu matu ni lawm ma ai.

⁶Yerusalem mare hta nga ai Peret amyu matu na laklai atsam rawng ai hpyenla ni gaw 468 hte rai nga ai.

⁷Yoeda a kashu, Meshulam a kasha Salu. Shi a kaga kaji kawa ni ngu na Pedaia, Kolaia, Masea, Ihtiela hte Yeshaia ni lawm ma ai.

⁸Salu hte ni htep ai jinghku yan gaw Gabai hte Salai yan rai nga ai. Yerusalem hta nga ai Benyamin masha ni yawng 928 rai nga ai.

⁹Zihkri a kasha Yoela gaw shanhte a ningbaw rai nna, Hasenua a kasha Yuda gaw dai mare hta lahkawng ngu na aya kaba ai du salang rai nga ai.

¹⁰Yoiarib a kasha Yedaia, hte Yahkin.

¹¹Meshulam a kashu, Hilkia a kasha Seraia. Shi a kaji kawa ni rai nga ai Zadok, Meraiot, Hkinjawng Kaba Ahitub ni lawm nga ai.

¹²Nawku Htingnu hta daw jau amu galaw ai ndai amyu lakung ni yawng 822 rai ma ai. Pelalia a kashu, Yeroham a kasha Adaia. Shi a kaji kawa ni rai nga ai Amzi, Zehkaria, Pashura hte Malhkiya ni lawm nga ai.

¹³Ndai amyu lakung na dinghku ni a ningbaw ni yawng 242 rai ma ai. Azai a kashu, Azarela a kasha, Amasai. Shi a kaji kawa ni hta Meshilemot hte Imera yan lawm nga ai.

¹⁴Ndai amyu lakung hta na laklai atsam rawng ai hpyenla 128 rai ma ai. Shanhte a ningbaw wa gaw dinghku woi awn ai Zabdiela rai nga ai.

¹⁵Azrikam a kashu, Hashut a kasha Shemaia. Shi a kaji kawa ni hta Hashabia hte Buni yan lawm ma ai.

¹⁶Shabehtai hte Yozabad yan gaw dan hkung ai Lewi masha yan rai nna Nawku Htingnu shinggan amu woi hpareng ai yen rai ma ai.

¹⁷Zabdi a kashu, Mihka a kasha Matina gaw Asap amyu matu langai mi rai nga ai. Shi gaw Nawku Htingnu hta akyu hpyi chyeju shakawn ai hpe woi awn nga ai wa rai nga ai. Bakbukia gaw Matania hpe karum ai wa rai nga ai. Gala a kashu, Shamua a kasha Abda gaw Yeduhtun amyu matu langai mi rai nga ai.

¹⁸Chyoi pra ai Yerusalem mare hta nga ai Lewi masha ni yawng 284 rai ma ai.

¹⁹Akub, Talamon hte shanhte a makyin jinghku ni yawng 172 rai ma ai.

²⁰Ngam nga ai Israela masha ni, hkinjawng ni hte Lewi masha ni gaw tinang a sut gan arung arai hte hpawn Yuda mung kaga mare kahtawng ni hkan nga nga ma ai.

²¹Nawku Htingnu amu galaw masha ni mung Yerusalem daw chyen mi na Ohpela mying ai shara hta nga nga ma ai; shanhte gaw Ziha hte Gishpa yan woi awn ai npu hta amu galaw ma ai.

²²Hashabia a kashu, Bani a kasha Uzi gaw Yerusalem mare hta nga ai Lewi masha ni hpe up hkang ai wa rai nga ai. Shi a kaji kawa ni hta Matania hte Mihka lawm nga ai. Shi gaw Nawku Htingnu hta mahkawn mangoi let daw jau lit lu ai Asap amyu lakung hta na rai nga ai.

²³Shani shagu Nawku Htingnu mahkawn mangoi amu woi awn ai hta amyu lakung ni kaning rai amu kayin hprai gun na lam hkawhkam wa hkang da ai tara ni nga nga ai.

²⁴Pehtahia gaw Yuda amyu bawsang, Zera lakung na Meshebela a kasha rai nga ai; shi gaw Israela amyu masha ni a matu Persi tara rung e malai tai nga ai.

²⁵Amyu masha law law hte gaw shanhte a yi sun hkauna ni hte ni ai mare ni hta nga nga ma ai. Yuda amyu bawsang ni mahtang Kiriat Arba, Dibon, Yekabazela mare ni hte dai mare ni a makau na kahtawng ni hkan nga nga ma ai.

²⁶Shanhte gaw Yeshua, Molada, Bethpelet,

²⁷Hazarashuala, Berasheba hte dai mare ni a makau kahtawng ni hkan mung nga nga ma ai.

²⁸Shanhte gaw Ziklag, Mehkona hte de a kahtawng ni hta mung,

²⁹Enrimon, Zoara, Yarmut,

³⁰Zano, Adulam hte dai mare ni hte ni ai kahtawng ni hta nga nga ma ai. Shanhte gaw Lahkisha mare hte de a makau na yi sun ni hta mung, Azeka mare hte de a kahtawng ni hta nga nga ma ai. Yuda amyu masha ni gaw dingda maga Berasheba kaw nna dingdung maga Hinom Kadit du hkra na lapran lamu ga hta nga nga ma ai.

³¹Benyamin amyu bawsang na amyu masha ni gaw Geba, Mikmasha, Ai, Behtela hte makau kahtawng hkan e nga nga ma ai.

³²Bai Anahtot, Noba, Anania,

³³Hazora, Rama, Gitim,

³⁴Hadi, Zeboim, Nebalat,

³⁵Loda, Ono hte Lata Hpaji Chye Ai Ni a Kadit hkan nga nga ma ai.

³⁶Yuda lamu ga hta shanu nga masai Lewi masha hpung nkau mi hpe Benyamin amyu masha ni hte rau nga na matu masat da ya nga ma ai.