Read Jinghpaw Common Language Bible 2009 NEHEMIA 12 Bible Online

NEHEMIA 12 - Jinghpaw Common Language Bible 2009 bible

NEHEMIA 12

¹Ndai gaw Hkinjawng Kaba Yawshu hte Shelatila a kasha Zerubabela hte rau bawng dung hkrum ai kaw nna nhtang wa ai hkinjawng ni hte Lewi masha ni a jahpan rai nga ai.

²Seraia, Yeremia, Ezra, Amaria, Maluk, Hatusha, Shehkania, Rehum, Meremot, Ido, Ginehtoi, Abiya, Miyamin, Madia, Bilga, Shemaia, Yoiarib, Yedaia, Salu, Amok, Hilkia, hte Yedaia ni rai nga ai. Ndai masha ni gaw Yawshu a prat hta shanhte a kahpu kanau hkinjawng ni yawng a ningbaw ni rai ma ai.

⁸Ndai ni gaw chyeju shakawn mahkawn mangoi ai amu hpareng ai ni rai ma ai. Shanhte gaw Yeshua, Binui, Kadmiela, Sherebia, Yuda hte Matania ni rai nga ai.

⁹Bakbukia, Ono, hte shan a kahpu kanau Lewi masha ni gaw gahti galai mahkawn mai ai mahkawn mangoi hpung hpe hpaw da ma ai.

¹⁰Yawshu gaw Yoiakim a kawa, Yoiakim gaw Eliashib a kawa, Eliashib gaw Yoiada a kawa;

¹¹Yoiada gaw Yonahtan a kawa, Yonahtan gaw Yadua a kawa rai nga ai.

¹²Yoiakim Hkinjawng Kaba tai nga yang, ndai hkinjawng ni gaw hkinjawng lakung ni a ningbaw ni rai ma ai. [Hkinjawng] — [Amyu lakung] Meraia — Seraia Hanania — Yeremia Meshulam — Ezra Yehohanan — Amaria Yonahtan — Maluhki Yosep — Shebania Adna — Harim Helkai — Meraiot Zehkaria — Ido Meshulam — Ginehton Zihkri — Abiya … — Miniamin Piltai — Moadia Shamua — Bilga Yehonahtan — Shemaia Matenai — Yoiarib Uzi — Yedaia Kalai — Salai Ebera — Amok Hashabia — Hilkia Nehtanela — Yedaia

²²Ndai Hkinjawng Kaba ni a prat hta Lewi hte hkinjawng dinghku ni a ningbaw ni a lam ka mazing da ai jahpan rai nga ai, dai Hkinjawng Kaba ni gaw Eliashib, Yoiada, Yonahtan, hte Yadua hte rai ma ai. Ndai jahpan hpe Persi mung e Dari hkawseng naw galaw nga yang shangut da nga masai.

²³Lewi dinghku ningbaw ni a lam hpe Eliashib a kashu Yonahtan a prat du hkra, du salang ni a labau gawn laika hta ka matsing da nga ma ai.

²⁴Hashabia, Sherebia, Yeshua, Binui hte Kadmiela ni lam madun matsun ai npu hta taw let, Lewi masha ni hpe hpung hpaw da nga ai. Dai rai nna Karai Kasang a masha, Hkawhkam Dawi jaw da ai sharin matsun ga ni hte maren, aten mi hta hpung lahkawng gaw gahti galai rai Karai Kasang hpe chyeju dum shakawn kungdawn nga ma ai.

²⁵Ndai Matania, Bakbukia, Obadia, Meshulam, Tolmon hte Akub hte gaw Nawku Htingnu sin ai ni rai nga ma ai, dai ni gaw Nawku Htingnu de shang wa ai chyinghka makau na sut gawk ni hpe sin hpareng ai ni rai ma ai.

²⁶Ndai amyu masha ni gaw Yehozadak a kashu, Yawshu a kasha Yoiakim a prat e mung, munggyi Nehemia a prat e mung, Tara sara ninghkrin hkinjawng Ezra a prat e mung nga nga ma ai.

²⁷Yerusalem mare bunghku ap nawng ya ai shaloi, Lewi masha ni nga nga ai shara kaw nna shanhte hpe jashawn la ma ai shaloi shanhte gaw ap nawng ya ai poi hta chyeju dum ai mahkawn mangoi ni hte rau, shup sheng, tingse ni dum let shang lawm lu ma ai.

²⁸Lewi dinghku ni hta na mahkawn mangoi chye ai ni gaw shanhte nga nga ai Yerusalem mare grup yin kaw nna mung, Netohpa mare grup yin kahtawng kaw nna mung,

²⁹Betgilgala, Geba, hte Azmawet mare hkan kaw nna mung sa hpawng nga ma ai.

³⁰Hkinjawng ni hte Lewi masha ni gaw htung hte maren shanhte hkum ni hpe jasan jaseng la nna, amyu masha ni hpe mung, chyinghka ni hpe mung, mare bunghku hpe mung hkan galaw ma ai.

³¹Ngai gaw Yuda ningbaw ni hpe bunghku ntsa e jahpawng tawn nna Karai Kasang a chyeju hpe shakawn let mare grup grup nawt hkawm na hpung kaba lahkawng hpe woi hpareng da shangun nngai. Shawng na hpung mi gaw bunghku ntsa hkra maga hku Maza Chyinghka maga de hkawm sa wa ma ai.

³²Dai mahkawn mangoi chye ai ni a hpang e, Hoshaia hte Yuda ningbaw ka-ang hkup mi hkan nang ma ai.

³³Hkinjawng ni rai nga ai Azaria, Ezra, Meshulam, Yuda, Benyamin, Shemaia hte Yeremia ni pahtau dum let pru sa wa ma ai. Dai hpang Shemaia a kashu, Yonahtan a kasha Zehkaria rai nga ai. (Shi a kaji kawa Matania, Mihkaia hte Zahkura ngu na Asap lakung ni mung lawm nga ai.)

³⁶Shi a hpang e shi a amyu lakung na Shemaia, Azarela, Milalai, Gilalai, Maai, Nehtanela, Yuda, Hanani ngu na yawng hte gaw Karai Kasang a masha Hkawhkam Dawi dum ai madum sumpyi baw lang let hkan nang ma ai. Ndai zawn kanawng hkawm ai hpung hpe Sara kaba Ezra woi awn nga ai.

³⁷Shanhte gaw Hka Hpawk Chyinghka de du ai shaloi, Dawi a Mare de hkrang ai lakang hkan nna shanhte lung wa nhtawm Dawi a hkawhkam htingnu hpe lai kau da ai hte dai mare a sinpraw maga Hka Chyinghka na bunghku de nhtang mat wa ma ai.

³⁸Chyeju dum shakawn ai kaga hpung mi gaw bunghku ntsa, pai maga na lam dingyang de hkawm sa wa ma ai. Ngai hte amyu masha ka-ang hkup hte mung hkan nang ga ai. Anhte gaw Wan Htung Langchyi hpe lai kau da nhtawm Dam Ai Bunghku de hkawm kanawt sa wa ga ai,

³⁹dai kaw nna Ehprim Chyinghka, Yeshana Chyinghka, Nga Chyinghka, Hananela Langchyi hte Latsa Langchyi ni hpe lai kau da nhtawm Sagu Chyinghka de du ga ai. Anhte gaw Nawku Htingnu de sa wa ai Chyinghka makau e hkring nga ga ai.

⁴⁰Dai rai nna, Karai Kasang hpe chyeju shakawn ai hpung lahkawng gaw Nawku Htingnu shara de du dep wa ma ai. Dai hta sha n-ga, ngai hte rau rai nga ai ningbaw ni hte nye a hpung hta lawm nna pahtau dum ai hkinjawng ni gaw,

⁴¹Eliakim, Masea, Miniamin, Mihkaia, Elioenai, Zehkaria, Hanani ni hte arau

⁴²Masea, Shemaia, Eleaza, Uzi, Yehohanan, Malhkiya, Elam hte Ezera hte rai ma ai. Yezrahia gaw mahkawn mangoi chye ai ni hpe woi nna, bunghku ntsa e ja ja mahkawn shakawn nga ma ai.

⁴³Dai shani e, shagu hkungga law law nawng ya ma ai rai nna Karai Kasang gaw shanhte hpe kabu shangun wu ai majaw, amyu masha ni hta kabu gara ai myit hpring nga ai. Numsha ni hte ma kaji ni mung dai poi hta shang lawm nga ma ai rai nna shanhte jahtau ai nsen hpe tsan tsan kaw nna na lu nga ai.

⁴⁴Dai aten hta, Nawku Htingnu a matu jaw ya ai htam shi hta na htam mi, shawng shu la lu ai nsi naisi hte shawng myin ai namsi namsaw ni hpe shaning shagu mahkawng da ai sut gawk ni hpe hpareng na masha ni hpe san da nga ma ai. Ndai masha ni gaw mare shagu a makau mayang hkan na yi sun hkauna nsi naisi hkan lahkawn la ai hte hkinjawng ni hte Lewi masha ni hpe madat da sai Tara hte maren karan jaw na lit lu nga ma ai.

⁴⁵Yuda amyu masha ni yawng mung hkinjawng ni hte Lewi masha ni hpe ra sharawng nga ma ai rai nna, shanhte gaw jasan jaseng ai poi ni hte kaga Karai Kasang hkang da nu ai nawku lai len amu ni hpe galaw ma ai. Nawku Htingnu mahkawn mangoi chye ai ni hte Nawku Htingnu sin ai ni mung Hkawhkam Dawi hte shi a kasha Shawlumon yan hkang da ai tara ni hte maren, shanhte a lit ni hpe gun hpai nga ma ai.

⁴⁶Hkawhkam Dawi aten kaw nna mung, lai sai mahkawn mangoi ninghkrin Asap prat kaw nna mung mahkawn mangoi chye ai ni chyu sha Karai Kasang hpe shakawn kungdawn ai hte chyeju dum shakawn ai mahkawn ni woi awn nga ai.

⁴⁷Zerubabela a aten hta mung, Nehemia a aten hta mung, Israela amyu masha ni yawng gaw Nawku Htingnu mahkawn mangoi ai ni hte Nawku Htingnu sin ai ni hpe shani shagu kumhpa jaw ya let madi shadaw ma ai. Amyu masha ni gaw Lewi masha ni hpe chyoi pra ai hkungga langai jaw ma ai. Lewi masha ni mung hkinjawng ni hpe san da ai hkambum jaw ya ma ai.