Read Jinghpaw Common Language Bible 2009 NEHEMIA 2 Bible Online

NEHEMIA 2 - Jinghpaw Common Language Bible 2009 bible

NEHEMIA 2

¹Shata mali lai ai hpang, lani mi na nhtoi e, Hkawseng Artazazi shana de na lusha sha nga yang, ngai gaw shi hpang de sabyi la sa ya nngai. Shi chyawm gaw shawng de nye a yawn ai myi man hpe galoi mung n mu yu wu ai.

²Dai rai nna, shi gaw, “Nang hpa majaw grai myi man sum nga n ni? Nang machyi nga ndai n rai, dai rai nna nang gaw myit n pyaw ai she rai nga ndai,” ngu nna san wu ai. Ngai gaw kajawng mat ai hte

³“Madu hkawhkam gaw htani htana ahkrung nga u ga law! Nye a kaji kawa ni hpe lup makoi da ai mare hten run mat nna de a mare chyinghka ni hkru mat yang, ngai kaning rai myi man n sum ai nga lu na rai ta?,” ngu nna htan we ai.

⁴Hkawseng wa gaw, “Nang hpa baw ra sharawng n ta?,” ngu nna san wu ai. Ngai gaw sumsing lamu a Karai Kasang kaw akyu hpyi nngai,

⁵dai hpang ngai gaw hkawseng wa hpe, “Madu hkawhkam gaw ngai hpe awng sharawng nna nye a hpyi lajin ai lam hpe jaw ya na myit rawng n yang gaw, Yuda mung, nye a kaji kawa ni hpe lup makoi da ai mare hpe ngai bai de da lu n-ga, ngai hpe sa wa shangun e law,” ngu nna tsun wu ai.

⁶Hkawseng wa hte shi a makau e dung nga ai hkawseng jan gaw nye a hpyi lajin ai ga hpe myit hkrum ya ma ai. Shi gaw ngai hpe ngai kade na hkra wa nga nna, galoi aten hta ngai bai nhtang sa wa na a ta?, nga nna san ai rai nna, dai lam ngai shi hpe tsun dan nngai.

⁷Dai hpang ngai gaw shi a man e myi man pa nga ai rai yang, Uhprat a Sinna maga na mungdaw hpe up ai munggyi ni, Yuda mung du hkra ngai hpe shalai dat shangun na, shanhte hpe matsun dat ai laika ni ngai hpe jaw ya na san we ai.

⁸Ngai gaw hkawhkam wa a maling ni hpe up ai Asap hpang de, Nawku Htingnu sin ai hpyen dap chyinghka ni a matu mung, mare bunghku ni a matu mung, ngai rawng na dum nta a matu mung hpunpyen jaw lu na matu shi hpe matsun dat ai laika langai hpyi we ai. Karai Kasang gaw ngai hte rau nga nga ai majaw dai hkawseng wa mung ngai hpyi ai lam yawng jaw ya nga ai.

⁹Hkawseng wa gaw ngai hte rau hpyen du nkau mi hte gumra jawn ai hpyen hpung mi shangun dat ya ai rai nna, Uhprat a Sinna maga de ngai hkawm sa wa lu nngai. Ngai gaw dai yang e hkawseng wa ya dat ai laika ni, munggyi ni hpe jaw ya nngai.

¹⁰Rai ti mung, Israela amyu masha ni a matu mai kaja ai amu galaw na marai langai mi sa wa sai lam, Bet Horon mare na Sanbalat hte Amon mungdaw a du Tobia yan na ma ai shaloi, shan nachying masin pawt nga ma ai.

¹¹Ya ngai gaw Yerusalem de matut sa nna, masum ya tup nga nga nngai;

¹²Ngai gaw Yerusalem a matu galaw na amu Karai Kasang ngai hpe kaning rai shatsam da sai lam kadai hpe mung n tsun dan nngai. Dai hpang ngai gaw shana yup tung e rawt nna, ngai hte rau nye a manaw manang nkau mi hpe woi nna pru mat wa nngai. Ngai jawn ai lawze hpe chyu sha anhte woi mat wa ga ai.

¹³Ngai gaw shana e naw rai nga yang sinna maga na Kadit Chyinghka lam hku mare kaw nna pru mat wa nhtawm, dingda maga Baren Hka Hpawk hte Maza Chyinghka lam de du hkra lai yu wa nngai. Ngai lai hkawm wa ai shaloi, daw agrawp mat sai mare bunghku ni hte wan hkru mat sai chyinghka ni hpe san jep yu nngai.

¹⁴Dai hpang mare a sinpraw maga, Hka Hpawk Chyinghka hte hkawhkam wa a Hka Lawng nga ai dingdung maga de ngai sa wa nngai. Shaloi ngai jawn nga ai lawze a matu, wut shingyun lai lam kaga n mu tam lu sai,

¹⁵dai rai nna, ngai gaw Kidron Kadit de dingyang jawn yu wa let bunghku hpe mada yu nngai. Dai hpang ngai sa wa sai lam de bai nhtang wa nna Kadit Chyinghka lam hku mare de bai nhtang mat wa nngai.

¹⁶Ninghtawn du salang ni kadai mung ngai kade hkawm kau da let hpa galaw ai lam n chye shajang ma ai. Nye a Yuda kahpu kanau ni rai nga ai hkinjawng ni, ningbaw ni, du salang ni hte magam bungli rau galaw wa na masha kadai ni hpe mung ya du hkra ngai hpa n tsun dan yu nngai.

¹⁷Rai ti mung ya chyawm gaw ngai shanhte hpe, “Yerusalem hten run mat nna de a chyinghka ni hten za mat sai majaw kaning re ai tsin-yam tsindam anhte hkrum sha nga ga ai hpe yu yu mu! Anhte gaw mare hpe bai de da ai hte anhte a sari hpoi hkrum ai amu hpe jahtum kau saga,” ngu nna tsun we ai.

¹⁸Karai Kasang gaw ngai hte rau nga nga nna kaning rai karum la ai lam hpe mung, hkawseng wa ngai hpe kaning nga tsun ai lam mung, shanhte hpe ngai tsun dan we ai. Shanhte gaw, “Bai de da saga law!,” ngu nna tsun htang shajang ma ai. Shing rai shanhte gaw bungli galaw hpang na matu jin jin rai ma ai.

¹⁹Ya anhte galaw sa wa na lam hpe Sanbalat, Tobia hte Geshem mying ai Arab masha langai ni na jang, anhte hpe mani asawng let, “Hpa lam myit lu nna nanhte galaw nga myit ni? Hkawseng wa hpe nanhte gumlau nga myit ni?,” ngu nna tsun mi ai.

²⁰Ngai gaw, “Sumsing lamu a Karai Kasang gaw anhte hpe awng dang ai lam jaw ya na ra ai. Anhte gaw shi a shangun ma ni rai nga ga ai. Ndai gaw gap ai amu hpe anhte galaw hpang wa na saga ai. Rai ti mung nanhte mahtang Yerusalem hta sut gan madu la na ahkaw ahkang n lu myit dai. De a sali wunli kumhtaw hpa mung nanhte lu ai n rai,” ngu nna htan we ai.