Read Jinghpaw Common Language Bible 2009 NEHEMIA 4 Bible Online

NEHEMIA 4 - Jinghpaw Common Language Bible 2009 bible

NEHEMIA 4

¹Anhte Yuda masha ni bunghku bai galaw hpang da lu saga ai lam hpe Sanbalat na wu ai shaloi, shi ja ja masin pawt ai hte anhte hpe asawng asang di hpang nga mi ai.

²Shi gaw shi a manaw manang ni hte Samari hpyen hpung ni hpe, “Ndai matsan mayan re ai Yuda masha ni shanhte galaw nga ai amu hpe hpa baw zawn nawn nga ma ai kun? Shanhte gaw mare bai gaw gap na matu yaw ma ai kun? Shanhte gaw shagu hkungga ni hpe nawng ya let lani jan hta sha galaw shangut lu na zawn myit nawn da nga ma ai kun? Shanhte gaw hkru mat sai nlung shingyun sumpum ni hta na nlung ni hte kaning rai gaw gap lu na rai ma ta?,” ngu nna tsun wu ai.

³Tobia mung dai yang, shi a makau e tsap nga nhtawm, “Shanhte gaw kaning sha san ai bunghku galaw lu na ma ai kun? Chyahkyawn langai e sha ahtu kadawng kau lu ai baw she n rai nga a dawng!,” ngu nna tsun jat ya wu ai.

⁴Ngai gaw, “O Karai Kasang e, anhte hpe asawng asang di mi ai ga madat u! Shanhte a shatan nhkan ga shanhte a baw ntsa e nan hkrat shangun u. Shanhte lu ai arai magup sumhpa kashun kashe ai hkrum nna, maigan mung de bawng rim woi la ai hkrum shangun u.

⁵Shanhte galaw ai n hkru ai amu a matu, mara hkum dat ya et. Shanhte gaw bunghku galaw nga ai anhte hpe n kaw n law di mani ai majaw shanhte a yubak mara ni hpe hkum malap kau et,” ngu nna hpyi se ai.

⁶Dai rai nna anhte gaw bunghku hpe bai matut gaw da ga ai; amyu masha ni mung myit katu ai hte galaw ma ai majaw kade n na yang tsaw de ka-ang hkup ngut wa sai.

⁷Anhte mung Yerusalem mare bunghku gaw ai lam hte waw malawng mat ai bunghku ni hpe bai pat shachyip ai lam hta gaw sharawt da lu saga ai hpe Sanbalat, Tobia yan hte Arab, Amon hte Ashdod masha ni na jang, shanhte masin grai pawt ma ai.

⁸Dai re ai majaw shanhte yawng Yerusalem de sa htim gasat nna kashuk kashak shabyin dat na nga, rau bawng jahkrum masai,

⁹rai ti mung anhte gaw anhte a Karai Kasang kaw akyu hpyi ga ai hte shani shana sin langa masha ni hpe tawn da ga ai.

¹⁰Yuda amyu masha ni gaw shanhte mahkawn ai mahkawn mangoi ga langai lu ma ai: dai gaw, “Anhte gaw lit ni gun hpai nga ga ai majaw n-gun yawm ga ai; Htawm kau na shanut sumpum grai law nga ai. Dai ni, ndai bunghku hpe anhte kaning rai gaw gap lu na ga ta?”

¹¹Anhte a gumlau hpyen ni mung, anhte hpa byin nga sai hpe n mu, n chye nga ai laman, shanhte anhte hpang de sa nna, anhte hpe sat kau nhtawm anhte a amu hpe jahtum kau shangun lu na re zawn myit nawn da ma ai.

¹²Rai ti mung anhte a gumlau hpyen ni a lapran hkan nga nga ai Yuda masha ni gaw aten mi hte aten mi anhte a gumlau hpyen ni anhte hpe ninghkap maw mawn na lam sadi sa jaw shajang ma ai.

¹³Dai rai nna, ngai gaw amyu masha ni hpe nhtu, nri hte ndan ni lang shangun nna, garai n lu ngut ai bunghku shingdu e amyu lakung hku hkan nna san da shangun we ai.

¹⁴Ngai gaw amyu masha ni myit ru myit tsang hkrum nga ma ai hpe mu ai rai nna, shanhte hpe, “Anhte a gumlau hpyen ni hpe hkum hkrit nga myit. Kade sha galu kaba nna hkrit mai nga ai dai MADU hpe dum nga mu; nanhte a kahpu kanau ni, ma kaji ni, madu jan ni hte nanhte a dum nta ni a matu gasat mu,” ngu nna tsun nngai.

¹⁵Anhte a gumlau hpyen ni mahtang shanhte hpaji daw maw mawn nga ma ai amu hpe anhte mu chye kau ya sai lam na mu yang Karai Kasang gaw shanhte a maw mawn ai lam hpe dang kau nu ai lam shanhte dum chye wa ma ai. Dai hpang anhte yawng mung bunghku bai gaw gap ai shara de bai wa ga ai.

¹⁶Dai aten kaw nna, nye a masha ka-ang hkup gaw amu galaw nna, ka-ang hkup mahtang hpyen palawng bu hpun nna nri, ninggang hte ndan ni hpe lang nga ma ai. Anhte a ningbaw ni mung bunghku gaw ai amyu masha ni hpe n-gun tup madi shadaw ya ma ai.

¹⁷Gaw gap arung arai hpai ai ni pyi lata maga mi hte galaw nna, kaga maga hta laknak langai ngai lang da shajang ma ai rai nna,

¹⁸gaw gap amu galaw ai ni langai hte langai, tinang a nshang hta nhtu langai ngai tsat da ma ai. Sadi jaw pahtau dum ai wa mung ngai hte rau nga nga ai.

¹⁹Ngai gaw amyu masha ni hte shanhte a du salang ningbaw ni hpe, “Amu gaw dam lada galu nga ai majaw langai hte langai bunghku ntsa e anhte shada da tsan tsan jahka da nga ga ai.

²⁰Nanhte gaw pahtau dum ai nsen hpe na jang, ngai kaw wa hpawng mi. Anhte a Karai Kasang gaw anhte a matu gasat ya na ra ai,” ngu nna tsun wu ai.

²¹Dai re ai majaw shani shagu nhtoi htoi ai aten kaw nna shana shagan pru ai aten du hkra, anhte hta na ka-ang hkup bunghku ntsa e amu galaw nna, ngam ai ka-ang hkup gaw nri lang let sin nga ma ai.

²²Anhte gaw shana e mare sin nna, shani e mung amu galaw lu hkra dai aten laman hte yang, shanhte hte shanhte hpe karum ai ni hpe Yerusalem mare hta shana e nga nga na lam hpareng ni hpe ngai tsun ni ai.

²³Ngai mung, nye a kanawn manang ni mung, nye a shangun ma mung, ngai kaw hkan nang ai sin langa mung, shana e pyi bu hpun palawng n raw ga ai. Anhte yawng tinang a lata hta laknak lang da nga ga ai.