Read Jinghpaw Common Language Bible 2009 NEHEMIA 5 Bible Online

NEHEMIA 5 - Jinghpaw Common Language Bible 2009 bible

NEHEMIA 5

¹Ya aten ram ram na ai hpang, numsha lasha amyu masha law law hte gaw shanhte a Yuda hpu nau ni hpe aput hpang wa nga ma ai.

²Nkau mi gaw, “Anhte gaw dinghku kaba lu shajang ga ai, anhte asak hkrung nga lu na matu nai mam ra nga ga ai law,” ngu nna tsun ma ai.

³Kaga ni gaw, “Lusha n kyet mat hkra, nai mam alaw alam lu la na matu, tinang a yi sun, sabyi sun ni hte dum nta ni hpe tang kau saga ai,” ngu nna tsun ma ai.

⁴Kaga ni mung, “Anhte a yi sun ni hte sabyi sun ni hte seng ai hkawhkam hkanse bang na matu, gumhpraw hkoi la shajang saga ai.

⁵Anhte gaw anhte a Yuda hpu nau ni hte amyu langai sha rai nga ga ai. Anhte a kashu kasha ni gaw shanhte a kashu kasha ni zawn rai nga ai n rai ni? Rai ti mung anhte gaw anhte a kashu kasha ni hpe mayam shatai kau nga ga ai. Anhte a shayi sha nkau mi hpe pyi, mayam ni zawn dut kau rau saga ai. Anhte a yi sun ni hte sabyi sun ni gaw anhte a lata kaw nna madu la kau hkrum nga saga ai majaw anhte gaw matsan mayan hkrum nga ga ai,” ngu nna naw tsun nga ma ai.

⁶Shanhte a aput angun ai ga hpe ngai na jang, masin pawt nngai rai nna,

⁷dai amu jum na matu myit jahkut da nngai. Ngai mung amyu masha ni a ningbaw ni hte du salang ni hpe, “Nanhte gaw nanhte a kahpu kanau ni hpe dip gamyet sha nga myit hka!,” ngu nna shanhte hpe daru kau nngai. Ngai gaw manghkang dai hpe hpyan ya na matu shawa hpawng hpe shaga la nna,

⁸“Maigan masha ni a lata de dut kau hkrum ai anhte a Yuda kahpu kanau ni hpe anhte dang lu ai made mari shaw la la rai ga ai. Ya chyawm gaw anhte mahtang nanhte a hpu nau majing ni hpe shanhte a hpu nau Yuda ni hpe nanhte a lata de dut kau dat ya na shadut shagyeng nga myit dai!,” ngu nna tsun we ai. Ningbaw ni atsin sha nga nga ma ai rai nna, tsun na hpa mung n mu tam lu ma ai.

⁹Dai hpang ngai gaw, “Nanhte galaw nga myit dai amu gaw shut nga a hka! Nanhte gaw Karai Kasang a ga hpe madat mara nna, jaw ai amu galaw ang myit dai. Anhte hpe mara kata asawng asang di na matu anhte a gumlau hpyen ni hte tara maigan masha ni a lata de n mai ap ya na myit dai.

¹⁰Ngai chyawm gaw amyu masha ni hpe ngai kaw nna gumhpraw hte nai mam hkoi la shangun mawe ai; dai rai nna, nye a manaw manang ni hte nye a matu amu galaw ya ai masha ni mung hkam la lu ma ai. Dai re ai gaw, ya anhte yawng hka hpyi hkat ai amu hpe kau da saga.

¹¹Shanhte nanhte hpe jaw ra ai gumhpraw, nai mam, sabyi hte tsanlun sau re ai hka ni yawng hpe shaprai kau ya ga, shing rai shanhte hpe shanhte a yi sun ni, sabyi sun ni, tsanlun sau ni hte dum nta ni hpe kalang lata bai nhtang ya mu!,” ngu nna tsun we ai.

¹²Ningbaw ni gaw, “Nang tsun ai hte maren, anhte hkan galaw na ga ai. Anhte gaw hka ni hpe n hkan lahkawn la sai sha, sut rai ni hpe nhtang jaw na ga ai,” ngu nna tsun htang ma ai. Shanhte tawn da sai ga sadi hpe shatup na nga hkinjawng ni hpe ngai shaga la ai hte shanhte a man e ningbaw ni hpe dagam shangun se ai.

¹³Dai hpang nye a nshang grup grup hpun da ai palawng galu hpe raw ahpu let, “Nanhte a ga sadi hpe n hkan shatup ai kadai hpe mung ndai zawn Karai Kasang ahpu kau nna, nanhte a dum nta ni hte nanhte madu ai arai magup shagu hte hpe shi dawm la kau nhtawm nanhte hpe kaman tawn kau da na ra ai,” ngu nna ngai tsun ni ai. Dai yang e nga nga ai masha shagu hte gaw, “Amen,” ngu nhtawm dai MADU hpe Amen ngu nna shakawn kungdawn ma ai. Ningbaw ni mung shanhte a ga sadi hpe hkan shatup ma ai.

¹⁴Hkawseng Artazazi hkaw dung ai hkun ning kaw nna sumshi lahkawng ning du hkra, shi lahkawng ning tup, Yuda mung e ngai munggyi tai nga ai shaloi, ngai hte nye a makyin jinghku ni munggyi jarit sha ga ai n rai.

¹⁵Nye a shawng e rung dung ai munggyi shagu gaw amyu masha ni hpe lit li gun shangun ma ai rai nna, lusha hte sabyi ntsin a matu lani mi gumhpraw dengga mali shi shi hpyi la ya ma ai. Shanhte a shangun ma ni du hkra, amyu masha ni hpe dip gamyet sha lai wa masai. Rai ti mung ngai gaw Karai Kasang hpe shagrau sha-a nngai majaw dai hte shai ai hku ngai galaw nngai.

¹⁶Ngai gaw bunghku bai gaw gap ai amu hta nye a n-gun atsam yawng bang nngai ai majaw hpa sut gan mung n hpyi lajin yu nngai. Nye a matu nga nna amu galaw ai masha shagu hte gaw bai gaw gap ai amu hta jawm shang galaw nga ma ai.

¹⁷Kaga grup yin mungdan de na ngai kaw du sa ai masha amyu ni yawng hta kaga, Yuda amyu masha ni hte shanhte a ningbaw ni latsa manga shi hte gaw nye a sha ku hta man man jaw sha nga nngai.

¹⁸Ngai gaw shani shagu dumsu langai, kaja htum ai sagu kru hte u law law hte daw jau nngai; sabyi ntsin jet jet hpe mung 10 ya hta kalang jaw nngai. Rai ti mung amyu masha ni li ai lit ni hpe gun hpai nga ma ai hpe ngai chye nngai majaw munggyi jarit ngai n hpyi nngai.

¹⁹O Karai Kasang e, ndai amyu masha ni hpe ngai galaw ni ai amu a majaw ngai hpe chyeju madun na dum ya e law, ngu nna ngai nang kaw hpyi nem nngai.