Read Jinghpaw Common Language Bible 2009 NEHEMIA 9 Bible Online

NEHEMIA 9 - Jinghpaw Common Language Bible 2009 bible

NEHEMIA 9

¹Dai shata a hkun mali ya shani e, Israela amyu masha ni gaw shanhte galaw shut ai yubak mara ni a majaw yawn hkyen ai hpe madun nna lusha gam na matu hpawng nga ma ai. Dai rai nna shanhte gaw maigan masha ni yawng hte jahka kau ma ai. Shanhte gaw yawn hkyen ai kumla madun na nga, lachyit nba bu hpun nna shanhte a baw ntsa hkan e ga nhpu hte bun ma ai. Dai hpang shanhte hte shanhte a kaji kawa ni shut hpyit kau ai yubak mara ni a matu, shanhte rawt tsap let mara yin la hpang wa ma ai.

³Shanhte gaw dai MADU shanhte a Karai Kasang a Tara hpe nayi hkum masum hti nna, ngam ai nayi hkum masum hta shanhte a yubak mara ni hpe hpyi nem ai hte dai MADU shanhte a Karai Kasang hpe nawku ma ai.

⁴Yeshua, Bani, Kadmiela, Shebania, Buni, Sherebia, Bani hte Hkenani ni gaw Lewi masha ni a matu galaw da ai pinra ntsa e rawt tsap nhtawm dai MADU shanhte a Karai Kasang kaw ja ja akyu hpyi nga ma ai.

⁵Lewi masha ni rai nga ai Yeshua, Kadmiela, Bani, Hashabneia, Sherebia, Hodia, Shebania hte Pehtahia hte gaw nawku na matu saw shaga ma ai. Shanhte gaw ning ngu tsun ma ai: “Rawt tsap let, dai MADU nanhte a Karai Kasang hpe shakawn kungdawn mu; shi hpe htani htana shakawn kungdawn mu! Masha shakawn kungdawn ai gaw n kaba nga ti mung, masha shagu gaw shi a hpung shingkang mying nsang hpe shakawn kungdawn nga mu ga.

⁶Dai hpang Israela amyu masha ni ndai kyu hpyi ga hte hpyi ma ai: “Nang, MADU, nang chyu sha MADU rai nga ndai; nang gaw sumsing lamu ni hte lamu na shagan ni hpe hpan da nga ndai. Nang gaw lamu ga hte panglai hte dai hta rawng marawng ni hpe hpan da nna; dai ni yawng hpe nang asak jaw ya nga ndai. Sumsing lamu na daru magam n-gun atsam ni nang hpe gum dagup ai hte nang hpe nawku ma ai.

⁷MADU Karai Kasang e, nang gaw Abram hpe lata la nna Babelon mung Ura mare na woi shapraw la ndai; nang gaw shi a mying hpe Abraham ngu nna galai ya nit dai.

⁸Shi gaw nang hta sadi dung nga ai hpe nang mu nna, shi hte ga shaka tawn da nga ndai. Nang gaw shi hpe Hkanan masha ni a lamu ga, Hiti hte Amori masha ni a lamu ga, Perizi, Yebusi hte Girgashi masha ni a lamu ga jaw nna, dai mung hta shi a amyu matu ni hpe nga shangun na matu ga sadi jaw nit dai. Nang gaw sadi dung nga ndai majaw, na a ga sadi hpe nang shatup nit dai.

⁹“Anhte a kaji kawa ni Egutu mung hta kaning rai nni nkri hkrum sha ai hpe nang mu ndai; Nawng Hkyeng makau e karum la na matu shanhte a hpyi jahtau ai nsen hpe nang na nit dai.

¹⁰Nang gaw hkawhkam wa hpe mung, shi a du salang ni hte shi a mung masha ni hpe mauhpa lamik kumla ni galaw dan nga ndai, hpa majaw nga yang, shanhte na a amyu masha ni hpe dip gamyet sha nga ma ai hpe nang chye ndai. Nang gaw dai ni du hkra kajai gumhkawng ai hpe naw hkam la lu nga ndai.

¹¹nang gaw na a amyu masha ni a matu panglai hku lai di lam langai hpaw ya ndai, dai hkun hkraw ai ga ntsa hku shanhte hpe lai shangun nga ndai. Shanhte a hpang hkan shachyut ai ni hpe panglai hka laru kata hta nlung langai lup mat ai zawn, shanhte hpe sung ai hka hta lup si shangun ndai.

¹²Nang gaw shani aten hta sumwi hte shanhte hpe lam woi nna, shana e mung shanhte a hkrun lam hpe wan hte jahtoi ya ndai.

¹³Nang gaw sumsing lamu kaw nna Sina Bum de yu sa nhtawm; na a amyu masha ni hpe nang ga shaga ai hte mai kaja ai tara ni hte jaw ai sharin achyin ga ni hpe jaw ya nga ndai.

¹⁴Nang gaw shanhte hpe na a Bansa Nhtoi ni chyoi pra nga na matu sharin ya nit dai, nang gaw na a shangun ma Mawshe hku nna shanhte hpe na a tara ni jaw ya nit dai.

¹⁵“Shanhte kawsi hkrum yang, nang gaw shanhte hpe sumsing lamu na muk, shanhte hpang gara hkrum yang, lunghkrung kaw na hka, jaw nga ndai. Shanhte hpe jaw na ngu nang ga sadi jaw da sai dai mung hpe madu lu na lam nang shanhte hpe tsun nit dai.

¹⁶Rai ti mung anhte a kaji kawa ni gumrawng gumtawng ai hte du ja wa nna, na a hkang da ai ga ni hpe madat na matu ningdang kau ma ai.

¹⁷Shanhte gaw ga n madat ma ai; shanhte gaw nang galaw ai amu yawng mayawng hpe malap kau ma ai; shanhte gaw nang galaw dan sai mauhpa amu ni hpe malap kau manu ai. Shanhte gaw gumrawng ai myit hte mayam tai nga ai Egutu mung de shanhte hpe woi nhtang sa wa na matu ningbaw langai san da ma ai. Rai ti mung nang gaw mara dat ya ai Karai Kasang rai nga ndai; nang gaw chyeju myit rawng nna tsaw ra ai hte hkam sharang lu ai wa rai nga ndai. Na a matsan dum ai myit gaw galu kaba nga nna; nang gaw shanhte hpe kau da nga ai n rai.

¹⁸Shanhte gaw usu kasha langai a hkrang hte hpara sumla galaw nhtawm dai gaw shanhte hpe Egutu mung kaw nna woi wa ai karai rai nga ai nga nna tsun ma hka! MADU e, shanhte nang hpe kade sha n kaw n law di kau ma hka!

¹⁹Rai ti mung na a matsan dum ai myit galu kaba nga ai majaw nang shanhte hpe nam mali hkan e kau da ndai n rai.

²⁰Na a mai kaja ai lam hta, shanhte hpa galaw ang ai lam nang shanhte hpe tsun ndai; nang gaw shanhte hpe manna jaw sha nna, lu hka ntsin jaw ndai.

²¹Nam mali e shaning mali shi ning tup shanhte ra kadawn ai lam yawng hpe nang jaw ndai; shanhte a hpun palawng galoi mung je mat ai n rai, shanhte a lagaw bum machyi nga malu ai n rai.

²²“Nang gaw shanhte hpe masha amyu baw ni hte jarit masat da ya ai shanhte a mungdan ni hpe madu la shangun nga ndai. Shanhte gaw Sihon up ai Heshbon lamu ga hte hkawhkam Oga up ai Bashan mung hpe madu la nga ma ai.

²³Nang gaw shanhte a kashu kasha ni hpe lamu na shagan ni zawn law law jaw nna, shanhte hpe jaw na ngu nna shanhte a kaji kawa ni hpe nang ga sadi jaw da sai mung hpe madu la shangun ai hte nga nga shangun u.

²⁴Shanhte gaw Hkanan mung hpe madu la nna; dai yang e nga nga ai masha ni hpe dang kau nga ndai. Nang gaw na a amyu masha ni hpe masha amyu hte Hkanan masha amyu hpe shanhte ra sharawng ai hku galaw lu na daru magam na a amyu masha ni hpe jaw ya nga ndai.

²⁵Na a amyu masha ni gaw bunghku kum ai mare ni, ga sau rawng ai lamu ga, sut gan hpring hkra rawng ai dum nta ni, htu da chyalu hka htung ni, tsanlun hpun ni, namsi hpun ni, hte sabyi sun ni hpe zing la nga ma ai. Shanhte gaw sha mayu ai mahkra sha ai hte hpum wa ma ai; shanhte gaw nang jaw ya ai mai kaja ai arung arai yawng a majaw kabu gara nga ma ai.

²⁶“Rai ti mung na a amyu masha ni gaw nang hpe gumlau hte na a ga n madat nga ma ai; shanhte gaw na a Tara hpe shingdu dat kau ma ai. Shanhte gaw sadi jaw ai myihtoi ni hpe mung, nang hpang de kayin wa na matu tsun ai ni hpe mung sat kau ma ai. Shanhte gaw nang hpe aten mi hte aten mi n kaw n law di ma ai,

²⁷dai rai nna nang gaw shanhte a gumlau hpyen ni hpe up hkang shangun nga ndai. Shanhte a tsin-yam tsindam a majaw karum la na matu shanhte nang kaw hpyi jahtau ma ai, nang gaw shanhte hpe sumsing lamu kaw na htan ya nga ndai. Na a galu kaba ai matsan dum myit a majaw hpyen ni a lata na hkye mawai la na ningbaw ni hpe nang shangun dat ya ndai.

²⁸Ngwi pyaw sim sa lam bai lu la ai shaloi, shanhte yubak bai galaw ma ai, nang gaw shanhte a gumlau hpyen ni hpe bai awng dang shangun nga ndai. Ti mung shanhte myit malai nna shanhte hpe hkye hkrang la na matu nang kaw hpyi shaga ai shaloi, sumsing lamu hta nang na ya nna, ten mi hte ten mi na a galu kaba ai matsan dum myit hte shanhte hpe hkye mawai la nga ndai.

²⁹Na a sharin shaga ga ni madat na matu shanhte hpe nang sadi jaw nga ndai, rai ti mung shanhte gaw gumrawng gumtawng ai hte na a tara ni hpe mung, na a Tara shatup ai gaw asak lam rai nga ti mung ningdang kau ma ai. Baw ja ai hte du ja nga ai majaw, shanhte n madat n mara ma ai.

³⁰Nang gaw shanhte hpe laning hte laning hkam sharang ai hte shadum jahprang nga ndai. Nang gaw na a myihtoi ni ga shaga na matu wenyi n-gun jaw ya nga ndai, rai ti mung na a amyu masha ni madat ai n rai, dai rai nna nang gaw shanhte hpe kaga amyu ni a lata de ap kau nga ndai.

³¹Ti mung, na a matsan dum ai myit galu kaba nga ai majaw, nang shanhte hpe n kau da, n shamyit kau nga ndai. Nang gaw chyeju hte hpring nna matsan chye dum ai Karai Kasang rai nga a hka!

³²“O Karai Kasang, anhte a Karai Kasang, Nang gaw kade sha galu kaba nga a hka! Kade sha hkrit mai nga a hka! Kade sha daru magam n-gun rawng nga a hka! Nang gaw ga shaka hte seng ai ga sadi ni hpe sadi sahka hte shatup ndai. Asuri hkawhkam ni anhte hpe dip gamyet sha ai aten kaw nna, ya du hkra pyi, anhte nni nkri kade daram hkam sha kau nga saga hka! Anhte a hkawhkam ni, anhte a ningbaw ni, anhte a hkinjawng ni hte myihtoi ni, anhte a kaji kawa ni hte anhte a amyu masha ni yawng nni nkri hkam sha kau nga saga hka! Anhte nni nkri kade daram hkam sha kau saga ai hpe adum nga u law!

³³Nang gaw teng man ai hku anhte hpe ari jaw nit dai; Anhte yubak mara galaw ga tim pyi, nang gaw sadi dung nga ndai.

³⁴Anhte a kaji kawa ni, anhte a hkawhkam ni, ningbaw ni hte hkinjawng ni na a Tara hkan shatup nga ma ai n rai. Shanhte gaw na a hkang da ai ga ni hte shadum jahprang ga ni hpe madat ma ai n rai.

³⁵Na a shaman chyeju a jaw e, hkawhkam ni na a amyu masha ni hpe up ma ai; shanhte sumtsan ga e nga nga ma ai shaloi, nang shanhte hpe ga sau rawng ai lamu ga jaw ndai; rai ti mung shanhte gaw yubak mara kaw na kayin wa na matu hte nang hpe daw jau na matu hprai ma ai.

³⁶Ya chyawm gaw nang anhte hpe jaw da ai lamu ga, anhte hpe lusha jaw ya ai ndai ga sau rawng ai lamu ga hta mayam tai nga saga ai.

³⁷Anhte yubak galaw shut kau saga ai majaw anhte hpe nang up shangun ai hkawhkam ni mahtang mungdan kaw na shapraw ai sut rai lu la nga ma ai. Shanhte gaw anhte hte anhte a yam nga hpung ni hpe shanhte myit ra ai hku galaw ma ai, anhte gaw ja ja yawn hkyen ai hkrum shajang saga hka!”

³⁸Ndai lam yawng mayawng byin lai mat wa sai majaw, anhte Israela masha ni myit hkrum ga shaka langai ka da ga ai, anhte a ningbaw ni, anhte a Lewi masha ni, hte anhte a hkinjawng ni dai hta shanhte a dazik dawk ma ai.