Read Jinghpaw Common Language Bible 2009 ESHTA 1 Bible Online

ESHTA 1 - Jinghpaw Common Language Bible 2009 bible

ESHTA 1

¹Hkawhkam Ahasuru gaw Persi mung a mare daju Susa hta nga ai shi a hkawhkam tingnyang ntsa e hkaw dung let India mung kaw nna Ehtiopi mung du hkra, mungdaw 127 hpe up hkang nga ai.

³Shi hkaw dung ai masum ning hta shi a du salang ni hte up hkang hpareng ni yawng a matu lusha poi langai galaw nga ai. Persi, Medi hpyen hpung ni mung kaga mungdaw munggyi ni hte arawng lu ai du magam ni mung nga nga ma ai.

⁴Shi gaw shi a hkawhkam mungdan ting hte seng ai hkaw wang na sut gan ni hte dai ni a hkik hkam ai lam hte daru magam kaba htum ai arawng sadang ni hpe shata kru ting madun dan wu ai.

⁵Dai hpang, hkawhkam wa gaw mare daju Susa e nga ai matsan lu su n nga, masha yawng a matu lusha poi galaw ya wu ai. Dai poi hpe hkawhkam htingnu a sun wang kata hta sanit ya tup galaw nga ai.

⁶Dai hkaw wang na lung hpraw shadaw hta gumhpraw shanghkawng ni hte shaba pu nsam rawng nna mani tsawm ai sumri ni hte hkang nhtawm lamu tsit nsam hte hpraw ai sumpan ni hte mawn sumli da nga ai. Yup ku ni hpe aja gumhpraw hte galaw nhtawm hpraw ai lunghpraw, hkyeng ai nlung, pale kanu zawn hpraw tu ala ai hte lung mut ni hte nep da ai shara hta tawn da nga ai.

⁷Hkawhkam wa gaw shi lu ai sabyi hpe ntaw ntsang daw ya ai hte maren langai hte langai n bung shajang ai ja gawm ni hta bang nna daw jau ya ai hpe lu shajang nga ma ai.

⁸Hkawhkam wa gaw langai hte langai tinang ra ai made lu lu na lam hkawhkam htingnu kata na shangun ma ni hpe hkang da nu ai rai nna sabyi lu ai hta shadaw shadang hpa mung n nga nga ai.

⁹Dai aten hte yang, hkawhkam jan Washti mung hkawhkam htingnu kata na numsha ni a matu lusha poi galaw ya nga ai.

¹⁰Hkawhkam wa a lusha poi galaw ai sanit ya shani hta, hkawhkam wa sabyi lu nhtawm kabu gara myit pyaw nga ai rai nna shi a shangun ma ni rai nga ai Mehuman, Bizhta, Harabona, Bighta, Abaghta, Zehtara hte Hkarahka ngu ai unuk marai sanit hte hpe shaga jashawn la wu ai.

¹¹Shi gaw shanhte hpe hkawhkam jan Washti hkawhkam janmau gup let shi hpang de jashawn la na matu hkang dat wu ai. Hkawhkam jan gaw ahpraw tsawm ai num rai nna shi a du salang ni hte saw shaga da ai manam ni yawng a man e shi a tsawm htap ai ahpraw hpe madun dan na hkawhkam wa ra sharawng nga ai.

¹²Rai ti mung shangun ma ni hkawhkam wa hkang dat ai ga, hkawhkam jan Washti hpe tsun dan mu yang shi n pru sa hkraw nga ai. Dai lam a majaw hkawhkam wa hpe masin kahtet shangun nga ai.

¹³Ya chyawm gaw hkawhkam wa a htung lai nga ai hte maren, tara hte hkang da ai lam hte seng nna grau nna hpaji chye chyang ai ni hpe san yu na nga, kaning rai galaw ang ai amu a lam hpe chye na ai shi a hpaji jaw masha ni hpe shaga la wu ai.

¹⁴Shi hpe hpaji jaw la na matu grau nna shi kam ging ai ni gaw Hkarashena, Shehta, Admahta, Tarshi, Mare, Marasena hte Memuhkan ni rai nga ai; dai ni gaw Persi hte Medi mung na du salang sanit hte rai nna, mungdan kata hta tsaw htum ai arawng lu ai ni rai ma ai.

¹⁵Shi gaw dai masha ni hpe, “Ngai Hkawhkam Ahasuru nan hkawhkam jan Washti hpang de hkang dat ai ga hte hpawn nye a shangun ma ni hpe shangun dat nngai. Shi chyawm gaw dai ga hpe ningdang kau ya nga ai! Anhte shi hpe kaning rai ahkyak mai la na a ta?,” ngu nna san wu ai.

¹⁶Dai hpang Memuhkan gaw hkawhkam wa hte shi a du salang ni hpe ning ngu nna tsun wu ai: “Hkawhkam jan Washti gaw hkawhkam wa hpe sha n rai, shi a du salang ni hpe mung, kaja wa nan hkawseng up mungdan na masha shagu hte hpe mung n kaw n law di kau nu hka!

¹⁷Hkawseng up ai mungdan hta nga ai numsha shagu gaw hkawhkam jan galaw kau nu ai amu hpe na ai shaloi jang, tinang nang a madu wa ni hpe yu kaji nna n kaw n law di kau hpang na mara ai. Shanhte gaw, ‘Hkawhkam Ahasuru gaw hkawhkam jan Washti shi hpang de pru sa na matu hkang dat tim, shi ningdang kau ya nga ai,’ ngu nna tsun na mara ai.

¹⁸Persi, Medi mung na du salang ni a madu jan ni gaw hkawhkam jan a arawn alai a lam hpe na ai majaw, shanhte gaw dai lam shanhte a madu wa ni hpe dai shani jang hkan tsun hkawm wa na mara ai. Shara shagu nga ai nta madu jan ni mung shanhte a madu wa ni hpe n kaw n law di nhtawm madu wa ni mung tinang a madu jan ni hpe masin shapawt na mara ai.

¹⁹Washti hpe hkawhkam wa a man e galoi mung bai n dawng pru lu nu ga, dai lam hpe Madu hkawhkam ra sharawng ai rai yang, hkawhkam ahkang aya hte ndau dip shabra u; dai gaw galoi mung n galai mat lu u ga, Persi hte Medi a tara ni hta ka da u ga. Dai hpang shi a hkawhkam jan aya hpe grau kaja ai numsha hpe jaw kau na mai nga ai.

²⁰Na a ndau shabra ai lam ndai galu kaba ai hkawseng mungdan ting de chye shangun dat ai shaloi, numsha ni langai hte langai gaw lu su ai rai tim, matsan ai rai tim tinang nang a madu wa ni hpe kaja wa hkungga lara galaw wa na mara ai.

²¹Dai hkawhkam wa hte shi a du salang ni ndai myit jasat sharawng nga ma ai majaw Memuhkan hpaji jaw ai hte maren hkawhkam wa galaw wu ai.

²²Madu wa shagu gaw tinang a dum nta a madu tai nna hpang jahtum ahkang aya hte tsun nga na matu mungdaw langai hte langai tsun ai ga hte dai mungdaw hta ka ai lai masa laika mungga hpe hkawhkam mungdaw shagu de shabra dat wu ai.