Read Jinghpaw Common Language Bible 2009 ESHTA 2 Bible Online

ESHTA 2 - Jinghpaw Common Language Bible 2009 bible

ESHTA 2

¹Hkawhkam wa masin kawp mat ai hpang pyi, Washti galaw kau nu ai amu hte shi hpe ninghkap let tsun shabra kau sai lam hte seng nna shi a myit nga wu ai.

²Shaloi shi hte htep rai nga ai hkawhkam wa a hpaji jaw masha nkau mi gaw, “Nang hpa majaw ahpraw tsawm ai hkawn jet numsha ma nkau mi hpe n tam shangun n ta?

³Nang gaw hkawseng mungdan npu na mungdaw shagu hta nga ai du salang ni hpe san da ai hte mare daju ndai Susa mare na numsha ni a nta de dai ahpraw tsawm ai numsha ma ni yawng hpe woi sa na matu shanhte hpe hkang dat lu nga ndai; shaloi na a numsha ni hpe yu hpareng ai Hegai Unuk a lata de shanhte hpe ap ya u; shing rai shanhte hpe shanhte a tsawm shingni madun dan shangun u.

⁴Dai hpang nang ra sharawng htum ai numsha langai mi hpe la nna, Washti a shara hta shi hpe hkawhkam jan shatai da u,” ngu nna hpaji jaw ma ai. Hkawhkam wa mung dai gaw mai kaja ai hpaji jaw ga rai nga ai ngu myit la ai rai nna dai lam hpe hkan galaw shangun nga ai.

⁵Dai Susa mare hta e Yaira a kasha Mordehkai mying ai Yuda masha langai nga nga ai; Shi gaw Benyamin amyu bawsang hta na Kisha hte Shime a amyu matu langai mi rai nga ai.

⁶Babelon Hkawhkam Nebuhkadneza gaw Yuda Hkawhkam Yehoiahkin hpe Yerusalem mare kaw nna rim la ai bawng masha hpung mi hte rau woi mat wa ai shaloi Mordehkai mung dai hta lawm nang wa nga ai.

⁷Shi hta kasha daw ai Hebre hku Hadasa mying ai Eshta nga nga ai; dai numsha gaw ahpraw nsam tsawm nna hkum shingyan htap nga ai. Kanu kawa si mat ai hpang Mordehkai gaw shi hpe shi a shayi sha majing zawn bau kaba dat wu ai.

⁸Hkawhkam wa shi a mungga nnan htuk shapraw dat wu ai shaloi, numsha law law hte gaw Susa de woi sa ai hkrum nga ma ai. Eshta mung shanhte hta lawm nga ai rai nna numsha ni nga ai nta hpe woi hpareng ai Hegai a lata hta ap ya ai hkrum nhtawm hkawhkam htingnu kata hta shi hpe mung tawn da mu ai.

⁹Hegai gaw Eshta hpe yu sharawng ai rai nna, dai wa a man hta Eshta myi man pa nga ai. Dai rai nna shi gaw aten kachyi mi mung n shama kau ai sha, hkum hpe jasan shatsawm ai hte lusha laksan daw jau shangun let shi a tsawm htap shingni ai hpe shawng chyam yu wu ai. Shi hpe num nta na kaja htum ai shara jaw nhtawm shi hpe daw jau na matu hkawhkam htingnu na laksan lata la ai numsha sanit hte hpe mung san da ya wu ai.

¹⁰Ya chyawm gaw Mordehkai hpaji jaw ai hte maren, shi Yuda masha rai nga ai hpe Eshta n tsun shapraw ai sha ip da wu ai.

¹¹Shi kaning rai nga ai mung, shi hta hpa byin wa na lam hpe chye lu hkra nga, Mordehkai gaw numsha ni a nta ndaw hku htaw de, le de rai shani shagu gahkrang hkawm nga ai.

¹²Numsha ni a matu tinang hkum shatsawm jahtap na aten laning mi nga ai hte maren, mura sau hte anut shatsawm ai shata kru, balsam sau hte shata kru rai nga ai. Dai hpang numsha shagu gaw langai hpang langai Hkawhkam Ahasuru a man de shang sa na rai ma ai.

¹³Shi gaw numsha ni nga ai nta kaw nna hkawhkam htingnu de sa wa ai shaloi, shi ra ai hpun palawng hpa rai tim hpun lu nga ai.

¹⁴Shi gaw shana de e dai de shang sa nna, hpang jahpawt rai jang kaga numsha ni a nta de woi la hkrum nhtawm hkawhkam wa a lashi num ni hpe woi hpareng ai Shagaza unuk bau sin ai npu hta tawn da na rai wu ai. Hkawhkam wa shi hpe yu ra nna shi a mying n shaga dingsa shi gaw hkawhkam wa kaw bai shang lu na wu ai n rai.

¹⁵Kasha zawn yin la sai hte Mordehkai a kanau daw ai Abihala a shayi sha Eshta gaw hkawhkam wa kaw pru sa wa na aten du ai shaloi, Eshta hpe mu mamu ni shi hpe shakawn shagrau nga ma ai. Shing rai shi a aten du jang shi bu hpun na matu numsha ni a nta woi hpareng ai Hegai unuk shi hpe hpaji jaw ai hku sha, shi bu hpun sumraw nga ai.

¹⁶Dai rai nna Hkawhkam Ahasuru hkaw dung ai sanit ning na Tebet ngu ai shata shi hta, Eshta gaw hkawhkam htingnu Hkawhkam Ahasuru hpang de jashawn la ai hkrum wu ai.

¹⁷Dai hkawhkam wa gaw kaga numsha ni kadai hta mung shi hpe grau yu ra nga ai rai nna, kaga ni hta grau nna myi man pa ai hte tsaw ra ai lam hkam la lu nga ai. Hkawhkam wa gaw shi hpe hkawhkam janmau gup ya nhtawm Washti a shara hta shi hpe hkawhkam jan shatai da wu ai.

¹⁸Dai hpang hkawhkam wa gaw Eshta hpe shagrau sha-a ai lusha poi kaba galaw nna shi a du salang ni hte up hkang salang ni yawng hpe saw shaga dat wu ai. Shi gaw hkawseng mungdan ting a matu ban sa ai shani langai mi masat shana ya nna hkawhkam wa a tsaw ra myit hte maren ging dan ai kumhpa ni hpe garan jaw wu ai.

¹⁹Dai aten hte yang, Mordehkai gaw up hkang lu ai arawng aya langai hkawhkam wa e lit jaw da hkrum nga wu ai.

²⁰Eshta a matu chyawm gaw shi Yuda masha rai nga ai hpe n chye shangun wu ai. Shi gaw Mordehkai a bau maka ai npu, ma kaji aten kaw nna shi a ga madat mara nga ai hte maren, ndai lam hta mung shi a ga madat nga ai rai nna, Mordehkai shi hpe tsun da wu ai hte maren, kadai hpe mung n tsun shabrawng wu ai.

²¹Mordehkai gaw hkawhkam htingnu hta rung dung nga ai aten laman, hkawhkam wa a gawk ni de shang wa ai chyinghka lam sin ai unuk lahkawng rai nga ai Bightana yan Tere gaw Hkawhkam Ahasuru hpe hpyen tai nna shi hpe gyam sat na maw mawn ma ai.

²²Dai lam hpe Mordehkai chye wu ai rai nna Hkawhkam jan Eshta hpe tsun dan wu ai; shi mung Mordehkai mu tam da ai lam hkawhkam wa hpe tsun dan wu ai.

²³Dai lam hpe jep yu nna dai shiga teng nga ai hpe mu tam jang, dai masha lahkawng yan hpe masha noi sat ai shara hta noi sat kau ma ai. Hkawhkam wa gaw ndai lam hpe hkawseng mungdan a labau gawn ai laika hta ka matsing da na lam hkang dat wu ai.