Read Jinghpaw Common Language Bible 2009 ESHTA 3 Bible Online

ESHTA 3 - Jinghpaw Common Language Bible 2009 bible

ESHTA 3

¹Ya aten ram ram na jang, Hkawhkam Ahasuru wa gaw Haman mying ai wa hpe hkringmang daju arawng aya hta shagrau shatsaw da wu ai. Haman gaw Agag [1] amyu matu Hamedahta a kasha rai nga ai.

²Hkawhkam wa gaw shi a amu hta amu galaw nga ai du salang ni yawng Haman hpe hput di ai hte shi hpe gum dagup let hkrit hkungga ai lam madun dan na matu hkang da wu ai. Shanhte yawng galaw ma ti mung Mordehkai chyawm gaw n galaw hkraw nga ai.

³Hkawhkam wa hpe daw jau nga ai kaga du salang ni gaw shi hpe hkawhkam wa a hkang da ai ga hpe shi hpa majaw n hkan ai hpe san yu mu ai;

⁴shanhte chyawm gaw lani hte lani san shadut mu ti mung, shanhte a ga hpe n madat ya wu ai. Shi gaw, “Ngai gaw Yuda masha langai mi rai nga nngai, ngai gaw Haman hpe n lu gum dagup lu nngai,” ngu nna tsun shaleng dan wu ai. Dai re ai majaw shanhte gaw ndai lam Haman hpe tsun dan mu ai rai nna Mordehkai galaw ai arawn alai hpe shi yu sharang lu ai rai yang mung dai gaw mauhpa rai na sai.

⁵Mordehkai shi hpe hput di n di, gum mung n gum dagup nga ai hpe shi dum chye wu yang Haman sindawng kahtet nga ai;

⁶Mordehkai gaw Yuda masha langai mi rai nga ai hpe shi chye jang, Mordehkai hpe chyu sha ari jaw ai hta jan nna galaw na matu shi daw dan da wu ai. Persi mungdan ting hta nga ai Yuda amyu masha shagu hte hpe sat sharu kau na shi maw nga ai.

⁷Hkawhkam Ahasuru hkaw dung ai shi lahkawng ning a shawng na shata ngu na Nisan shata hta shi a maw mawn ai amu galaw shapraw dat na jaw hkrak ai nhtoi shata, tam shapraw na matu (“Purim mying ai,”) hpaida da na hkang dat wu ai. Shing rai shata shi lahkawng ngu ai Adara shata shi masum ya shani hpe daw dan shagrin da nga ai.

⁸Dai rai nna Haman gaw hkawhkam wa hpe, “Na a hkawseng mungdan na mungdaw shagu hkan amyu baw langai hkran nga ai hpe mu nngai. Shanhte gaw kaga masha ni kadai hte mung n bung ai htung lailen ni hkan nga ma ai. Dai hta grau nna shanhte gaw hkawseng mungdan na tara ni hpe n madat nga ma ai majaw shanhte hpe yu hkam sharang nna mung nang hta hpa akyu mi n hkam la lu na ndai.

⁹Madu hkawhkam wa e, nang ra sharawng ndai rai yang, shanhte sat kau ai hkrum lu na rai mu ai, ngu nna daw dan ai aming htuk shapraw ya u ga; dai hku nang galaw ndai rai yang, hkawseng mungdan up hkang ai amu a matu hkawseng sut dek hta gumhpraw tan 375 hta n-ga, ngai bang da ya lu na nngai ngu, ngai pahkam hkam nngai,” ngu nna tsun wu ai.

¹⁰Hkawhkam wa ndau shabra ai lam tai na matu dazik dawk shakap yang lang ai shi a lachyawp raw la nna Yuda masha ni a gumlau hpyen rai nga ai Agag amyu matu na Hamedahta a kasha Haman hpe jaw wu ai.

¹¹Hkawhkam wa gaw shi hpe, “Dai amyu masha ni hte shanhte a gumhpraw gaw na a rai nga lit dai; shanhte hpe nang ra ai hku galaw sanu,” ngu nna tsun wu ai.

¹²Dai re ai majaw shawng shata a shi masum ya shani e, Haman gaw hkawhkam wa a amu madu ni hpe shaga la nna ndau shabra laika langai ka let ga amyu shagu hku gale la ai hte ka nna up hkang du ni, munggyi ni hte du salang ni yawng hpang de shabra dat mu ai; dai hpe Hkawhkam Ahasuru a mying hte ka shapraw nna shi a lachyawp hte dazik dawk da nga ai.

¹³Adara shata shi masum ya shani e nan Yuda masha yawng ngu na kaji kaba, ma kaji ni hte numsha ni yawng hpe htau sat sharu kau na matsun ga ni rawng ai ndau laika hpe mungdan a mungdaw shagu de laika sa ai ni la mat wa shajang ma ai. Yuda masha ni gaw matsan dum myit n rawng ai sha sat sharu kau ai hkrum nna shanhte a lanep ni la mat wa ai hkrum na ma ai.

¹⁴Masha shagu mung dai shani du jang shajin da lu mu ga, ndau laika hta rawng ai malawm ni hpe mungdaw shagu na mung shawa ni hpang de shabra dat na rai nga ai.

¹⁵Hkawhkam wa hkang dat ai hte maren dai aming hpe Susa mare daju hta ndau shana ai hpang, shiga sa ai ni mungdaw shagu de dai shiga gun sa mat wa ma ai. Susa mare kashuk kashak kaming kamawng byin hkrum nga yang, hkawhkam wa hte Haman yan chyawm gaw dung let sabyi lu nga ma ai.