Read Jinghpaw Common Language Bible 2009 ESHTA 5 Bible Online

ESHTA 5 - Jinghpaw Common Language Bible 2009 bible

ESHTA 5

¹Eshta gaw shi lusha gam ai masum ya ngu na shani hta hkawhkam hpun palawng ni hpe sumraw la nna, hkawhkam tingnyang gawk hte man chyaw re ai hkawhkam htingnu a kata wang hta tsap nga ai. Shaloi hkawhkam wa gaw shang wa chyinghka lam hte man chyaw na hkawhkam htingnu kata na shi a hkawhkam tingnyang hta dung nga ai.

²Hkawhkam jan Eshta shinggan e tsap nga ai hpe hkawhkam wa mu ai shaloi shi a man e myi man pa nga ai rai nna hkawhkam wa mung shi hpang de ja sumdoi ladawn dat wu ai. Shaloi shi sit sa nna sumdoi matu sa hkra ya wu ai.

³Hkawhkam wa gaw, “Hkawhkam Eshta e, kaning ngu mayu n ta? Nang hpa ra ai lam ngai hpe tsun dan rit, nye a mungdan chyen mi hpe pyi nang lu la lu na rai ndai,” ngu nna san wu ai.

⁴Eshta chyawm gaw, “Madu hkawhkam e, nang ra sharawng ndai rai yang gaw nye a manam hku nang hte Haman dai na e ngai nan a matu lajang da ai lusha poi de sa wa na ngai ra sharawng nngai,” ngu nna tsun htang wu ai.

⁵Shaloi hkawhkam wa gaw Eshta a manam tai lu hkra nga, Haman hpe tin tin sa wa na matu hkang dat wu ai. Dai rai nna hkawhkam wa hte Haman yan mung Eshta a lusha poi de sa wa ma ai.

⁶Ya hkawhkam wa poi sabyi lu ngut jang, shi hpe, “Nang hpa ra ai lam ngai hpe tsun dan rit; dai hpe nang hkam la lu na rai ndai. Nye a mungdan chyen mi hpe pyi nang hpyi ai rai yang, nang hpyi ai hte maren ngai jaw na de ai,” ngu nna san wu ai.

⁷Eshta gaw, “Madu hkawhkam rai nna nye a hpyi lajin ai ga hpe matsan yu dum ai rai yang, na a matu hkyen da na kaga lusha poi hta nye a manam hku hpawt ni na aten hta nang hte Haman sa ya na hpe ra sharawng nngai. Shaloi mahtang ngai hpa ra ai lam nang hpe tsun dan na nngai,” ngu nna tsun htang wu ai.

⁹Haman gaw lusha poi kaw nna pru wa wu yang, shi gaw kabu gara nga ai rai nna mai kaja ai myit nsam madun dan nga ai. Rai ti mung hkawhkam htingnu chyinghka lam e nga nga ai Mordehkai gaw shi lai wa yang rawt mung n rawt, hkungga ai lam hpa mung n madun dan nga ai hpe shi mu jang, Haman gaw shi hpe grai pawt bu nga ai.

¹⁰Rai ti mung shi hkum shi masin dip kau let nta de wa mat wa wu ai. Dai hpang shi a manaw manang ni hpe shi a nta de saw shaga la nga ai; shi a madu jan Zeresha mung shanhte hte rau shang lawm na matu shaga da nga ai.

¹¹Shi gaw shanhte hpe shi gade sut su nga ai lam hpe mung, shi lu ai shadang sha ni gade daram law nga ma ai hpe mung, hkawhkam wa shi hpe gade wa shagrau shatsaw da sai lam hpe mung, kaga hkawhkam wa a du salang ni hta shi hpe gade daram ahkyak tawn ai lam hpe mung tsun shakawng dan wu ai.

¹²Haman gaw, “Dai hta grau nna hkawhkam jan Eshta pyi kadai hpe mung n hkyen ya ai lusha poi hkawhkam wa hte ngai hpe lajang jaw nga ai. Hpawt ni mung nhtang sa wa na an saw shaga da hkrum nga ga ai.

¹³Rai ti mung Yuda masha Mordehkai gaw hkawhkam htingnu chyinghka lam hta dung nga ai hpe ngai mu nga dingsa, ndai lam langai mi mung nye a matu lachyum pru na n rai nga ai,” ngu nna tsun wu ai.

¹⁴Dai rai nna shi a madu jan hte shi a manaw manang ni yawng gaw, “Nang hpa majaw pe 75 tsaw ai masha noi sat shara hpe n galaw da n ta? Hpawt de dai hta Mordehkai hpe noi sat kau lu hkra, hkawhkam wa hpe nang ahkang hpyi lu na rai ndai; shaloi nang gaw lusha poi de kabu gara sa wa lu na rai ndai,” ngu nna hpaji jaw mu ai. Haman mung dai gaw mai kaja ai myit jasat rai nga sai nga nna myit nawn la nhtawm masha noi sat ai shara galaw tawn da wu ai.