Read Jinghpaw Common Language Bible 2009 ESHTA 7 Bible Online

ESHTA 7 - Jinghpaw Common Language Bible 2009 bible

ESHTA 7

¹Dai rai nna hkawhkam wa hte Haman yan gaw Eshta hte rau,

²lahkawng lang ngu na rau lu rau sha nga ma ai. Sabyi lu poi ngut jang, hkawhkam wa gaw Eshta hpe, “Hkawhkam jan Eshta e, ya nang hpa ra n ta? Dai hpe nang hkam la lu na rai nga ndai majaw ngai hpe tsun dan rit. Mungdan chyen mi hpe pyi nang hpe ngai jaw ya lu na nngai,” ngu nna bai tsun wu ai.

³Hkawhkam jan Eshta chyawm gaw, “Grit nem let nye a hpyi lajin ai ga hpe nye a madu hkawhkam jaw ya na sharawng awng nga ai rai yang, ngai hte nye a amyu masha ni hkrung nga lu na gaw nye a myit ra sharawng ai lam rai nga li ai.

⁴Nye a amyu masha ni hte ngai gaw sat shamyit kau hkrum na matu, dut kau ai hkrum nga saga ai. Mayam tai na matu dut kau hkrum ai hta hpa mung grau n sawng ai rai yang, ngai atsin sha nga nna dai hte seng ai lam nang hpe n sharu shatsang na nngai; rai ti mung anhte gaw shamyit kau hkrum na matu ri ri sha rai nga saga ai-atsai awai sat shagrawm kau hkrum na saga ai!,” ngu nna htan wu ai.

⁵Dai hpang Hkawhkam Ahasuru gaw hkawhkam jan Eshta hpe, “Ndai zawn re ai amu galaw gwi ai gaw kadai wa rai ta? Dai wa kanang e nga nga a ta?,” ngu nna san wu ai.

⁶Eshta gaw, “Anhte a gumlau hpyen, anhte hpe zingri ai wa gaw ndai n hkru ai Haman nan rai nga ai,” ngu nna htan wu ai. Shaloi Haman gaw hkawhkam wa hpe azi yu let hkawhkam jan a man e hkrit gari nga ai.

⁷Hkawhkam wa mung masin pawt ai hte rawt tsap nhtawm gawk kaw nna pru mat wa ai hte hkawhkam htingnu sun de shang mat wa wu ai. Haman gaw ndai lam a majaw shi hpe ari jaw na daw dan nga sai hpe shi mu lu nu ai rai nna shi a asak a matu hkawhkam jan Eshta hpe hpyi nem na nga, shingdu e hti ngam nga la nga ai.

⁸Hkawhkam wa sun kaw nna gawk de bai nhtang shang wa yang, shi gaw Eshta a yup ku ntsa e gum dagup let matsan dum la na matu hpyi nem nga ai hpe wa mu nna, hkawhkam wa gaw, “Ndai wa gaw nye a hkawhkam htingnu kata nye a man ndai yang e nan hkawhkam jan hpe roi na hkyen nga a hka i?,” ngu nna jahtau tsun wu ai. Hkawhkam wa ga naw shaga nga yang pyi unuk ni Haman a baw hpe sa magap da rau nga masai.

⁹Dai hpang shanhte hta na Harbona mying ai wa gaw, “Madu hkawhkam a asak hpe hkye la yu sai Mordehkai hpe noi sat kau lu hkra nga, shi a nta e masha sat shara langai galaw da nga ai rai nna dai gaw pe 75 tsaw nga ai,” ngu nna tsun dan wu ai. Shing rai hkawhkam wa gaw, “Dai hta e Haman hpe noi sat kau mu!,” ngu nna hkang dat wu ai.

¹⁰Dai re ai majaw Mordehkai a matu Haman galaw da ai masha sat shara hta noi sat kau hkrum nga wu ai. Shaloi hkawhkam wa a masin kahtet ai gaw kawp mat wu ai.