Read Jinghpaw Common Language Bible 2009 ESHTA 8 Bible Online

ESHTA 8 - Jinghpaw Common Language Bible 2009 bible

ESHTA 8

¹Dai shani jang, Hkawhkam Ahasuru gaw Yuda masha ni a gumlau hpyen Haman a sut gan yawng hkawhkam jan Eshta a lata de ap ya kau wu ai. Eshta gaw Mordehkai shi hte amyu daw hkat ai lam hkawhkam wa hpe tsun dan wu ai; Mordehkai gaw dai shani kaw nna hkawhkam wa a man de shang lu na ahkang lu wu ai.

²Hkawhkam wa mung shi a dazik dawk shakap da ai lachyawp hpe raw la nna (Haman kaw na bai la ai) Mordehkai hpe jaw ya wu ai. Eshta mung Mordehkai hpe Haman a sut gan hpareng ya na matu san tawn wu ai.

³Shaloi Eshta gaw hkawhkam wa hpe bai shaga na nga, shi a lagaw nhpang e gum dagup let hkrap nga wu ai. Yuda masha ni hpe hkap daw na nga, Agag amyu matu na Haman a n hkru ai maw mawn lam hpe jahkring kau na matu shi hpe hpyi nem wu ai.

⁴Hkawhkam wa mung ja sumdoi Eshta hpang de ladawn dat wu ai rai nna shi rawt tsap let,

⁵“Nye a madu hkawhkam awng sharawng ai hte ngai hpe myit manoi nna na a matu jaw hkrak ai zawn myit nawn la n yang gaw hkawseng mungdan hta nga ai Yuda masha ni yawng hpe sat shagrawm kau na matu Agag amyu matu na Hamedahta a kasha Haman a hkang da ai ga hkan galaw na matu matsun dat ai lam hpe hkan shabai na matu ndau laika hpe chyeju hte ka shapraw ya e.

⁶Nye a amyu masha ni a ntsa e du na ndai ru yak tsin-yam tsindam hpe mung, nye a jinghku kahpu kanau ni sat kau hkrum na hpe mung, ngai kaning rai hkam jan lu na rai nga a ta?,” ngu nna tsun wu ai.

⁷Hkawhkam Ahasuru gaw hkawhkam jan Eshta hte Yuda masha Mordehkai yan hpe, “Yu mu! Yuda masha ni hpe sat kau na maw mawn ai majaw Haman hpe ngai noi sat kau se ai. Eshta hpe mung shi a sut gan ngai ap ya se ai.

⁸Rai ti mung, hkawhkam wa a mying gang let hkawhkam wa a dazik hte dawk shakap sai ndau laika hpe dawm la kau lu sai n rai; hpa mi rai tim, nan ra sharawng ai hpa lam mi rai rai, Yuda masha ni hpang de ka mai nga myit dai. Nye a mying gang let nan laika ka nhtawm hkawhkam dazik hte dai hpe dawk mai nga myit dai,” ngu nna tsun wu ai.

⁹Ndai lam gaw shata masum ngu na Siwan shata hkun masum ya shani e byin nga sai. Mordehkai gaw hkawhkam wa a amu madu ni hpe shaga la nhtawm laika ni ka la ai hte India mungdan kaw nna Hkusha mung du hkra rai nga ai mungdaw latsa e hkun sanit hta de nga ai Yuda masha ni, munggyi ni, up hkang ai ni hte du salang ni yawng hpang de, mungdaw langai hte langai tinang a ga hte laika ka ai hku Yuda masha ni hpang de mung, shanhte shaga ai ga hte laika ka ai hku hkan nna shabra dat ma ai.

¹⁰Mordehkai gaw Hkawhkam Ahasuru a mying gang nna laika ni hpe ka nhtawm hkawhkam dazik hte dawk la nna hkawhkam gumra lawng na kagat laram ai gumra ni hta jawn ai ni a lata hta laika shagun dat wu ai.

¹¹Ndai laika ni gaw mare shagu hta nga ai Yuda masha ni gaw tinang hkum hpe makawp maga ai hku hpyen bai nhtang gasat na matu shaga jahpawng da ra nga ai ngu sanglang da nga ai.

¹²Mungdaw langai ngai kaw na laknak hpai ai kaga amyu masha ni mahtang ma kaji ni, numsha ni hte Yuda lasha ni hpe htim gasat ai rai yang, Yuda masha ni bai hkap gasat lu nna htim gasat ai ni hpe atsai awai sat shagrawm kau nhtawm shanhte a sut rai ni hpe madu la lu na rai nga ai.

¹³Dai shani du jang, Yuda masha ni shanhte a gumlau hpyen ni hpe matai dawp la lu hkra nga, mungdaw shagu de nga nga ai masha shagu hpang de ndai tara laika hpe ndau shabra nna chye na shangun ai lam rai nga ai.

¹⁴Hkawhkam wa a hkang da ai ga hte maren, gumra jawn ai ni gaw hkawhkam hte seng ai gumra ni hta jawn let nachying shachyang nna pru mat wa ma ai. Dai aming gaw mare daju Susa hta mung shana shabra nga ai.

¹⁵Mordehkai gaw amut, ahpraw nsan ai hkawhkam palawng galu bu hpun nna shaba pu nsam rawng ai mani ai lachyit nba lawai let, hkik hkam ai ja janmau gup nhtawm hkawhkam htingnu kaw nna pru wa wu ai. Susa mare nmaw lam hkan nna kabu gara ai hte jahtau garu nga ma ai.

¹⁶Yuda masha ni a matu chyawm gaw kabu gara ai, hkyamsa lam, kabu gara sharawng awng ai hte awng padang hkrai rai nga ai.

¹⁷Hkawhkam wa a ndau shabra laika hti shana dan ai mungdaw shagu hte mare shagu hta bansa ai shani lusha poi galaw let kabu gara awng sharawng nga ma ai. Kaga mung masha law law hte mung shanhte hpe hkrit nga ma ai majaw Yuda masha tai wa nga masai.