Read Jinghpaw Common Language Bible 2009 ESHTA 9 Bible Online

ESHTA 9 - Jinghpaw Common Language Bible 2009 bible

ESHTA 9

¹Hkawhkam wa ndau shabra dat ai nhtoi ngu ai Adara shata shi masum ya shani hta, Yuda masha ni a gumlau hpyen ni gaw shanhte a daru magam n-gun hte ka-up dang la na myit mada nga ma ai. Rai ti mung shing rai lu na malai, Yuda masha ni mahtang shanhte hpe padang dip la lu nga ma ai.

²Hkawseng mungdan kata na Yuda ni nga ai mare shagu hta, shanhte hpe machyi hkra shangun nga ai kadai hpe mung hkap gasat lu na matu Yuda masha ni nan hpawng shinggyin nga ma ai. Shara shagu hkan na mung masha ni shanhte hpe hkrit nga ma ai rai nna kadai mung shanhte hpe n rawt gumlau gwi nga ma ai.

³Shanhte yawng gaw Mordehkai hpe hkrit nga ma ai majaw mungdaw hte seng ai du salang ni, munggyi ni, up hkang ai ni hte hkawhkam wa a dat kasa ni yawng Yuda masha ni hpe karum nga ma ai.

⁴Mordehkai gaw hkawhkam htingnu hta daru magam n-gun rawng wa ai hte grau grau nna jat kaba wa nga ai gaw hkawseng mungdan ting hta kajai gumhkawng nga sai.

⁵Dai rai nna Yuda masha ni gaw shanhte a gumlau hpyen ni hpe shanhte galaw mayu ai hku galaw lu nga ma ai. Shanhte gaw nhtu ni lang let htim gasat nhtawm shanhte hpe sat sharu kau mu ai.

⁶Susa mare daju e nan dai Yuda masha ni lasha manga tsa hte hpe sat kau ma ai.

⁷Shanhte hta Yuda masha ni a hpyen Hamedahta a kasha Haman a shadang sha shi rai nga ai, Parshandahta, Dalahpon, Aspahta, Porahta, Adalia, Aridahta, Parmashahta, Arisai, Aridai hte Waizahta ni lawm nga ma ai. Rai ti mung lanep arai hpa mung n lawm nga ai.

¹¹Dai shani e Susa mare hta sat kau hkrum ai masha law law a jahpan hpe hkawhkam wa hpang de sa madun ma ai.

¹²Shaloi shi gaw hkawhkam jan Eshta hpe, “Susa mare hta sha Yuda masha ni masha manga tsa hte hpawn Haman a shadang sha shi hte hpe sat kau nga ma ai. Dai rai yang kaga mungdaw ni hkan shanhte hpa mi naw galaw kau nga manu ai kun? Ya nang hpa ra n ta? Nang hkam la lu na ndai. Kaga nang naw ra ai lam ngai hpe tsun dan rit, dai hpe nang hkam la lu na rai ndai,” ngu nna tsun wu ai.

¹³Eshta gaw, “Nye a madu hkawhkam wa e, nang awng sharawng ai rai n yang gaw, dai ni e shanhte hpe galaw na ahkang jaw ai hte maren hpawt ni e mung ndai Susa mare hta Yuda masha ni hpe bai galaw shangun u. Dai gaw Haman a shadang sha shi a moi mang ni hpe masha sat ai shara kaw noi da na lam hkang dat u,” ngu nna htan wu ai.

¹⁴Dai lam galaw na matu hkawhkam wa hkang dat ai hte Susa mare hta ndau laika shapraw nhtawm Haman a shadang sha shi a moi mang ni hpe shawa man e madun da nga ma ai.

¹⁵Susa mare hta nga ai Yuda masha ni gaw Adara shata shi mali ya shani e, bai zuphpawng nna dai mare kata na lasha masum tsa jan hpe sat kau mu ai. Rai ti mung shanhte gaw lanep arai hpa mung n hta la nga ma ai.

¹⁶Mungdaw ni hkan nga ai Yuda masha ni mung shanhte hkum hpe makawp maga let hpawng de nga ma ai. Shanhte n dawng n yawt ai masha mun sanit hkying manga hte hpe sat kau nhtawm shanhte a gumlau hpyen ni hpe sat kau nna shanhte a gumlau hpyen ni hpe yeng seng kau ma ai. Rai ti mung shanhte gaw lanep hpa mung n hta la nga ma ai.

¹⁷Dai gaw Adara shata shi masum ya shani hta byin ai lam rai nga ai. Shing rai hpang shani ngu na shi mali ya shani hta shanhte hpa mung n sat ai sha, kabu gara ai lusha poi sha ai shani shatai da nga ma ai.

¹⁸Susa mare na Yuda masha ni chyawm gaw shi masum ya hte shi mali ya hta zuphpawng nga nna, dai shata shi manga ya e bansa nga ai hte dai shani hta lusha poi hpe kabu gara galaw ma ai.

¹⁹Dai re ai majaw kahtawng kaji hkan nga ai Yuda masha ni gaw Adara shata shi mali ya shani hpe kabu gara ai bansa shani shatai nhtawm lusha poi galaw nna langai hte langai kumhpa ni karan jaw hkat nga ma ai.

²⁰Mordehkai gaw ndai lam ni hpe ka nhtawm Persi hkawseng mungdan ting na ni ai tsan ai shara shagu hkan nga ai Yuda masha ni yawng hpang de laika ni shagun dat nhtawm,

²¹shaning shagu Adara shata shi mali ya hte shi manga ya shani hta masat poi galaw na lam shanhte hpe tsun dan wu ai.

²²Dai gaw Yuda masha ni shanhte nan shanhte a gumlau hpyen ni hpe yeng seng kau ai shani rai nga ai majaw myit htum yawn hkyen ai kaw nna kabu gara myit pyaw ai de kayin wa ai shata rai nga ai; shanhte gaw dai shani ni hta lusha poi ni hpe mung, shada hku hkau ka manawt lusha ai lam hpe mung galaw let langai hte langai lusha kumhpa karan nna matsan mayan ni hpe gam jaw gam ya na lam hkan galaw na tsun da hkrum nga ma ai.

²³Dai re ai majaw Yuda masha ni mung Mordehkai a matsun madun ai ga hta hkan galaw nga ma ai majaw dai poi gaw shaning shagu galaw ra ai htung tai wa sai.

²⁴Yuda masha ni a hpyen, Agag amyu matu Hamedahta a kasha Haman gaw Yuda masha ni hpe shamyit kau na hte shanhte hpe atsai awai shagrawm kau na maw mawn ai nhtoi hpe daw dan ya na matu (Shanhte shamying ai ga “Purim”) hpaida da wu ai.

²⁵Rai ti mung Eshta gaw hkawhkam wa kaw shang nna hkawhkam wa ndau laika ka shapraw dat ai majaw Yuda masha ni a matu shi lajang maw mawn kau nu ai gam maka a nni nkri hpe Haman hkam sha nu ai; shi hte shi a shadang sha ni masha sat shara hta noi da ai hkrum nga masai.

²⁶Mordehkai a laika a majaw mung, shanhte hta byin hkrum hkra ai lam yawng a majaw mung dai bansa ai nhtoi ni hpe Purim ngu nna shamying da nga ma ai.

²⁷Yuda masha ni gaw dai hpe shanhte a matu tara langai shatai nhtawm shanhte a amyu matu ni hte Yuda masha langai tai wa ai ni kadai mung Mordehkai tsun matsun ai hte maren shaning shagu ndai nhtoi lahkawng ya na htap htuk ai aten hta tut nawng agalaw nga na lam rai nga ai.

²⁸Dai gaw daw dan da sai lam rai nga sai hte maren, mungdaw shagu, mare shagu hta du wa na ban prat shagu na pra sa wa na Yuda dinghku shagu hte gaw ndai lam hpe adum nga nna prat mi hte prat mi Purim nhtoi ni hpe hkan galaw na rai nga ai.

²⁹Dai hpang Abihala a shayi sha hkawhkam jan Eshta gaw Mordehkai hte rau Purim hte seng ai ndai 2 lang ngu na laika shagrin na matu Eshta a ahkaw ahkang kaba hte ka dat mu ai.

³⁰Dai laika hpe Yuda masha ni yawng hpang de hkringdat jaw nhtawm kanan ni hpe Persi hkawseng mungdan a mungdaw 127 de shagun ya nga ai. Dai gaw Yuda masha ni hpang de ngwi pyaw sim sa lam hte shim lum lam rawng nga ai hpe shakram dat nna,

³¹yawn hkyen ai aten hte lusha gam ai aten hpe hkan sa na matu htung tara hpe shanhte galaw lai wa sai hte maren, shanhte a amyu matu ni hpe htap htuk ai aten hta Purim poi hkan galaw na shanhte hpe matsun madun da nga ai. Dai lam hpe Mordehkai hte hkawhkam jan Eshta yan hkang da nga ai.

³²Eshta a hkang da ai ga hpe mung, Purim poi a matu shagrin da ai tara ni hpe mung laika shabawn hta ka da nga ai.