Read Jinghpaw Common Language Bible 2009 PRU MAT WA AI 1 Bible Online

PRU MAT WA AI 1 - Jinghpaw Common Language Bible 2009 bible

PRU MAT WA AI 1

¹Yaku hte rau Egutu mung de du sa ai shi a shadang sha ni hte tinang a dinghku hte hpawn du sa ai ni gaw,

²Rubin, Simun, Lewi, Yuda,

³Yisahka, Zebulun, Benyamin,

⁴Dan, Naphtali, Gad, hte Ashe ni rai ma ai.

⁵Yaku a nshang kaw na hkrat ai ndai amyu masha ni yawng gaw marai sanit shi hte rai ma ai. Shi a shadang sha Yosep mahtang Egutu mung e sa nga magang nga sai.

⁶Yosep a aten hta shi a kahpu kanau ni hte dai ban na masha nlang ni yawng si mat masai;

⁷rai ti mung Israela amyu matu ni yawng hta kashu kasha law law mayat maya wa nna law htam wa ai hte n-gun ja wa nhtawm Egutu mung e hpring wa nga masai.

⁸Dai hpang Yosep a lam hpa mung n chye ai hkawhkam ningnan langai mi Egutu mung hta paw pru wa sai.

⁹Dai wa gaw shi a mung masha ni hpe, “Ndai Israela amyu masha ni gaw grai law htam wa nna n-gun ja nga ma ai majaw shanhte gaw anhte a matu hkrit tsang shara tai nga masai.

¹⁰Majan byin wa ai rai yang, shanhte gaw anhte hpe gasat na matu anhte a gumlau hpyen ni hte matut wa nna ndai mungdan kaw nna mung hprawng lawt lu na mara ai. Shanhte grau n law jat wa lu mu ga, shanhte hpe hkum shingdang lu na hpaji zai ladat tam ga,” ngu nna tsun wu ai.

¹¹Dai rai nna Egutu masha ni gaw shanhte a ntsa e mayam hkang ai ni hpe san tawn nna laja lana re ai amu bungli hte shanhte a myit ni hpe shadaw kau ya ma ai. Israela amyu masha ni gaw hkawhkam wa a matu arung arai tawn da na ginra daju ni hpe Hpihtum hte Ramese mare ni hta gap da ma ai.

¹²Rai ti mung Egutu masha ni Israela amyu masha ni hpe grau dip gamyet da magang, shanhte grau nna law jat wa ai hte mungdan ting de chyam bra wa ma ai. Dai Egutu masha ni gaw Israela masha ni hpe hkrit kajawng nga ma ai majaw,

¹³mazut ai mayam bungli de shanhte hpe nhtum nni di shangun let shanhte a asak hkrun lam ni hpe myit htum myit chyum shangun da ma ai. Dai ni gaw shanhte hpe shanhte a nta gaw gap masing ni hte shanhte a hkauna ni hta bungli galaw shangun ma ai; Shanhte gaw matsan n chye dum nga ma ai.

¹⁵Dai hpang Egutu hkawhkam wa gaw Hebre numsha ni hpe shangai karum rum re ai Shipra hte Hpua mying ai shangai karum num yan hpe ga shaga wu ai.

¹⁶Shi gaw dai yan hpe, “Nan Hebre numsha ni hpe ma shangai karum myit dai shaloi, lasha rai yang dai ma hpe sat kau mu; rai ti mung numsha rai yang chyawm gaw jahkrung da mu,” ngu nna hkang da wu ai.

¹⁷Rai ti mung shangai karum ai yan mahtang Karai Kasang hpe hkrit hkungga ai yan rai nna hkawhkam wa a hkang da ai ga hpe n madat ai sha, shing rai hkan galaw na malai, shan gaw lasha ni hpe jahkrung da ya nga ma ai.

¹⁸Dai rai nna hkawhkam wa gaw dai shangai karum ai yan hpe shaga la nna, “Nan hpa rai dai zawn galaw myit ta? Hpa majaw lasha ni hpe jahkrung da nga myit ni?,” ngu nna shan hpe san wu ai.

¹⁹Shan chyawm gaw, “Dai Hebre numsha ni mahtang Egutu numsha ni zawn n rai ma ai. Shanhte gaw aloi loi sha shangai lu ma ai rai nna, an langai ngai garai n du yang ma ni hpe shangai kau kau di ma ai,” ngu nna htan ma ai.

²⁰Shangai karum ai yan mahtang Karai Kasang hpe hkrit hkungga ma ai majaw Karai Kasang mung shan hpe chyeju jaw ya nna shan a dinghku ni hta kashu kasha ni jaw ya nga ai. Israela masha ni gaw matut nna law jat wa ai hte n-gun ja wa nga ma ai.

²²Jahtum e, hkawhkam wa gaw shi a mung masha ni yawng hpe, “Shangai wa sai lasha shagu hte hpe Nila hka nu de kabai bang kau ya mu, rai ti mung numsha ni yawng hpe chyawm gaw jahkrung da ya mu,” ngu nna hkang da ai ga hpe shabra dat wu ai.