Read Jinghpaw Common Language Bible 2009 PRU MAT WA AI 14 Bible Online

PRU MAT WA AI 14 - Jinghpaw Common Language Bible 2009 bible

PRU MAT WA AI 14

¹Shaloi dai MADU gaw Mawshe hpe,

²“Israela amyu masha ni kayin wa nna Migdola hte Nawng Hkyeng lapran na Bala Zehpun hte ani sha re ai Hpi Hahirot a shawng e dap jung nga na lam tsun u.

³Hkawhkam wa gaw nam mali lam pat mat nna, Israela masha ni mungdan kata dam hkawm nga ma ai ngu myit la na ra ai.

⁴Ngai mung shi hpe masin shaja ya ai hte shi mung nanhte hpe hkan shachyut na ra ai; shaloi hkawhkam wa hte shi a hpyen luksuk ni mahkra nye a awng padang hpe shagrau sha-a na mara ai. Shaloi Ngai nan dai MADU rai nga nngai hpe Egutu masha ni chye lu na mara ai,” ngu nna tsun wu ai. Israela amyu masha ni mung tsun matsun ai hte maren galaw ma ai.

⁵Amyu masha ni hprawng mat wa sai lam Egutu hkawhkam wa hpe tsun shana ma ai rai nna, shi hte shi a du salang ni myit galai shai mat nhtawm, “Anhte hpa baw galaw kau saga ai kun? Anhte gaw Israela masha ni hpe jahprawng kau saga ai; anhte a mayam ni hpe shamat kau saga ai!,” ngu nna tsun wu ai.

⁶Hkawhkam wa mung shi a hpyen leng hte shi a hpyen luksuk hpe shajin tawn wu ai.

⁷Shi gaw shi a hpyen leng ni yawng ngu na kaja htum ai leng kru tsa hte dai ni hpe up hkang ai du salang ni hte nawng woi rawt mat wa wu ai.

⁸Dai MADU mung hkawhkam wa hpe myit shaja ya wu ai rai nna shi gaw awng padang hte pru mat wa nga ai Israela masha ni hpe hkan shachyut wu ai.

⁹Hpyen gumra ni, hpyen leng ni hte dai ni hpe hkang ai ni yawng lawm ai dai Egutu luksuk gaw shanhte hpe hkan shachyut nna Nawng Hkyeng hte ani sha nga ai Hpi Hahirot hte Bala Zehpun hkan e dap jung nga ai Israela masha ni hpe hkan dep ma ai.

¹⁰Hkawhkam wa hte shi a hpyen luksuk ni shanhte hpang de htim sa wa nga ai hpe Israela masha ni mu ma ai shaloi, hkrit gari mat ai hte dai MADU kaw karum hpyi jahtau ma ai.

¹¹Shanhte gaw Mawshe hpe, “Egutu mung hta lupwa ni n nga sani? Ya nang anhte hpe nam mali e si mat shangun na matu, ndai de woi shapraw wa n ni? Anhte hpe Egutu mung kaw na woi shapraw wa nhtawm, ya nang hpa galaw kau nit dai gaw she mada yu sanu!

¹²Ndai zawn byin wa na ra ai ngu, anhte garai n pru wa ai aten kaw na nang hpe tsun yu saga ai n rai ni? Anhte hpe chyu sha tawn da nhtawm Egutu mung masha ni kaw matut nna mayam tai nga na lam mung anhte nang hpe nan tsun saga ai. Ndai nam mali e si mat na hta Egutu mung e mayam tai nga na gaw grau nna mai kaja nga ai,” ngu nna tsun ma ai.

¹³Mawshe chyawm gaw, “Hkum hkrit myit! Amu sha nga mu. Dai ni na nhtoi hta, nanhte hpe hkye hkrang la ai amu dai MADU galaw na ra ai hpe nanhte mu lu na marin dai; dai Egutu masha ni hpe galoi mung bai mu lu na manit dai n rai.

¹⁴Dai MADU gaw nanhte hpa mung n galaw ra hkra, nanhte a matu gasat ya na ra ai,” ngu nna tsun wu ai.

¹⁵Dai MADU gaw Mawshe hpe, “Nang gaw hpa majaw karum la na matu hpyi jahtau nga n ta? Shawng de shanang sa wa na matu, amyu masha ni hpe tsun u.

¹⁶Na a dawhkrawng sharawt nna panglai ntsa e ladawn dat u; shaloi dai hka gaw garan mat nna Israela amyu masha ni dai panglai hta hkun hkraw ai ga ntsa hku hkawm sa wa lu na mara ai.

¹⁷Ngai gaw Egutu masha ni hpe masin shaja ya ai hte shanhte mung dai ni a hpang e hkan shang nang na mara ai; hkawhkam wa hte shi a hpyen luksuk ni, shi a gumra leng ni hte hpyen leng hkang ai ni a ntsa e nye a awng padang hpe shagrau sha-a hkam la na we ai.

¹⁸Shanhte hpe ngai dang kau ai shaloi, Egutu masha ni gaw Ngai nan dai MADU rai nga ai hpe chye wa na mara ai.

¹⁹Israela dap a shawng e sa wa ai Karai Kasang a lamu kasa gaw hpang de nhtang nna sa nga ai. Sumwi shadaw mung hpang de htawt tu nna,

²⁰dai gaw Israela hte Egutu masha ni a lapran e din shadang ya nga ai. Dai sumwi shadaw gaw Egutu masha ni hpang maga de nsin sin ya wu ti mung, Israela masha ni hpang maga de chyawm gaw nhtoi jaw ya nga ai; shing rai hpyen luksuk ni shana tup shada da n lu matut mahkai ma ai.

²¹Mawshe gaw shi a lata hpe panglai ntsa de ladawn dat wu yang, dai MADU mung n-gun ja ai sinpraw nbung hte panglai hka hpe kanawng shabai da wu ai. Nbung dai gaw shana tup bung nga ai rai nna panglai gaw hkun hkraw ai hkarang ga tai mat nga ai. Dai hka mung garan mat nga sai majaw,

²²Israela amyu masha ni mung dai panglai hta lahkawng maga na hka shakum a lapran na hkun hkraw ai hkarang hku hkawm lai mat wa ma ai.

²³Egutu masha ni gaw shanhte a gumra ni, hpyen leng ni hte hkang ai ni yawng hte hpawn shanhte hpe hkan shachyut let, panglai de hkan shang nang mat wa ma ai.

²⁴Dai MADU gaw jahpawt manap nhtoi hprim hpram re ai aten e, wan shadaw hte sumwi shadaw kaw na Egutu hpyen hpung ni hpe gum yu let, shanhte hpe hkrit kajawng shangun wu ai.

²⁵Shi gaw shanhte a leng dingsen ni hpe malawk kau ya mu ai rai nna, shanhte grai sa yak nga ma ai. Egutu masha ni gaw, “Dai MADU gaw Israela maga de tsap nna anhte hpe gasat mi ai. Anhte ndai yang kaw nna hprawng mat wa saga!,” ngu nna tsun ma ai.

²⁶Dai MADU gaw Mawshe hpe, “Na a lata panglai ntsa de ladawn dat u, shaloi hka dai gaw Egutu masha ni hpang de mung, shanhte a hpyen leng ni hte hkang ai ni a ntsa de bai ka-up kau na ra ai,” ngu nna tsun wu ai.

²⁷Dai rai nna Mawshe mung shi a lata hpe panglai ntsa de ladawn dat wu ai shaloi, jahpawt nhtoi htoi ai hte hka dai gaw shawoi na shadang du hkra bai lwi nga ai. Egutu masha ni mung, hka kaw na hprawng shakut yu ti mung, dai MADU gaw shanhte hpe panglai hka kata de kabai gumpye bang kau wu ai.

²⁸Dai hka gaw bai lwi wa nna Israela masha ni hpe hkan shachyut nang ai hpyen leng ni, hkang ai ni hte Egutu hpyen hpung ni yawng hpe ka-up kau nga ai rai nna shanhte hta na langai mi mung n lawt lu nga ai.

²⁹Rai ti mung Israela amyu masha ni chyawm gaw panglai hta lahkawng maga a hka shakum lapran na hkun hkraw ai hkarang ga hku hkawm lai mat wa ma ai.

³⁰Dai shani jang, dai MADU gaw Israela amyu masha ni hpe Egutu masha ni a lata kaw na hkye hkrang la nu ai rai nna panglai hkin-gau hkan e si taw nga ai Egutu masha ni hpe shanhte mu ma ai.

³¹Dai MADU gaw shi a daru magam n-gun kaba hte Egutu masha ni hpe dang kau lu nu ai lam hpe Israela masha ni mu ma ai shaloi, shanhte gaw dai MADU hpe hkrit nga ma ai; shanhte gaw dai MADU hte shi a shangun ma Mawshe hpe kam sham ma ai.