Read Jinghpaw Common Language Bible 2009 PRU MAT WA AI 15 Bible Online

PRU MAT WA AI 15 - Jinghpaw Common Language Bible 2009 bible

PRU MAT WA AI 15

¹Dai shaloi Mawshe hte Israela masha ni gaw dai MADU hpe ndai mahkawn ga hte mahkawn mangoi ma ai: “Dai MADU gaw hpung shingkang hte hpring ai awng padang hpe ninglaw nu ai majaw ngai shi hpe mahkawn mangoi na nngai; shi gaw gumra ni hte dai hta jawn ai ni hpe panglai kata de kabai gumpye kau nu ai.

²Dai MADU gaw n-gun hte hpring ai nye a dahpran shara rai nga ai; shi gaw ngai hpe hkye hkrang la ai wa rai nga ai. Shi gaw nye a Karai Kasang rai nga ai, ngai shi hpe shakawn na nngai, nye wa a Karai Kasang rai nga ai majaw, shi a galu kaba ai lam hpe ngai mahkawn mangoi nga na nngai.

³Dai MADU gaw majan gasat ai share shagan wa rai nga ai; Dai MADU gaw shi a mying rai nga ai.

⁴“Shi gaw Egutu hpyen luksuk hte de a hpyen leng ni hpe panglai kata de kabai gumpye kau nu ai; de a kaja htum ai du salang ni mung Nawng Hkyeng hta lup mat masai.

⁵Dai sung ai panglai gaw shanhte hpe ka-up kau nna; nlung zawn hka a htumpa de shanhte lup shang mat wa manu ai.

⁶“MADU e, na a hkra lata gaw daru magam n-gun hte hkrit hpa wa rai nga ai; dai gaw gumlau hpyen ni hpe agrawp kau nga ai.

⁷Hpung shingkang hte hpring ai padang ninglaw hte na a gumlau hpyen ni hpe jahten kau nna na a pawt sindawng ai gaw kahtet pru wa ai hte yihku zawn shanhte hpe hkru kau mu ai.

⁸Nang gaw hka hpe gawut dat yang, hka gaw ntsa de gumdin lung wa nhtawm; dai gaw shakum langai zawn ading jan rai tsap mat nga ai; panglai a sung htum ai shara mung ja ja hkak hkak rai nga ai.

⁹Gumlau hpyen wa gaw, ‘Ngai shanhte hpe hkan shachyut nna rim la na we ai; ngai gaw shanhte a sut gan hpe garan kau nna, ngai ra ai yawng la kau na we ai; Nye a nhtu shaw nna shanhte lu ai arai yawng hte hpe htawm la na we ai,’ ngu nna tsun wu ai.

¹⁰Rai ti mung MADU e, nang kaw na nsa shapraw dat yang, Egutu masha ni yawng lup si mat ma ai; dai hkrit hpa hka de, machyu zawn shanhte lup mat ma ai.

¹¹“MADU e, karai ni hta nang zawn re ai wa kadai nga nga a ta? Kadai wa nang zawn chyoi pra ai hta mauhpa amu shadan dan lu a ta? Nang galaw dan ai zawn, lamik kumla ni hte chyalai n-gun hte hpring ai amu hpe kadai wa galaw lu a ta?

¹²Na a hkra lata hpe ladawn dat yang, ginding aga gaw anhte a gumlau hpyen ni hpe mayu kau nu ai.

¹³Na a ga sadi hta sadi dung nga ai rai nna, amyu masha ni hpe nang woi wa let, nang hkye mawai la nit dai; na a n-gun hte na a chyoi pra ai mung de nang shanhte hpe woi madun wa nit dai.

¹⁴Amyu baw ni na manu ai rai nna, shanhte hkrit gari nga ma ai; Hpilisti masha ni mung hkrit kajawng nga ma ai.

¹⁵Edom ningbaw ni hkrit tsang nga ma ai; Moba a chyalai n-gun rawng ai masha ni mung hkrit gari nga ma ai; Hkanan masha ni nden n ja mat manu ai.

¹⁶Hkrit kajawng ai hte hkrit gari ai gaw shanhte a ntsa e du sai. O MADU e, shanhte gaw na a n-gun hpe mu ma ai shaloi, na a amyu masha ni lai mat wa nna, amyu masha ni hpe mayam prat kaw na nang shalawt kau dat ai aten du hkra, hkrit ai hte atsin sha nga nga ma ai.

¹⁷Nang gaw shanhte hpe woi jashawn nna na a bum ngu ai, na a nta a matu dai MADU nang nan lata da sai shara, nang nan de da ai Nawku Htingnu hta shanhte hpe woi de da nga ndai.

¹⁸MADU e, nang gaw htani htana a hkawhkam tai nga na rin dai.”

¹⁹Dai Israela amyu masha ni gaw panglai hta hkun hkraw ai ga ntsa hku hkawm sa wa ma ai. Rai ti mung, Egutu hpyen leng ni hte hpawn shanhte a gumra ni hte hkang ai ni, panglai de shang ma ai rai nna, dai MADU gaw hka hpe nhtang lwi shangun nhtawm shanhte hpe ka-up kau nga ai.

²⁰Arun a kana, myihtoi num Miriam gaw shi a chying la nna, numsha ni yawng mung shi a hpang hkan let chying ni hpe dum nhtawm ka ma ai.

²¹Miriam gaw shanhte hpe woi awn let ning ngu mahkawn wu ai: “Dai MADU hpe mahkawn mangoi mu, hpa majaw nga yang, shi gaw hpung shingkang hte hpring ai awng padang hpe ninglaw nu ai; shi gaw gumra ni hte dai hta jawn ai ni hpe panglai hta kabai gumpye bang kau nu ai.”

²²Dai hpang Mawshe gaw Israela amyu masha ni hpe Nawng Hkyeng kaw nna Shura nam mali de woi sa wa wu ai. Shanhte gaw nam mali kata e masum ya sat hkawm sa wa ma ti mung, hka n mu lu ma ai.

²³Dai hpang shanhte gaw Mara [1] ngu ai shara de du shang wa ma yang, dai yang e, grai hka ai hka nga nga ai rai nna dai hka hpe shanhte n lu lu ma ai. Dai rai nna shara dai hpe Mara ngu nna shamying ma ai.

²⁴Amyu masha ni gaw Mawshe hpe aput let, “Anhte hpa lu na rai nga ga ta?, ngu nna san ma ai.

²⁵Mawshe gaw dai MADU hpe akroi anoi hpyi jahtau wu ai rai nna, dai MADU mung shi hpe hpun langai mi madun wu ai. Dai hpe hka de kabai bang dat wu yang, hka dai gaw lu mai nga sai. Dai yang e dai MADU gaw shanhte hkan sa na Tara ni hpe jaw nhtawm shanhte hpe mung chyam yu wu ai.

²⁶Shi gaw, “Nye a hkang da ai ga ni hpe shadik shatup nna, ding man ai hku galaw ai hte nye a ga matsun hpe tsep kawp madat mara hkan sa myit dai rai yang chyawm gaw Egutu masha ni hta ngai shakap ai ana ahkya hpa hte mung, nanhte hpe ngai ari jaw na made ai n rai. Ngai gaw nanhte hpe shamai ya ai dai MADU rai nga nngai,” ngu nna tsun wu ai.

²⁷Dai hpang shanhte gaw hka hpawk shi lahkawng hte namhtan hpun sanit shi tu ai Elim shara de du nna dai hka kau e shanhte but nga ma ai.