Read Jinghpaw Common Language Bible 2009 PRU MAT WA AI 2 Bible Online

PRU MAT WA AI 2 - Jinghpaw Common Language Bible 2009 bible

PRU MAT WA AI 2

¹Dai aten laman hte yang, Lewi amyu la langai mi gaw shi a amyu numsha langai mi hpe hkungran la wu ai;

²shi gaw dai wa a matu shadang sha langai shangai ya wu ai. Ma dai ahpraw tsawm nga ai hpe kanu mu wu ai shaloi shi gaw ma dai hpe shata masum tup makoi da wu ai.

³Rai ti mung dai numsha gaw shi hpe loi mi mung n lu makoi da lu sai majaw, mai-aw hpun hte galaw ai sumpu langai mi hpe la nhtawm dai hta hka n shang lu na matu namsu ni hte chya da wu ai. Shi gaw dai sumpu hta ma bang nhtawm hka kau na tsing galu tu ai shara hta tawn da wu ai.

⁴Dai ma a kana mung shi hta kaning rai byin wa na hpe mada yu na matu tsan tsan e tsap nga ai.

⁵Hkawhkam shayi sha gaw hka shin na nga, hka de yu sa nga yang, shi a shangun numsha ni hka kau hkan garet hkawm nga ma ai. Shi gaw tsing galu tu ai shara hta nga nga ai sumpu hpe akajawng sha mu nna, dai hpe sa la na matu mayam num langai mi hpe shangun dat wu ai.

⁶Hkawhkam shayi sha mung dai hpe hpaw yu wu yang, lasha ma langai mi rai nga ai hpe mu wu ai. Dai ma mung hkrap nga ai rai nna shi hpe yu matsan dum wu ai. Shi gaw, “Ndai gaw Hebre ma langai ngai she rai nga ai,” ngu nna tsun wu ai.

⁷Dai hpang shi a kana mung shi hpe, “Na a matu dai ma hpe gawn lajang na Hebre numsha langai mi hpe ngai saw ya ra na kun?,” ngu nna san wu ai.

⁸Shi mung, “Chyeju hte galaw ya e,” ngu nna htan wu ai. Dai rai nna dai numsha gaw wa nna dai ma a kanu hpe woi sa wa wu ai.

⁹Hkawhkam shayi sha gaw dai numsha hpe, “Ndai ma hpe woi wa nna nye a matu gawn lajang ya e; ngai nang hpe shabrai jaw na de ai,” ngu nna tsun wu ai. Dai rai nna numsha gaw ma hpe woi wa nhtawm shi hpe gawn lajang wu ai.

¹⁰Hpang e ma dai loi mi kaba wa ai shaloi, shi gaw dai ma hpe hkawhkam shayi sha hpang de woi sa ai rai nna shi hpe shi a shadang sha majing zawn hkap shatai la wu ai. Hkawhkam shayi sha shi nan, “Ngai shi hpe hka hta na shaw la ai re majaw shi hpe Mawshe ngu nna shamying na nngai,” ngu nna myit wu ai.

¹¹Mawshe kaba wa ai shaloi, shi gaw shi a amyu masha Hebre ni hpang de sa chyai na nga pru sa mat wa wu ai. Shi gaw bungli aja awa galaw shangun na matu shagyeng hkrum nga sai masha ni hpe sa mu wu ai. Shi gaw Mawshe a amyu masha Hebre masha langai hpe Egutu masha e sat kau ai hpe pyi sa mu wu ai.

¹²Mawshe gaw grup yin maga shagu de mada yu nhtawm kadai mung shi hpe n yu nga ai hpe chye jang, dai Egutu masha wa hpe sat kau nna shi a hkum hpe zaibru hta lup bang da wu ai.

¹³Hpang shani e shi bai pru hkawm wu yang, Hebre masha lahkawng ga law nga ma ai hpe mu wu ai. Shi gaw shut ai wa hpe mahtang, “Nang hpa majaw na a manang Hebre masha wa hpe kayat nga n ta?,” ngu nna san wu ai.

¹⁴Dai masha wa gaw, “Anhte a up hkang du hte tara agyi tai ya na, nang hpe kadai san da a ta? Nang gaw Egutu masha wa hpe sat kau ai zawn, ngai hpe mung sat kau na n ni?,” ngu nna htan wu ai. Mawshe mung hkrit ai hte shi a kraw e, “Ngai galaw ai amu hpe amyu masha ni mu kau manu ai,” ngu nna tsun wu ai.

¹⁵Hkawhkam wa gaw dai zawn byin ai lam hpe na ai shaloi, Mawshe hpe sat kau lu na matu asak gyam wu ai, rai ti mung Mawshe gaw hprawng mat wa nhtawm Midian mung hta sa shanu nga wu ai. Lani mi na aten hta, hka htung langai a makau e shi dung nga yang, Midian hkinjawng Yehtru a shayi sha sanit hte gaw hka sa ja nna, shanhte a kawa a sagu bainam hpung ni hpe ntsin jaw na nga, ntsin htung ni hta ja jahpring nga ma ai.

¹⁷Rai ti mung sagu rem nkau mi mahtang Yehtru a shayi sha ni hpe shachyut kau ma ai. Mawshe gaw shanhte hpe karum let, shanhte a sagu bainam hpung ni hpe ntsin ja jaw ya wu ai.

¹⁸Shanhte gaw shanhte a kawa hpang de nhtang wa ma ai shaloi shi gaw, “Nanhte hpa majaw dai ni e jau jau nhtang wa lu myit ni?,” ngu nna hkap san wu ai.

¹⁹Shanhte gaw, “Egutu masha langai mi anhte hpe sagu rem ni a lata kaw na shaw la nhtawm, anhte a matu shi hka ja ya nna anhte a sagu bainam ni hpe ntsin jaw ya mi ai,” ngu nna htan wu ai.

²⁰Shi gaw shi a shayi sha ni hpe, “Shi kanang rai nga a ta? Nanhte hpa majaw dai wa hpe dai yang e kau da manit ni? Anhte hte rau lusha sha lu u ga, shi hpe sa shaga la masu,” ngu nna tsun wu ai.

²¹Dai rai nna, dai yang e shanu nga na matu Mawshe myit jahkut da wu ai rai nna, Yehtru mung shi a shayi sha Zihpura hpe jaw nna hkungran ya wu ai;

²²shi gaw shadang sha langai shangai ya wu ai. Mawshe gaw shi a kraw kata e, “Ngai gaw ndai mung e maigan masha langai mi rai nga nngai majaw ngai shi hpe Gershom ngu na nngai,” ngu nna tsun wu ai.

²³Shaning tsawmra mi na jang, Egutu hkawhkam si mat sai, rai ti mung Israela amyu masha ni chyawm gaw shanhte a mayam lit kata hta naw madai nga ai hte karum la na matu hkrap sharung nga ma ai. Shanhte a jahtau hkrap ai nsen gaw Karai Kasang hpang de hkrang lung wa nna,

²⁴shanhte a madai sharung ai nsen hpe na ya ai hte Abraham, Isak, Yaku ni hte tawn da ai ga shaka hpe dum wu ai.

²⁵Shi gaw Israela amyu masha ni a mayam lit hpe mu ya nna, shi shanhte hpe yu matsan dum wu ai.