Read Jinghpaw Common Language Bible 2009 YOBA 14 Bible Online

YOBA 14 - Jinghpaw Common Language Bible 2009 bible

YOBA 14

¹Anhte yawng gaw n-gun kya ai hte shangai wa nna matsan mayan hkrum ai ni hkrai rai nga ga ai. Yawng gaw aprat kadun nna ruyak tsin-yam tsindam hte hpring ai asak hkrun lam hkrai rai nga ai.

²Anhte kaba wa nna nampan ni zawn alawan nyip mat ga ai; shingnip shingna zawn anhte hkoi mat ga ai.

³Karai Kasang e, nang ngai hpe mada yu nna, ngai hpe tara jashawn let jeyang na ngu wu ni?

⁴Shinggyim masha ni zawn n san n seng ai arai hpa kaw na mung san seng ai arai shapraw ya lu ai n rai.

⁵Anhte a asak sumri sumdam hpe jau jau daw dan da ya nga sai- anhte gaw shata law law nga lu na ra ai. Nang gaw dai aten ladaw ni hpe masat da ya nga ndai majaw dai gaw galai shai mat wa lu ai n rai.

⁶Anhte hpe myi man kayin kau nna anhte hpe chyu tawn kau da u; anhte amu galaw shaja ai nhtoi htum ai du hkra, anhte a hki ba ai asak hkrun lam hpe kabu gara shangun mi.

⁷Kran kadang kau sai hpun hta myit mada shara naw nga nga ai; dai hta asak bai rawng wa nna nnaw prut lung wa nga ai.

⁸De a aru ni dingsa mat wa nna, hpundu ni ga kata hta hkraw rawng nga tim pyi,

⁹hka jaw ai hte dai gaw abawng zawn maku bai prut wa na ra ai.

¹⁰Rai ti mung anhte gaw si mat ai hte dai gaw anhte a hpang jahtum na lam rai nga ai; anhte si mat ga ai, anhte kanang e rai nga ga ai kun?

¹¹Hka nu ni n lwi mat ai hte nawng ni hkun hkraw mat ai zawn,

¹²masha gaw si mat ai, galoi mung rawt wa na n rai. Sumsing lamu agrin nga dingsa shanhte galoi mung hprang wa na mara ai n rai; shanhte gaw yup pyaw nga ai kaw nna galoi mung shamu shamawt lu na mara ai n rai.

¹³Nang ngai hpe katsan ga e makoi da na hpe ngai ra sharawng nngai; na a masin kawp ai aten du hkra ngai makoi nga n-ga, dai hpang ngai hpe dum nga na matu aten langai masat da ya e law.

¹⁴Masha gaw si wa yang, shi bai hkrung wa lu a ni? Rai ti mung, ru yak tsin-yam tsindam hkrum ai ndai aten htum mat ai aten du hkra ala nga let grau mai kaja ai aten ladaw ni hpe la nga na nngai.

¹⁵Dai hpang, nang shaga yang, ngai htan ya na nngai, nang gaw na a hkrung kanu rai nga ai ngai hpe awng sharawng wa na ndai.

¹⁶Dai hpang, nang gaw nye a shamu shamawt ai lahkam shagu hpe azi yu na rai ndai, rai ti mung nye a yubak mara ni hpe nang matsing da ya na n rai nga ndai.

¹⁷Dai ni hpe nang mara dat ya nna dai ni hpe yeng seng ya na ndai; ngai galaw shut kau sai lam yawng mayawng hpe mung nang katsut kau ya na rai ndai.

¹⁸Bum ni daw ru mat ai hte ngang ai n-gam ni gyi ru mat ai shaloi, aten ladaw langai du chye nga ai.

¹⁹Hka gaw lungrawk ni hpe agre hkalawk mat wa nga ai; Marang kaba htu ai gaw ga namhpun ni hpe kashin shayawng kau nga ai; dai zawn asak a matu anhte a myit mada shara hpe nang shamyit kau nga ndai.

²⁰Nang gaw anhte hpe padang dip da lu nna anhte hpe htani htana dat kau nga ndai; anhte a myi man ni hpe galai kau nna si hkrung si htan de yawng shangun nga ai.

²¹Anhte a kashu kasha ni shagrau sha-a hkrum nga ma ai, rai ti mung de a lam anhte galoi mung n chye ga ai, shanhte kaya hkrum nga ma ai shaloi, anhte tsun hkrum nga ga ai n rai.

²²Anhte gaw anhte a hkum shan a nchyi nmu hte anhte a myit masin a yawn hkyen lam hpe chyu sha, hkam sha nga ga ai.