Read Jinghpaw Common Language Bible 2009 YOBA 19 Bible Online

YOBA 19 - Jinghpaw Common Language Bible 2009 bible

YOBA 19

¹Nanhte gaw ngai hpe hpa majaw dai ga ni hte sharu shatsang nga myit ni?

³Nanhte gaw ngai hpe aten mi hte aten mi n kaw n law di myit dai; nanhte gaw ngai hpe matsa ai hte kaya agam ai lam hpa mung n madun nga myit dai.

⁴Ngai galaw shut kau ai rai yang pyi nanhte hta kaning rai machyi hkra na rai ta?

⁵Nanhte gaw ngai hta na grau kaja nga myit dai ngu, myit nawn nga myit dai, ngai hkam sha ai tsin-yam tsindam gaw nye a shut hpyit mara a sakse rai nga ai ngu yu nga myit dai.

⁶Ndai amu Karai Kasang galaw nu ai hpe nanhte n mu myit ni? Shi gaw ngai hpe rim na mahkam up da nga nu ai.

⁷Ngai gaw shi a kashun kashe du daw sai hkaw amu hpe ninghkap nngai, rai ti mung kadai mung n madat ma ai; teng man rap ra ai tara a matu ngai jahtau tim, kadai n na ya ma ai.

⁸Karai Kasang gaw lai lam pat kau nu ai, ngai n lai di lu nngai; shi gaw nye a hkrun lam hpe nsin e makoi kau ya nga sai.

⁹Shi gaw nye a sut gan yawng la kau ya nu ai nye a mying gumhkawng ai hpe jahten shaza kau ya nu ai.

¹⁰Shi gaw ngai hpe grup grup shagu kaw nna kayat ahpat nga ai. Shi gaw nye a myit mada shara hpe baw kau ya nna nyui si mat u ga nga, ngai hpe tawn kau da wu ai.

¹¹Karai Kasang gaw ngai hpe pawt nna, n-yun bu nga ai; shi gaw ngai hpe n kaja htum ai gumlau hpyen hpe zawn di wu ai.

¹²Shi gaw ngai hpe gasat na matu shi a hpyen hpung hpe shangun dat wu ai; shanhte gaw kaduk ni htu nhtawm nye a sum grup grup hta dap jung da ma ai.

¹³Karai Kasang gaw nye a dinghku hpe jahka kau shangun nu ai; Ngai gaw ngai hte chye sai ni hte tsasam zawn rai nga nngai;

¹⁴nye a jinghku ni hte manang ni kau da masai.

¹⁵Nye a nta hta nga ai manam ni mung ngai hpe malap kau masai; nye a shangun ma numsha ni gaw ngai hpe tsasam masha hte maigan masha langai zawn di ma ai.

¹⁶Ngai shangun ma langai hpe shaga ai shaloi mung, ngai hpe karum la na matu hpyi nem ai shaloi pyi, shi n htan ya nga ai.

¹⁷Nye a madu jan gaw nye a nsa bat hpe mung n manam hkam lu nga sai, nye a kahpu kanau majing ni pyi ngai hpang de n shanang sa mat masai.

¹⁸Ma kaji ni mung ngai hpe n kaw n law di ai hte shanhte ngai hpe mu ai shaloi mani ma ai.

¹⁹Ngai hte ni htum ai manang ni mung ngai hpe yu matsat ma ai; ngai tsaw ra ai ni mung ngai hpe hpyen tai masai.

²⁰Nye a hpyi shan gaw nrut nra ni hta kap noi mat nga ai; nye a asak hpe pyi tsam mari sha shalawt la lu nngai.

²¹Nanhte gaw nye a manang ni rai nga myit dai! Ngai hpe matsan yu dum la mi law! Karai Kasang a lata hte ngai hpe kayat kadang tawn nu ai.

²²Nanhte gaw hpa majaw Karai Kasang galaw ai zawn ngai hpe zingri lu na rai myit ni? Nanhte gaw ngai hpe myit dik hkra n zingri lu nga myit ni?

²³Marai langai ngai nye a ga hpe dum ya nna, laika buk hta ka matsing da ya na ngai kade sha ra sharawng nga n hka!

²⁴Ngai tsun ai ga ni nlung hta u gawn hte tawk ka da mu ga; shaloi dai ni prat dingsa agrin nga na ma ai.

²⁵Rai ti mung, sumsing lamu na marai langai ngai gaw hpang jahtum e ngai hpe makawp maga la na matu du sa wa na ra ai hpe ngai chye nngai.

²⁶Nye a ahpyi shan ana zinli hte sha kau ai hkrum ti mung, naw ngam nga ai ndai hkum shan hte nan Karai Kasang hpe ngai mu lu na nngai.

²⁷Ngai gaw shi hpe nye a myi hte chyaw mu lu na nngai, shi gaw tsasam wa tai na ra ai n rai. Ngai nden marai n nga mat ni ai, hpa majaw nga yang nanhte gaw,

²⁸“Anhte shi hpe kaning rai zingri lu na ga ta?,” ngu nna tsun myit dai. nanhte gaw ngai hpe gasat na ginjang tam myit dai.

²⁹Rai ti mung, ya chyawm gaw nhtu hpe hkrit nga mu; Yubak a majaw Karai Kasang a pawt sindawng hpe du shangun ai nhtu du ra ai, shaloi tara jeyang ai wa nga nga ai hpe nanhte chye na marin dai.