Read Jinghpaw Common Language Bible 2009 YOBA 20 Bible Online

YOBA 20 - Jinghpaw Common Language Bible 2009 bible

YOBA 20

¹Yoba e, nang gaw nye a myit hpe gale galau di ya nga ndai. Ya chyawm gaw ngai htan na myit katu nga nngai.

³Nang tsun nit dai ga gaw n kaw n law re ai ga rai nga ai, rai ti mung nang hpe kaning ngu htang na gaw, ngai chye nngai.

⁴Nang gaw anhte shinggyim masha ni hpe ginding aga ntsa e shawng tawn da nga sai lam hpe moi prat kaw nna teng teng chye nga ndai,

⁵n hkru ai masha ni kadai mung aten na na n kabu lu ma ai.

⁶Shanhte gaw grai mai galu kaba ai hte lamu de tsaw lung wa mai nga ai, garai galu kaba ai shanhte a abaw ni gaw sumwi du hkra dep nga ai,

⁷rai ti mung shanhte gaw ga nhpu zawn mawng mat na mara ai. Shanhte hpe chye sai ni mung shanhte kanang de rai mat wa masai hpe yu mau na mara ai.

⁸Shanhte gaw shana e mu ai yup mang shingran zawn hkoi mat wa nna, galoi mung bai mu lu na ra ai n rai.

⁹Shanhte nga nga re ai shara kaw na n hkru ai masha ni mat mat na mara ai;

¹⁰shanhte a kashu kasha ni gaw matsan mayan ni kaw na shanhte lagu la sai sut rai ni hte mai kaja ai amu galaw na mara ai.

¹¹Shanhte a hkum hkrang ni shabrang zawn n-gun rawng ma ai; rai ti mung shanhte gaw kade n na yang ga nhpu tai mat na mara ai.

¹²N hkru ai gaw shanhte a matu grai dwi sau nga nna, de a namchyim hpe kabu gara ma-ut lu na matu shi a n-gup hta nkau mi ma-um da nga ai.

¹⁴Rai ti mung, shanhte a kan de shang wa ai lusha gaw hka mat nna, dai gaw gung tai lu na daram hka nga ai.

¹⁵N hkru ai wa gaw shanhte lagu da ai sut gan madawn shapraw nga ai; Karai Kasang gaw dai hpe shanhte a kan kata kaw na pyi bai nhtang la nga ai.

¹⁶N hkru ai masha ni mayu bang dat ai hpa rai tim gung zawn rai nga ai; dai gaw si hkra kawa achye ai lapu zawn shanhte hpe achye sat na mara ai.

¹⁷Shanhte gaw tsanlun sau a hka nu ni, ngachyu hte lagat ntsin lwi ai hka shi ni hpe mu lu na mara ai n rai.

¹⁸Shanhte gaw shanhte galaw da sai sut gan yawng hte hpe ginlut kau na mara ai; shanhte gaw shanhte a sut gan hta kabu gara lu na ahkang lu na mara ai n rai,

¹⁹hpa majaw nga yang, shanhte gaw matsan mayan masha ni hpe dip gamyet sha nna n sawn n sang di ma ai, marai langai ngai e gap da ai nta ni hpe zing la ma ai.

²⁰Shanhte a lawhpa ra marit ai gaw galoi mung myit dik shangun nga ai n rai.

²¹Shanhte sha yang, dai yang e hpa mung n ngam nga ai, rai ti mung ya chyawm gaw, shanhte a ngamu ngamai ai sut gan htum mat manu ai.

²²Shanhte awng dang ai madang wa tsaw nga yang, Nchyi nmu re ai namnak yawng gaw shanhte hpe apyet kau na ra ai.

²³Shanhte ra ai yawng sha mu ga! Karai Kasang gaw shanhte hpe masin kahtet pawt sindawng ai hte ari jaw na ra ai.

²⁴Hpri nhtu kaw nna shanhte hprawng lawt yang, magri mang ndan gaw shanhte hpe gap jung na ra ai.

²⁵Shanhte a hkum hkrang hta pala ni jung nna; de a tu kabrim ai matu masen gaw shanhte a asai hte hkra nga ai, hkrit kajawng ai gaw shanhte a myit masin hpe ka-up da nga ai.

²⁶Shanhte mahkawng da ai sut gan shagu gaw hten za hkrum nga ai; masha a lata hte n wut ai wan gaw shanhte hte shanhte a dinghku masha ni yawng hpe hkru kau nga ai.

²⁷Sumsing lamu gaw shanhte a yubak hpe madun dan nga ai, ginding aga gaw shanhte hpe sakse jaw ya nga ai.

²⁸Shanhte a sut gan yawng mayawng gaw Karai Kasang a pawt sindawng ai mawru hta jahten kau hkrum na mara ai.

²⁹Ndai gaw n hkru ai masha ni a matu sali wunli rai nga ai, dai sali wunli gaw shanhte a matu Karai Kasang san da ya nga ai.