Read Jinghpaw Common Language Bible 2009 YOBA 21 Bible Online

YOBA 21 - Jinghpaw Common Language Bible 2009 bible

YOBA 21

¹Ngai tsun nga ai ga madat mu; dai gaw nanhte kaw na ngai san ai shalan shabran ga yawng rai nga ai.

³Ngai hpe ga tsun na ahkang naw jaw mi, ngai tsun ngut jang, nanhte rai nna asawng mayu jang asawng mu.

⁴Nye a ga li ga law ai gaw si chye ai masha ni hte n rai; ngai hta n hkam sharang lu ai sakse kaja mung lu nngai.

⁵Ngai hpe mada yu mi. Nanhte hpe zim rai mau kajawng shangun ai pyi ram la sai n rai ni?

⁶Ngai hta hpa byin lai mat wa sai lam hpe ngai myit yu ai shaloi, ngai mahtang htwi kadawng ai hkrum nna, hkrit gari ai hte ashun nga nngai.

⁷Karai Kasang gaw n hkru ai masha ni hpe hpa majaw asak jahkrung da nna, shanhte hpe asak kaba ugut gu ai hte ngamu ngamai shangun ai kun?

⁸Shanhte gaw kashu kasha lu ma ai rai nna; dai ni yawng galu kaba kunghpan wa hkra shanhte hpe sin yu nga ma ai.

⁹Karai Kasang gaw shanhte a dum nta ni hta tsin-yam tsindam ni shadu ai n rai; shanhte gaw galoi mung hkrit gari ai hte shanu nga ma ai n rai.

¹⁰Rai sa, shanhte a dumsu uli lung ai ni yawng ru tsang n nga ai sha hkrat shajang ma ai.

¹¹Shanhte a kashu kasha ni sagu kasha ni zawn kagat gumtawng ginsup ai hte,

¹²shupsheng hte tingse dum let mahkawn mangoi nna ka manawt ma ai.

¹³Shanhte gaw ngwi pyaw sim sa ai hte nga lu nna, nni nkri n hkrum sha ai sha atsin sha si wa ma ai.

¹⁴Shanhte hpe sha pru wa shangun ai, nga nna n hkru ai ni Karai Kasang hpe tsun ma ai; shanhte gaw shanhte a asak hkrun lam ni a matu shi a myit ra sharawng ai lam hpe n chye mayu nga ma ai.

¹⁵Karai Kasang hpe daw jau shara n nga ai nga nna mung, shi kaw akyu hpyi yang hpa akyu n nga ai nga nna mung, shanhte myit nawn da mu ai.

¹⁶Shanhte chyawm gaw shanhte a n-gun lagaw hte sha awng dang lu ai nga nna tsun ma ai; rai ti mung shanhte a myit mang ai lam hpe ngai n hkap la lu nngai.

¹⁷N hkru ai masha wa a nhtoi gaw galoi mung si mat ai n rai ni? Shanhte hta na langai ngai gaw ru yak tsin-yam tsindam galoi mung ahkrum nga ai n rai ni? Karai Kasang gaw n hkru ai ni hpe pawt sindawng ai hte mung,

¹⁸nbung e shapoi kau ai yihku zawn mung, nbung laru e ahpawt shapoi mat wa hkrum ai ga nhpu zawn mung shanhte hpe ari jaw na ra ai n rai ni?

¹⁹Karai Kasang gaw kawa a yubak majaw ma hpe ari jaw nga ai ngu nna nanhte tsun myit dai. N rai law! Karai Kasang gaw yubak kap ai ni hpe sha ari jaw u ga; shanhte galaw ai yubak a majaw dai hpe ari jaw na lam shi hpe madun dan u ga.

²⁰Yubak galaw ai ni gaw shanhte a ari hkam la mu ga; Chyahtum Chyalai N-gun Rawng Ai Karai Kasang a pawt sindawng ai hpe hkam sha shangun u ga.

²¹Anhte a asak ni lai mat wa ai shaloi, anhte a ma ni kabu gara lu hkra anhte kaja wa lanu lahku lu na rai nga ga ni?

²²Matsaw Lahta tsang na ni hpe pyi tara jeyang ai Karai Kasang hpe kadai wa sharin ya lu na rai ta?

²³Shanhte si wa ai nhtoi du hkra masha nkau mi hkam kaja nga ai; shanhte gaw ngwi pyaw ai hte si ma ai, shanhte a hkum hkrang ni gaw mu mai ai lusha ni a majaw pri tsawm wa nga ai.

²⁵Kaga ni kabu gara lam hkam la ma ai n rai; shanhte gaw ahkup ahka nga ai myit masin hte asak hkrung nna si wa ma ai.

²⁶Rai ti mung yawng hte gaw maren si wa nna lup makoi kau hkrum nga ai; shanhte yawng gaw byet ni hte ka-up kau hkrum nga ai.

²⁷Nanhte hta matai htang mayu ai myit rawng nga myit dai gaw ngai chye nngai.

²⁸Nanhte gaw, “N hkru ai amu galaw ai galu kaba ai masha ni a dum nta ni ya, kanang rai nga a ta?,” ngu nna san nga myit dai.

²⁹Nanhte gaw bu hkawm masha ni hte n shaga yu myit ni? Shanhte bai nhtang tang madun ai shiga hpe nanhte n chye myit ni?

³⁰Karai Kasang gaw dai shani e masin pawt nna ari jaw nga ai, dai gaw n hkru ai wa a matu tut nawng san da ya ai nhtoi rai nga ai.

³¹N hkru ai ni hpe kadai mung mara n shagun gwi nga ai shi galaw nu ai lam yawng mayawng a matu shi hpe nhtang tai na kadai n nga nga ai.

³²Lup sung hku ni hpe atsawm sha sin ai lupwa de shanhte hpe hpai sa wa yang,

³³masha hkying hkying gaw dai makoi mayang ai poi hta hkan nang nga ma ai; ginding aga pyi shanhte a hkum hkrang ntsa hta apyaw sha taw nga ai.

³⁴Dai re ai mi, nanhte gaw! Nanhte gaw ngai hpe hpa lachyum n pru ai ga hte shalan shabran shakut myit dai! Nanhte jaw ai mahtai shagu gaw masu magaw ga hkrai rai nga a hka!