Read Jinghpaw Common Language Bible 2009 YOBA 24 Bible Online

YOBA 24 - Jinghpaw Common Language Bible 2009 bible

YOBA 24

¹Karai Kasang gaw tara jeyang na matu mung, shi hpe daw jau ai ni a matu teng man rap ra ai nhtoi hpe mung hpa majaw n masat da ya a ni?

²Masha ni gaw lamu ga grau jat la lu hkra nga, ga jarit nlung ni hpe htawt sit ma ai; shanhte gaw sagu ni hpe lagu la nhtawm shanhte a yam nga uhpung ni hte rau rem tawn da ma ai.

³Shanhte gaw chyahkrai ma ni madu tawn ai lawze ni hpe la kau ya ma ai; gaida jan a utang hpe hka bai wa lu ai aten du hkra la kau ya nga ma ai.

⁴Shanhte gaw matsan mayan masha ni lu la na ahkaw ahkang hpe pat shingdang ya nhtawm, ra kadawn ai ni hpe hprawng makoi na matu shadut ma ai.

⁵Dai rai nna, matsan mayan ni gaw zai ai lawze ni zawn hkun hkraw ai nam mali kata lusha tam ma ai; shanhte a kashu kasha ni a matu lusha hpe mu tam la lu ma ai.

⁶Shanhte n madu ai yi hkauna na nsi naisi ni hpe shu la ma ai; tara n lang ai masha ni a sabyi sun ni hta sabyi si gut la ma ai.

⁷Shanhte gaw shana e hpun nba hpa mung n hpun ai sha yup ma ai; shanhte gaw nshung ta e hkum singgu krin rai ma ai.

⁸Shanhte gaw bum ga e htu ai marang hte nyaw nna; shingbyi shara lunghkrung makau hkan e shanhte anin machyu nga ma ai.

⁹N hkru ai masha ni gaw kawa n lu ai ma kaji ni hpe mayam shatai nhtawm, matsan mayan wa a ma ni hpe hka wa shangun nga ma ai.

¹⁰Rai ti mung matsan mayan masha wa gaw ma ni hpe makawp maga la na matu singgu krin pru sa wa nga ai; shanhte gaw hkaulan mam shu la ai aten hta kawsi nga ma ai.

¹¹Shanhte gaw sau a matu tsanlun, sabyi ntsin a matu sabyi si ni hpe shup ti mung, shanhte nan hpang gara nga ma ai.

¹²Mare ni hta hkala nba hkrum ai ni hte si wa magang ai ni jahtau nga ma ti mung; Karai Kasang gaw shanhte a hpyi jahtau ai ga hpe hpa n nawn ya wu ai.

¹³Dai masha ni gaw nhtoi hpe ningdang ai ni rai nna; de a lam shanhte n chye ma ai, de a lam woi ai hku shanhte n hkan ma ai.

¹⁴Masha sat ai wa gaw nhtoi htoi jang rawt nna, matsan mayan ni hpe sat na nga, pru sa wa ai, shi gaw shana e hkan lagu hkawm nga ai.

¹⁵Numshaw ai wa gaw ningrim rim wa na hpe ala nga ai; kadai mung shi hpe n mu lu mu ga nga, shi a myi man hpe magap da wu ai.

¹⁶Lagu lagut ni gaw shana e nta kata de hpya shang ma ai; shanhte gaw shana e mahtang dai nhtoi hpe yen nga ma ai.

¹⁷Shanhte gaw shani nhtoi hpe hkrit ma ai; rai ti mung nsin chyawm gaw shanhte a matu hkrit hpa lam hpa mung n nga nga malu ai.

¹⁸[2]Ndai n hkru ai masha wa gaw mawru hka e agre shayawng ai zawn hkrum nga ai; shi madu da ai lamu ga mung Karai Kasang a dagam dala hkrum nga ai; shi gaw shi a sabyi sun ni de galoi mung amu sa galaw lu sana n rai.

¹⁹Hkyen gaw kahtet kang ai hte jan gri ai aten hta hkoi mat ai zawn; yubak kap ai wa mung asak hkrung nga ai mungkan ga kaw nna mat mat nga ai.

²⁰Ya pyi, shi a kanu shi hpe dum ai n rai; shanhte gaw byet e sha kau hkrum nna agrawp daw mat ai hpun zawn hten za mat nga ma ai.

²¹Shanhte gaw gaida jan ni hpe n karum ai majaw mung, maudung num ni hpe matsan n chye dum ai majaw mung dai zawn byin nga ai.

²²Karai Kasang gaw shi a n-gun atsam hte chyalai n-gun rawng ai gumshem magam wa hpe shamyit kau nga ai; Karai Kasang galaw ai amu a majaw n hkru ai masha ni si mat nga ai.

²³Karai Kasang gaw shanhte hpe shim lum hkra nga shangun nga ai; rai ti mung shanhte hpe aten shagu hkan yu nga ai.

²⁴N hkru ai wa gaw hkring mi sha ngamu ngamai nga ai; rai ti mung, loi hkring mi rai jang, shanhte gaw tsingdu zawn nyip mat nga ai; dan kau ai hkainu hpun zawn tai mat na mara ai.

²⁵Ndai hku she re law, nga nna kadai ningdang lu na rai ta? Nye a ga ni gaw n teng n man nga ai nga nna kadai sakse madun lu na rai ta?