Read Jinghpaw Common Language Bible 2009 YOBA 27 Bible Online

YOBA 27 - Jinghpaw Common Language Bible 2009 bible

YOBA 27

¹Ngai hpe teng man rap ra ai tara n jaw hkraw ai hte nye a asak hpe ahkup ahka nga hkra byin shangun dat ai dai ahkrung nga ai Chyahtum Chyalai N-gun Rawng Ai Karai Kasang hta ngai dagam let,

³Karai Kasang ngai hpe nsoi nsa jaw ya nga dingsa,

⁴nye a nten kaw na n hkru ai ga galoi mung tsun na nngai n rai, nye a shinglet masu magaw ga galoi mung tsun na n rai.

⁵Ngai gaw nanhte ding man nga myit dai ngu nna galoi mung tsun na nngai n rai; Ngai si mat wa hkyen ai shani du hkra ngai hta mara n kap nga ai hpe myit jung nga na nngai.

⁶Ding hpring nga na ngu ai nye a dakan ai lam hpe ngai galoi mung shayaw kau na n rai; nye a myit asan sha rai nga li ai.

⁷Ngai hpe ninghkap ai hte ngai hte nhtan shai hkat ai ni yawng hte gaw n hkru ai ni hte n ding n man ai masha ni hpe zawn ari jaw hkrum na mara ai.

⁸Karai Kasang gaw karai kata masha ni a asak hpe hpyi la ai ahkying hta shanhte a matu hpa baw myit mada shara naw nga nga a ta?

⁹Tsin-yam tsindam du ai shaloi, shanhte a hpyi jahtau ai nsen hpe Karai Kasang na ya na wu ni?

¹⁰Shanhte jaw ya ai kabu pyaw lam hpe shanhte hkam la ang ma ai; shanhte gaw shi hta dinggrin akyu hpyi ang ma ai.

¹¹Karai Kasang a daru magam n-gun kade galu kaba nga ai lam ngai nanhte hpe sharin ya na made ai; Chyahtum Chyalai N-gun Rawng Ai Karai Kasang hpa baw shatawng shada maw mawn ai lam tsun shaleng dam made ga.

¹²Rai ti mung, n rai law, hpang jahtum hta, nanhte nan dai lam mu manit dai; dai rai nna hpa majaw dai zawn kaman lila ga shaga nga myit ni?

¹³Ndai gaw tara n lang ai ni, kashun kashe du daw sai hkaw amu galaw ai masha ni hpe Chyahtum Chyalai N-gun Rawng Ai Karai Kasang gara hku ari jaw ai lam rai nga ai.

¹⁴Shanhte gaw shadang sha law law lu ma ti mung shanhte yawng gaw majan e sat kau hkrum na mara ai; shanhte a kashu kasha ni gaw galoi mung hkru sha na ma ai n rai.

¹⁵Asak naw hkrung nga ai ni mung ana ahkya hte si htum mat na mara ai; shanhte a gaida gaina ni pyi dai ni a si hkrung si htan lam a majaw hkrap ngu hkrap ngoi lu na ma ai n rai.

¹⁶N hkru ai masha ni gaw n dang hti hkra law ai gumhpraw lu mai nga ma ai; kadai mung ra ai hta jan hkra hpun palawng ni lu mai ma ai.

¹⁷rai ti mung mai kaja ai masha nkau mi hpun palawng lu nna; myit ding ai masha nkau mi gumhpraw lu na mara ai.

¹⁸N hkru ai ni gaw gindigram tsip hte bung ai nta ni hpe gap nna; dai gaw sun sin ai mayam wa a sun zawn rai na ra ai.

¹⁹Sut su ai ni gaw hpang jahtum na aten hta shanhte hprang wa yang, shanhte a sut gan n nga mat ai hpe mu jang, shanhte si mat na mara ai.

²⁰Hkrit kajawng ai gaw hka hpungtun zawn rawt hta wa na ra ai; shana na nbung gaw shanhte hpe bung ahpawt kau na ra ai;

²¹sinpraw nbung gaw shanhte hpe shanhte a dum nta ni kaw nna ye magawn mat wa nhtawm,

²²shanhte gaw kaja htum ai hku hprawng gale mayu ti mung dai gaw matsan dum ai lam n nga ai sha, shanhte hpe shapoi kau na mara ai.

²³Dai nbung gaw shanhte hprawng kagat mat wa ai de hkan ngoi nang nna, jahten shaza kau lu ai n-gun hte shanhte hpe jahkrit shama nga ai.