Read Jinghpaw Common Language Bible 2009 YOBA 28 Bible Online

YOBA 28 - Jinghpaw Common Language Bible 2009 bible

YOBA 28

¹Gumhpraw htu la ai maw nhkun ni nga nga ai; Aja jen la ai shara ni mung nga nga ai.

²Anhte gaw ga kata na hpri htu shaw la ga ai Nlung ni kaw na magri hkyeng shabyawng la nga ai.

³Maw htu ai ni gaw sung htum ai nsin hpe tam ma ai. Shanhte gaw ginding aga a sung ai shara hpe sawk yu nhtawm. Htat ai nsin hta rawng ai lunghkrung ni hpe htu nga ai.

⁴Masha lagaw hkawm sharat nna Kadai mung nga ai shara hte tsan ai shara e Maw nhkun galu ni hpe htu ma ai. Dai yang e, shanhte hkrai amu galaw nna Nhkun ni hta sumri ni hpe noi goiwat da nga ma ai.

⁵Ginding aga kaw na nsi naisi lusha tu ya nga ai; Rai ti mung, dai ga a npu tsang chyawm gaw Ashep ashin rai nna agrawp ayai kau hkrum nga ai.

⁶Ginding aga na nlung ni hta seng mut ni rawng nna; De a ga nhpu hta aja rawng nga ai.

⁷Langji gaw maw de hkrang ai lam ni hpe mu ai n rai; Langda mung dai ntsa hku pyen lai mat wa ai n rai.

⁸Hkanghkyi hte kaga matse labye ni gaw Dai katsi katsang re ai lam hku galoi mung n kabye lai lu ma ai.

⁹Maw nhkun htu ai ni gaw ja dik lunghkrung ni hpe htu nna; Bum ni hpe de a bum lagaw du hkra htu kau mu ai.

¹⁰Shanhte gaw lunghkrung hku hka hkawng htu waw ma yang, Manu dan ai nlung ni hpe mu tam la ma ai.

¹¹Shanhte gaw hka nu ni a hka npun ni hpe htu pat kau nna, Makoi up da ai shara hta nhtoi du shangun nga ai.

¹²Rai ti mung hpaji byeng-ya hpe kanang e mu lu a ta? Chye na hkawn hkrang wa hkra anhte kanang e sharin la lu na rai ta?

¹³Hpaji byeng-ya hpe masha hta mu tam la lu ai n rai; Kadai mung de a teng man ai manu hpe chye lu ai n rai.

¹⁴Hpaji byeng-ya hpe nammukdara hte panglai hka ni a Sung ai shara ni hta mu tam la lu ai n rai, nga nna tsun ai.

¹⁵Dai hpe aja gumhpraw hte mari la lu ai n rai.

¹⁶Jet htum ai aja hte reng htum ai lung seng ni hte, De a manu hpe shabung lu ai n rai.

¹⁷Dai gaw aja hta mung, aja di bu langai hta mung, Shing n rai kaja htum ai apat hta mung grau nna manu dan nga ai.

¹⁸Hpaji byeng-ya a manu gaw chyahkat lung, lung san nlung hte Patamya lung seng ni hta grau manu dan nga ai.

¹⁹Reng htum ai utahpaya lung seng hte jet htum ai ja gaw Hpaji byeng-ya a manu hte shadawn lu nga ai n rai.

²⁰Dai rai yang, hpaji byeng-ya a npawt kanang e nga nga a ta? Chye na hkawn hkrang wa hkra anhte kanang e sharin la lu na rai ta?

²¹Dai hpe hkrung mahkrung ni mu lu ai n rai. Pyen nga ai ntsa malen u pyi mu lu ai n rai.

²²Si hkrung si htan hte hten byak yan pyi, Dai ma da ga hpe chyu sha na saga ai nga nna yin la ma ai.

²³Karai Kasang chyu sha de a lam chye nga ai; Hpaji Byeng-Ya hpe mu tam la ai shara chye nga ai;

²⁴Hpa majaw nga yang, shi gaw ginding aga a jahtum hpe mu nna, Sumsing lamu a npu na nga manga hte hpe shi mu nga ai.

²⁵Karai Kasang gaw nbung hte de a n-gun bang ya nna, Panglai a hkrang kade kaba nga ai hpe shadawn sharam yu na myit jahkut da ai shaloi mung,

²⁶Karai Kasang gaw marang jahtu na shara daw dan nna Mu ngoi ai lam tawn da ai shaloi mung,

²⁷Shi gaw hpaji byeng-ya hpe mu nna De a manu hpe chyam yu nhtawm, shi dai hpe shagrin da nga ai.

²⁸Karai Kasang gaw dai masha ni hpe, “Nanhte gaw hpaji rawng na matu dai Madu hpe hkrit hkungga lu na rai myit dai. Nanhte gaw chye na hkawn hkrang na matu n hkru ai kaw na kayin mat wa lu na rai myit dai,” ngu nna tsun wu ai.