Read Jinghpaw Common Language Bible 2009 YOBA 29 Bible Online

YOBA 29 - Jinghpaw Common Language Bible 2009 bible

YOBA 29

¹Yoba gaw ga bai shaga hpang wu ai.

²Nye a asak hpe chyu sha shawng de na zawn lang mi bai nga shangun lu ai rai yang, shawng de na zawn Karai Kasang ngai hpe sin yu na rai wu ai.

³Karai Kasang gaw ngai hte rau tut nawng nga nga ai rai nna nsin de ngai hkawm lai mat wa yang shi ngai hpe nhtoi jaw ya nga ai.

⁴Dai nhtoi gaw ngai ngamu ngamai nga ai nhtoi hta Karai Kasang a manang tai nna nye a nta hpe makawp maga ya nga ai.

⁵Chyahtum Chyalai N-gun Rawng Ai Karai Kasang gaw ngai hte rau rai nga ai; ngai gaw nye a kashu kasha ni yawng hte shinggrup da hkrum nga nngai.

⁶Nye a dumsu kanu ni hte bainam ni nga chyu law law jaw ma ai, nye a tsanlun hpun ni mung lunghkrung ga hta tu nga ma ai.

⁷Mare salang ni hkrum zup ai hpawng shagu hta ngai dung lawm nga yang,

⁸shabrang ni ngai hpe mu ai hte koi yen mat wa ma ai, dingla ni mahtang rawt tsap let ngai hpe hkungga ma ai.

⁹Amyu masha ni a ningbaw ni ga tsun n gwi ma ai;

¹⁰ahkyak htum ai masha ni pyi atsin sha nga ma ai.

¹¹Ngai hpe mu nna nye a lam na ai ni kadai mung ngai hta byin ai lam hpe mai kaja ai amu re nga nna tsun shajang ma ai.

¹²Matsan mayan masha ni hpyi jahtau yang, ngai shanhte hpe karum nngai; kade mung n chye sa mat wa ai jahkrai ma ni hpe mung ngai karum nngai.

¹³Htum hkra nni nkri hkrum sha ai ni mung ngai hpe shakawn ma ai; ngai gaw gaida jan ni hpe shim lam mu la hkra karum nngai.

¹⁴Ngai gaw tut nawng rap ra ai tara hte amu galaw nngai.

¹⁵Ngai gaw myi n mu ai ni a matu myi; lagaw hten ai ni a matu lagaw rai nga nngai.

¹⁶Ngai gaw matsan mayan masha ni a matu kawa langai zawn rai nga nngai; tsin-yam hkrum ai tsasam masha ni a amu hpe ngai sawk yu nngai.

¹⁷Ngai gaw mazut gumshem ai ni a n-gun atsam hpe jahten kau nna, tsin-yam hkrum ai masha ni hpe hkye mawai la nngai.

¹⁸Ngai gaw asak galu hkrung nga nna; nta e angwi apyaw hte si mat wa na hpe tut nawng myit mada nngai.

¹⁹Ngai gaw tut e hka lu lu ai hpun ru zawn mung, numri hte madi nga ai hpun lakung lakying ni zawn mung rai nga nngai

²⁰Masha shagu ngai hpe tut nawng shakawn nga ma ai; nye a n-gun lagaw galoi mung daw mat li ai n rai.

²¹Ngai hpaji daw yang, amyu masha ni atsin sha nga nna, ngai hpa tsun ai ga hpe sadi sahka hte madat nhtawm,

²²ngai tsun ngut ai du hkra, shanhte hpa mung jat tsun ma ai n rai. Nye a ga ni gaw marang kahte hkrat ai zawn tsim shang mat wa ai rai nna,

²³yi hkauna galaw sha ai ni marang shadoi hpe marit nga ma ai zawn masha shagu mung dai ga ni hpe hkap la shajang ma ai.

²⁴Shanhte kamhpa shara n nga ai shaloi, shanhte hpe ngai mani sumsai hte myit shapyaw ya ai rai nna, nye a kabu sumsai myi man gaw shanhte hpe n-gun lu la shangun nga ai.

²⁵Shanhte hpe ngai woi awn let amu woi daw dan nngai; hkawhkam wa gaw shi a hpyen hpung ni hpe woi awn ai zawn ngai shanhte hpe woi awn nngai; shanhte myit htum nga ai aten hta ngai shalan shabran ya nngai.