Read Jinghpaw Common Language Bible 2009 YOBA 30 Bible Online

YOBA 30 - Jinghpaw Common Language Bible 2009 bible

YOBA 30

¹Rai ti mung, ya chyawm gaw, ngai hta grau kaji ai ni ngai hpe mani asawng nga ma ai! Shanhte a kawa ni gaw tut nawng hpu reng nga ma ai n rai dai rai nna, sagu sin na nye a gwi ni hpe shanhte hpe karum shangun na nngai n rai.

²Shanhte gaw hki ba ai masha majaw mi rai nga ma ai, nye a matu amu galaw ya na nau wa n-gun kya nga ma ai.

³Shanhte gaw grai matsan mayan re ai hte kawsi hkrum nga ma ai rai nna, shana e katsi katsang re ai shara ni hkan tu ai hpun ru chyahkraw ni hpe pyi makrut sha nga ma ai.

⁴Shanhte gaw zaibru jang na hpun lawn kasha ni gang baw nna dai ni hpe sha ma ai, namchyim n rawng ai dun-ye hpun ru ni hpe pyi sha nga ma hka!

⁵Shanhte gaw lagut ni hpe hkan marawn ma ai zawn masha shagu hte mung shanhte hpe jahtau jahtaw kau ma ai.

⁶Shanhte gaw ninggam makau hkan htu da ai ginlawng lungpu hku ni hta nga nga ma ai.

⁷Shanhte gaw dusat yam nga ni zawn maling hkan e shabam nna; nam singwum lapran hkan e rau matsut nga ma ai.

⁸Kadai mung shanhte a mying n chye ya lu ai masha angawk hpung mi rai nga ma hka! Shanhte gaw mungdan kaw nna jahtaw kau hkrum nga ma ai.

⁹Ya chyawm gaw, shanhte ngai hpe sa mani asawng nga ma ai; Ngai gaw hpa mi n rai la tim, shanhte hpe mani hpa shatai nngai.

¹⁰Shanhte gaw ngai hpe matsat ma ai; shanhte gaw nye a matu nau pyi kaja nga ga ai nga nna myit nawn da ma ai; shanhte gaw ngai kaw sa nna nye a myi man hpe mayen mahtaw bun ma ai.

¹¹Karai Kasang gaw ngai hpe n-gun shakya shangun nna matsan mayan hkrum shangun wu ai majaw, shanhte gaw ngai hpe sinpawt lahtet hte nhtang ninghkap ma ai.

¹²Ndai masha hpung mi gaw ngai hpe gasat nna sat kau na maw nga ma ai; shanhte ngai hpe jahtaw dat nna hpang jahtum htim gasat na hkyen ma ai.

¹³Shanhte gaw nye a hprawng lam hpe dan di nna, ngai hpe shamyit kau na maw nga ma ai; shanhte hpe hkum shadang lu ai wa nga ai n rai.

¹⁴Shanhte gaw nye a dahpran shara ni hpe adawt waw nna nye a ntsa e abrep ya mi ai.

¹⁵Ngai gaw hkrit hpa hte ka-up da ai hkrum nna, sa lai nbung zawn nye a sari sadang hpoi mat ai hte nye a ngamu ngamai lam gaw sumwi zawn mawng mat nga ai.

¹⁶Ya chyawm gaw ngai si wa na sha rai nga nngai; ngai hkam sha ai nni nkri a matu hkyamsa lam nga ai n rai.

¹⁷Shana e nye a nrut nra ni yawng machyi makret nna; dai nchyi nmu gaw ngai hpe galoi mung kawa machyi shangun nga ai.

¹⁸Karai Kasang gaw nye a du hkawp hpe magra jum nna; nye a hpun palawng ni hpe manai kanyup kau nga ai.

¹⁹Shi gaw ngai hpe hkumpup hta kabai bang ai; ngai gaw ga nhpu hta pyi grau hpa n tai nga nngai.

²⁰O Karai Kasang e, ngai nang hpe shaga ti mung, nang n htan ndai; ngai hpyi jahtau ti mung nang hpa zawn n nawn ya ndai.

²¹Nang gaw ngai hpe gumshem ai hku di nga ndai; na a daru magam n-gun mahkra hte ngai hpe zingri ndai.

²²Nang gaw ngai hpe nbung hte shapoi kau shangun ndai; nang gaw ngai hpe nbung laru hta agrawp mani kau shangun ndai.

²³Nang gaw ngai hpe masha shagu a hpang jahtum na lam san da ya ai shara de mung, nye a si hkrung si htan lam de woi sa wa nga ndai hpe mung ngai chye nga nngai.

²⁴Nang gaw hten run mat sai wa hpe hpa majaw gasat nga n ta? Shi gaw matsan dum la na matu hpyi nem ai hta kaga hpa naw galaw lu a ta?

²⁵Ru tsang hkrum ai ten hta amyu masha ni hte rau ngai n hkrap a ni? Ra kadawn nga ai ni hte rau mung myit yu machyi ai n rai ni?

²⁶Ngai gaw kabu gara ai lam hte nhtoi hpe myit mada nngai; rai ti mung de a malai ru yak tsin-yam tsindam hte nsin sha pru wa nga ai.

²⁷Ngai gaw myit ru myit tsang ai hte nchyi nmu ai a majaw ashep ashin di hkrum nga nngai; ngai gaw lani hte lani nni nkri hkam sha nga nngai.

²⁸Ngai gaw jan n hkra ai nsin hta lamawm hkawm nngai; ngai gaw shawa man e rawt tsap nna karum la na matu hpyi jahtau nngai.

²⁹Nye a nsen gaw yawn hkyen ai hte garen gari ai nsen rai nga nna, nam gwi hte u gawla-uk a jahtau ai nsen zawn rai nga ai.

³⁰Nye a hkum hpyi chyang mat sali ai; nye a hkum kahtet machyi mat nga ai.

³¹Shawng de lang mi kabu gara ai sumpyi nsen hpe ngai na yu ai shara hta, ya gaw sharung shayawt ai hte hkrap ngu hkrap ngoi ai nsen hpe sha ngai na ni ai.