Read Jinghpaw Common Language Bible 2009 YOBA 31 Bible Online

YOBA 31 - Jinghpaw Common Language Bible 2009 bible

YOBA 31

¹Ngai gaw numsha langai hpe ngang gayut ai myi hte galoi mung n mada yu na ngu, ga sadi dagam da se ai.

²Chyahtum Chyalai N-gun Rawng Ai Karai Kasang gaw anhte hpe hpa galaw na ta? Shinggyim masha galaw ai arawn alai hpe shi gara hku bai htang jaw na ta?

³Shi gaw shut ai amu galaw ai ni hpe tsin-yam tsindam hte hten run lam dat dat ya nga ai.

⁴Ngai galaw ai amu magup hte hpe Karai Kasang chye nga ai; ngai htawt ai lagaw lahkam shagu hpe shi mu wu ai.

⁵N hkru ai amu hpe ngai galoi mung n galaw ai hte kaga masha ni hpe galoi mung n masu hkalem nga ai hpe ngai dagam nngai.

⁶Karai Kasang gaw ngai hpe man ai joi jang hte shen yu u ga; ngai kade wa mara n kap nga nngai hpe shi mu lu na ra ai.

⁷Ngai gaw lam kaja kaw na yit mat ai rai yang, ngai hkum nan n hkru ai de myit kap mat u ga; nye a lata ni yubak galaw ai asai hte numsha nga ai rai yang,

⁸nye a nsi naisi jahten shaza kau hkrum nna; ngai hkai da ai lusha hpe kaga masha ni sha kau mu ga.

⁹Nye a htingbu wa a madu jan hpe ngai yu ra nna, shi a chyinghka shinggan e makoi gyem let ala nga ai rai yang,

¹⁰nye a madu jan mahtang kaga la wa a matu lusha shadu ya nna; kaga la wa a yup ra hta sa yup u ga.

¹¹Dai zawn re ai n hkru ai amu gaw si ari jaw ai hkrum ang nga ai.

¹²Dai gaw jahten shaza lu ai ngarai wan zawn rai nna, ngai lu malu mahkra hpe shamyit kau ya nga ai.

¹³Nye a shangun ma ni hta na langai ngai hpe aput angun nga nna dangrang ai rai yang, shi tsun ai ga hpe ngai madat ya nna shi hpe rap rap ra ra galaw na we ai.

¹⁴Dai zawn ngai galaw ai rai yang, Karai Kasang hpe ngai kaning rai myi man madun lu na rai ta? Karai Kasang ngai hpe tara sa jeyang yang, ngai kaning ngu tsun lu na rai ta?

¹⁵Ngai hpe hpan da ai Karai Kasang nan nye a shangun ma ni hpe mung hpan da nga ai.

¹⁶Ngai gaw matsan mayan masha ni hpe galoi mung karum nngai; gaida gaina ni hpe mung galoi mung myit htum shangun ai n rai.

¹⁷Ngai lusha sha nga yang, jahkrai nmai ni hpe galoi mung kyet si shangun ai n rai.

¹⁸Nye a asak prat tup shanhte hpe lanu lahku ni ai.

¹⁹Ngai gaw bu hpun palawng mari la na matu nau matsan nna ra kadawn nga ai wa hpe mu ai shaloi,

²⁰nye a sagu hpung na lu la ai sagu mun hte da ai hpun palawng shi hpe jaw nngai. Shaloi shi a myit masin mahkra hte shi ngai hpe shakawn wu ai.

²¹Ngai gaw jahkrai ma hpe masu hkalem kau nna, tara rung e dara dang kau lu ai hpe chye ai rai yang,

²²nye a lata lahpum daw agrawp mat nna; nye a lahpa gyi mat mai nga ai.

²³Karai Kasang a ari hpe ngai hkrit ai majaw, dai zawn re ai amu ngai galoi mung galaw lu nngai n rai.

²⁴Ngai gaw sut gan ni hta galoi mung kam hpa ai n rai

²⁵nye a sut gan hta galoi mung gumrawng nngai n rai.

²⁶Ngai gaw jan a htoi kabrim ai shingkang hpe mung, shata a tsawm htap ai shingkang hpe mung galoi n nawku nngai.

²⁷Shanhte hpe hkrit hkungga na matu nye a lata pup ai hku nna mung, shanhte hpe shagrau sha-a na matu mung, ngai lam woi nhkyeng mat wa yu nngai n rai.

²⁸Dai zawn re ai yubak mara gaw si hkrung si htan hte ari jaw ai hkrum ging nga ai. Dai gaw Chyahtum Chyalai N-gun Rawng Ai Karai Kasang hpe nyet kau nga ai.

²⁹Nye a gumlau hpyen ni nni nkri hkrum sha yang, ngai galoi mung kabu nngai n rai; shanhte ru yak tsin-yam tsindam hkrum yang, ngai galoi mung ra sharawng nga nngai n rai.

³⁰Shanhte a si hkrung si htan a matu hpyi nem ya ai hku, galoi mung yubak galaw nngai n rai.

³¹Nye a matu amu galaw ya ai masha ni yawng mung, tsasam masha ni hpe galoi mung ngai hkalum la nga nngai hpe chye ma ai.

³²Ngai gaw malet nhprang manam ni hpe nye a nta de shang na saw shaga nngai; shanhte hpe galoi mung nmaw lam ntsa e yup shangun nngai n rai.

³³Kaga masha ni gaw shanhte a yubak mara ni hpe makoi shakut ma ai; rai ti mung, ngai chyawm gaw galoi mung makoi ip da ai n rai.

³⁴Masha ni ngai hpe kaning nga tsun na lam hpe ngai galoi mung n hkrit nngai; shanhte a jahpoi asawng ai ga hpe ngai hkrit nngai majaw, nhku kata e rawng nna galoi mung atsin sha nga nngai n rai.

³⁵Ngai tsun nga ai ga hpe kadai madat ya na rai ta? Ga hkum shagu gaw teng man nga ai hpe ngai dagam lu nngai. Chyahtum Chyalai N-gun rawng ai Karai Kasang gaw ngai hpe htan ya u ga law. Ngai hpe shingjawng kashun ai wa ngai hpe ninghkap nna mara shagun ai laika ka ai rai yang, dai ni hpe ngai mu lu n-ga law.

³⁶Ngai gaw dai ni hpe nye a lahpa ntsa hta gumrawng ai hte hpun sumli da lu nna, nye a baw hta janmau zawn mara da lu na nngai.

³⁷Ngai galaw ai amu magup hte Karai Kasang hpe tsun dan nna; shi a man e nye a baw sharawt da lu na nngai.

³⁸Ngai gaw yi hkauna galaw ai lamu ga hpe lagu daw la nna sun madu a lata kaw na ngai la nhtawm,

³⁹dai hta tu ai nsi naisi lusha hpe ngai sha nna, yi hkauna galaw ai ni hpe kawsi kyet si shangun ai rai yang,

⁴⁰hkaulan mam hte muk-yaw mam a malai tsingdu tsingman ni hte ju hpun ni tu nga u ga law. Yoba tsun ai ga ni htum sai.