Read Jinghpaw Common Language Bible 2009 YOBA 34 Bible Online

YOBA 34 - Jinghpaw Common Language Bible 2009 bible

YOBA 34

¹Nanhte gaw hpaji grai rawng nna grai myit let ai ni rai nga myit dai; ya, ngai tsun nga ai ga na la mu.

³Nanhte lusha chyim yu myit dai shaloi kaja ai lusha rai nga ai hpe chye nga myit dai, rai ti mung, shanhte tsun ai ga na ai shaloi, dai gaw hpaji n rawng ai ga rai nga ai.

⁴Dai amu hpe daw dan na gaw anhte a amu rai nga ai.

⁵Yoba gaw mara n kap nga ai nga nna shi tsun ai majaw, teng man rap ra ai tara shi hpe jaw na matu Karai Kasang n hkraw nga ai.

⁶Shi chyawm gaw, “Ngai shut nga nngai, nga nna ngai kaning rai tsun masu lu na rai ta? Ngai gaw si na daram hkala nba hkrum nga ti mung, ngai yubak lu nngai n rai,” ngu nna san wu ai.

⁷Nanhte gaw ndai Yoba zawn re ai masha kadai hpe mu yu manit ni? Shi gaw Karai Kasang hpe hkrit hkungga ai lam galoi mung n madun nga ai.

⁸Shi gaw n hkru ai masha hpung mi hpe yu sharawng ai hte yubak kap ai ni hte rau hkawm kayin nga ai.

⁹Shi gaw Karai Kasang a sharawng awng ai lam hkan shakut na matu mai kaja lam hpe galoi mung n galaw nngai, nga nna tsun ai.

¹⁰Myit su salang ni e, nye a ga madat mu! Chyahtum Chyalai N-gun Rawng Ai Karai Kasang gaw shut ai amu galaw na rai wu ni?

¹¹Shi gaw shanhte galaw ai amu hte maren masha ni hpe jahpu jaw nga ai; shanhte hkam la ging ai hte maren shanhte hpe di mu ai.

¹²Chyahtum Chyalai N-gun Rawng Ai Karai Kasang gaw n hkru ai amu n galaw nga ai; shi gaw galoi mung n tara ai hku kadai hpe mung n galaw nga ai.

¹³Karai Kasang gaw shi a daru magam n-gun, marai langai ngai kaw na hkam la nga a ni? Marai langai ngai shi hpe ndai mungkan ga a hpareng hku san tawn da a ni?

¹⁴Karai Kasang gaw nsoi nsa dawm la kau ya ai rai yang,

¹⁵hkrung mahkrung shagu gaw si mat wa nna, ga nhpu de nhtang mat wa na mara ai.

¹⁶Nanhte hpaji rawng nga myit dai rai yang, ya nye a ga madat mu.

¹⁷Nanhte gaw ding hpring ai Karai Kasang hpe daw dan nga myit ni? Shi gaw teng man rap ra ai tara hpe n dawng nga ai ngu, nanhte myit nawn da mu ni?

¹⁸Karai Kasang mahtang hkawhkam ni hte mung up du ni lachyum n pru ma ai hte tara n lang nga ma ai shaloi daw dan nga ai.

¹⁹Shi gaw masha shagu hpe hpan da nga ai majaw, mung up du ni hpang maga n lawm, matsan mayan masha ni hta sut su ai ni a myi man tau ya ai n rai.

²⁰Masha gaw shana e akajawng sha si mat mai nga ai; Karai Kasang gaw masha hpe adup galau ai rai nna; shanhte hten za mat ma ai; shi gaw chyalai n-gun rawng ai ni hpe pyi n shakut shaja ra ai sha sat kau nga ai.

²¹Shi gaw masha a lahkam shagu hpe mada yu nga ai.

²²Mara kap ai wa Karai Kasang a man kaw na makoi nga lu hkra, sin mang ai nsin n nga nga ai.

²³Anhte a matu hkawm sa wa na lam hte shi a lata hte tara jeyang na matu, Karai Kasang hta aten masat da ya ra ai n rai.

²⁴Ningbaw ni hpe la kau na matu hte shanhte a hkang hta kaga ni bai shang wa na matu shi hta sawk sagawn la ra ai lam n ra nga ai.

²⁵Shanhte hpa galaw nga ai hpe shi chye ai majaw; shi shanhte hpe shana e gumpye kau nna adup mani kau wu ai.

²⁶Shi gaw masha yawng mu lu ai shara hta yubak kap ai ni hpe ari jaw nga ai,

²⁷hpa majaw nga yang shanhte gaw shi a hpang n hkan ai hte shi a hkang da ai ga yawng hpe hpa zawn n nawn ya mu ai.

²⁸Shanhte gaw Karai Kasang hpe jahtau na matu matsan mayan masha ni hpe shadut ma ai; shi gaw karum la na matu shanhte jahtau ai nsen hpe na wu ai.

²⁹Karai Kasang gaw hpa mung n galaw na hku daw dan ai rai yang, kadai mung shi hpe sharu lu ai n rai. Shi a myi man makoi kau ai rai yang, masha gaw karum la lam kata rai na wu ai.

³⁰Shanhte hpe up hkang nga ai kaw nna karai kata dip lu dip sha ai masha ni hpe hkum ban lu na matu, masha amyu baw ni galaw lu ai amu hpa mung n nga nga ai.

³¹Yoba e, Karai Kasang kaw na a yubak mara hpyi raw nit ni? Yubak mara bai n galaw hkrup na matu ga sadi jaw nit ni?

³²Na a shut hpyit mara madun dan na matu Karai Kasang kaw hpyi nem yu sani? N hkru n shawp ai amu galaw ai hpe jahkring kau na matu nang myit hkrum nga n ni?

³³Karai Kasang galaw ai amu hpe nang ningdang kau nga ndai majaw, nang ra ai hpa hpe mung shi galaw ya na re ngu, nang myit mada lu nga n ni? Dai daw dan ai gaw nye a matu n rai, na a matu rai nga ai; ya chyawm gaw nang hpa myit ai lam anhte hpe tsun dan mi.

³⁴Zai byeng-ya rawng ai wa kadai mung teng teng myit hkrum wa nna; shi tsun ai ga hpa mung lachyum n pru nga ai, nga nna tsun na ra ai.

³⁵Yoba gaw angawk angak ga tsun nna, shi tsun ai ga hpa mung lachyum n pru nga ai ngu nna tsun na ra ai.

³⁶Yoba tsun ai ga magup shagu hpe myit yu mu; shi gaw n hkru ai masha wa zawn tsun nga ai hpe nang mu lu na rin dai.

³⁷Shi gaw yubak hta gumlau ai bai jat nna; anhte yawng a man e Karai Kasang hpe shi ashu kau nga ai.