Read Jinghpaw Common Language Bible 2009 YOBA 36 Bible Online

YOBA 36 - Jinghpaw Common Language Bible 2009 bible

YOBA 36

¹Karai Kasang a malai ngai tsun nga ai ga hpe hkam sharang let chyahkring mi madat la u.

³Nye a machye machyang gaw dam lada nga li ai; ngai chye ai hpa hpe mung akyu jashawn na nngai. Nye a Hpan Madu, Karai Kasang teng man nga ai hpe madun dan na nngai.

⁴Nang hpe tsun dan ai lam hpa mung shut ai n rai; nang gaw teng man ai hpaji rawng masha garai n tai yang nang mu nga ndai.

⁵Karai Kasang gaw kade sha n-gun ja nga a hka! Shi gaw kadai hpe mung n kaw n law di ai n rai; shi n chye na ai lam hpa mung nga ai n rai.

⁶Shi gaw yubak kap ai ni hpe asak hkrung nga shangun ai n rai; shi gaw matsan mayan masha ni hpe teng man ai hku tut nawng daw dan ya nga ai.

⁷Shi gaw ding hpring ai ni hpe makawp maga nga ai; shi gaw shanhte hpe hkawhkam ni zawn up hkang lu na ahkang jaw wu ai hte htani htana shagrau sha-a ai hkrum shangun nga ai.

⁸Rai ti mung, amyu masha ni sharen da ai hkrum nna, shanhte galaw ai amu a majaw nni nkri hkrum sha ai rai yang,

⁹Karai Kasang gaw shanhte a yubak mara ni hte gumrawng ai lam hpe madun dan na ra ai.

¹⁰Shi gaw shanhte hpe n hkru n shawp ai kaw nna kayin wa na matu shi a shadum jahprang ga hpe madat shangun nga ai.

¹¹Shanhte gaw Karai Kasang a ga madat mara nna shi hpe daw jau ai rai yang, shanhte gaw ngamu ngamai nna ngwi pyaw sim sa ai hte nga lu na mara ai.

¹²Rai ti mung, dai hku n rai yang shanhte gaw angawk angak rai si mat wa nhtawm, katsan ga kata de rap kawt mat wa na mara ai.

¹³Karai kata ni gaw masin apawt nga nna shanhte ari jaw hkrum yang pyi, karum la na matu akyu hpyi ma ai n rai.

¹⁴Shanhte gaw naw kaji nga yang si mat nna; jahpoi asawng ai asak hkrun lam a majaw hki ba na mara ai.

¹⁵Rai ti mung, Karai Kasang gaw masha hpe nni nkri jahkrum ai hku nna sharin nga ai; shanhte a myi hpaw wa na matu myit ru myit yak lam hpe mung lang nga ai.

¹⁶Karai Kasang gaw nang hpe ru yak tsin-yam tsindam kata kaw na shaw la let nang hpe shim lum ai hte kabu gara shangun nga ai; na a sha ku gaw malu masha hte sumpum nga ai.

¹⁷Rai ti mung, ya chyawm gaw nang hkam la ging ai hte maren, ari jaw hkrum nga ndai.

¹⁸Mayun kumhpa gaw nang hpe n hkalem kau u ga; sut su ai mung nang hpe lam n shadam kau u ga, sadi nga u.

¹⁹Karum la na matu hpyi jahtau ti mung, dai gaw nang hpe mai kaja ai lam hpa mung galaw ya na ra ai n rai; na a n-gun mahkra gaw ya e nang hpe karum ya lu na n rai.

²⁰Shana du na hpe hkum ra marit; amyu baw ni hten mat ai aten du wa na ra ai.

²¹N hkru ai de n kayin mat wa na matu sadi u; na a nni nkri hkam sha ai gaw n hkru ai amu galaw ai kaw nna shingdang shangun nga ai.

²²Karai Kasang a daru magam n-gun kade kaba nga ai hpe dum u; shi gaw yawng hta kaba htum ai sara rai nga ai.

²³Karai Kasang hpa galaw ai hpe kadai mung n tsun lu ai; n hkru ai amu galaw nga ai nga nna shi hpe kadai mung mara tam lu ai n rai.

²⁴Shi galaw ai amu a majaw, shi gaw tut nawng shakawn shagrau hkrum nga nu ai; nang mung shi hpe shakawn kungdawn lu na rai ndai.

²⁵Kadai mung shi galaw dan nu ai amu hpe mu masai; rai ti mung, anhte chyawm gaw tsan tsan kaw nna chyu sha dai hpe mada yu lu ga ai.

²⁶Shi a galu kaba ai lam hpe anhte tup hkrak chye lu ga ai n rai; shi a shaning ni kade law nga ai hpe kadai n dang hti lu nga ai.

²⁷Ginding aga kaw na hka salu hpe la nhtawm, marang shatai dat ai wa gaw Karai Kasang rai nga ai.

²⁸Shi gaw sumwi kaw na marang ru dat nhtawm shinggyim masha yawng a matu jahtu dat wu ai.

²⁹Sumwi ni kaning rai mawng bra wa ai hte; Karai Kasang shanu nga ai sumsing lamu hku kaning rai mu ngoi nga ai hpe kadai mung chye lu ai n rai.

³⁰Shi gaw sumsing lamu ting hpe nhtoi htoi shangun ti mung, sung ai panglai shara hta naw sin nga ai.

³¹Ndai gaw amyu masha ni hpe shi kaning rai jaw lu jaw sha ai hte malu masha n taw n tsang garan jaw ai lam rai nga ai.

³²Shi gaw shi a lata hte myihprap wan lang nna; masat shara achye hkra na matu hkang da nga ai.

³³Mu ngoi ai gaw nbung laru ni wa ai hpe ndau tsun nga ai; dai aten ladaw du wa nga ai hpe dumsu ni chye ma ai.