Read Jinghpaw Common Language Bible 2009 YOBA 37 Bible Online

YOBA 37 - Jinghpaw Common Language Bible 2009 bible

YOBA 37

¹Dai nbung laru gaw nye a myit masin hpe grai kahpra mat hkra htuk htak shangun nga ai.

²Nanhte yawng hte e, shi a n-gup kaw na pru wa ai mu ngoi ai Karai Kasang a nsen hpe madat mu.

³Shi gaw sumsing lamu a npu lai, ginding aga a jahtum shara mi kaw nna kaga shara mi de hkren myihprap gala shangun nga ai.

⁴Dai hpang, myihprap wan gala nga ai hte yang, mu ngoi ai nsen kaba hte shi a shabam ai nsen hpe na lu nga ai.

⁵Karai Kasang a hkang da ai ga gaw galu kaba ai amu ni, anhte n chye na lu ai mauhpa amu ni shabyin dat nga ai.

⁶Shi gaw ginding aga ntsa e hkyen hkrat na hkang da nhtawm; marang mahpawng laru marang dat dat nga ai.

⁷Shi gaw anhte galaw ai amu jahkring da nna; shi galaw lu ai amu anhte hpe madun dan nga ai.

⁸Matse labye dusat ni shanhte a lungpu hku de shang ma ai.

⁹Dingda maga de na nbung laru wa ai hte dingdung maga de na makret machyi hkra katsi ai nbung bung nga ai.

¹⁰Karai Kasang a nsa hte gawut dat jang hka ni ge mat nna; dai gaw ja ai hkyen tai mat nga ai.

¹¹Myihprap wan gaw sumwi ni kaw na gala pru nga ai,

¹²dai ni gaw Karai Kasang myit ra ai hku shamu hkawm ma ai. Shanhte gaw Karai Kasang hkang da ai hte maren mungkan shara shagu hkan e amu galaw ma ai.

¹³Karai Kasang gaw ginding aga hpe madit na matu marang jahtu nga ai; anhte hpe ari jaw na matu mung, anhte hpe shi a myi man pa lam madun na matu mung, dai hpe shi shangun dat nga ai.

¹⁴Yoba e, hkring mi hkring nna madat u; Karai Kasang galaw ai mauhpa amu ni hpe myit sumru yu u.

¹⁵Karai Kasang gaw kaning rai hkang da ai ga jaw ai hte sumwi ni kaw na myihprap wan gala shangun nga ai hpe nang chye n ni?

¹⁶Sumwi ni kaning rai sumsing lamu hta mawng nga ai mung, Karai Kasang a mauhpa kungkyang ai amu hpe mung nang chye n ni?

¹⁷N rai law, dingda nbung gaw lamu ga hpe dip sa-up da yang, nang chyu sha kahtet kang ai hta nni nkri hkrum lu na ndai.

¹⁸Nang gaw sumsing lamu hpe kahpyan da nna, dai hpe shatsawm da ai nhprang arai hpe ja gumdin shangun ai Karai Kasang hpe karum lu a ni?

¹⁹Karai Kasang hpe kaning ngu tsun na lam anhte hpe sharin ya mi; Anhte a myit ni gaw kaman rai nga ai majaw anhte hpa n chye tsun ga ai.

²⁰Karai Kasang hte ga shaga na n wam nngai; hpa majaw ngai hpe jahten shaza na ahkaw ahkang ngai shi hpe jaw ang na rai ta?

²¹Ya chyawm gaw sumsing lamu na nhtoi gaw htoi tu kabrim nna, anhte a matu dai hpe mada yu na, nau wa htoi kabrim nga ai; nbung hte sumsing lamu hpe ye jasan kau nga ai.

²²Dingdung maga de aja zawn htoi gala nga ai hpe mu lu nga ai, Karai Kasang a hpung shingkang gaw anhte hta hkrit hpa hte hpring nga ai.

²³Karai Kasang a daru magam n-gun gaw grai galu kaba nga ai rai nna; shi a makau de anhte shani sa lu ga ai n rai; shi gaw shinggyim masha ni hte kanawn mazum ai hta ding hpring nna teng man nga ai.

²⁴Masha shagu shi a man e hkrit let tsap nga ai gaw mauhpa amu n rai nga ai; hpaji rawng nngai nga nna tsun ai ni hpe shi hpa n nawn ya wu ai.