Read Jinghpaw Common Language Bible 2009 YOBA 38 Bible Online

YOBA 38 - Jinghpaw Common Language Bible 2009 bible

YOBA 38

¹Dai hpang dai MADU gaw Yoba hpe nbung laru kaw nna ga shaga wu ai.

²Nye a hpaji byeng-ya hpe na a myit n su ai lam hte ga laban ni hte san ai nang gaw kadai wa rai nga n ni?

³Ya chyawm gaw, ading jan rawt tsap ai hte ngai nang hpe san ai ga san ni hpe htai u.

⁴Mungkan ga hpe ngai hpan da ai shaloi, dai yang e nang nga nga a ni? Nang grai chye ai rai yang, dai hte seng ai lam ngai hpe tsun dan e.

⁵Dai gaw kade daram dam lada ang ai hpe kadai daw dan a ta? De a ntsa e shadawn sumri hpe kadai gran da a ta? Dai mahtai ni yawng hpe nang chye n ni?

⁶Ginding aga hpe madi da ai shadaw ni hpe kaning di sharawt da a ta? Mungkan ga a njut nlung hpe kadai jahkrat a ta?

⁷Dai shani a jahpawt nhtoi htoi wa ai aten hta shagan ni rau sha mahkawn shakawn nna, sumsing sha ni kabu gara jahtau garu ma ai.

⁸Panglai gaw ginding aga a kan kata kaw nna kahpawk pru wa yang, kadai wa dai chyinghka ni hpe la shingdang da nga a ta?

⁹Ngai gaw panglai hpe sumwi hte ka-up da nna; dai hpe nsin hta kayawp bang da nngai.

¹⁰Ngai gaw panglai jarit ni hpe masat tawn da nna dai hpe chyinghka htinggrang ni hte shingdu kaw nna makawp da nngai.

¹¹Ngai gaw dai hpe, “Ndai kaw sha du, htawra kaw nna n lai lu! Ndai yang e na a n-gun kaba rawng ai hka leng ni sim mat lu na,” ngu nna tsun nngai.

¹²Yoba e, nang gaw na a prat tup jahpawt manap hpe tut e hkang da na ngu wu ni?

¹³N hkru ai ni hpe shanhte a makoi gyem shara ni kaw nna jahtaw kau lu hkra, ginding aga a jut shingnaw du hkra jahpawt nhtoi htoi leng shangun na nang hkang da nit ni?

¹⁴Shani nhtoi gaw kawng ni hte kadit ni hpe hpun palawng kahtap da ai zawn dan dawng shangun nga ai, kagam ga ntsa e dazik dawk da ai hkang zawn asan sha rai nga ai.

¹⁵Shani nhtoi gaw n hkru ai ni a matu nau wa htoi kabrim nga ai shanhte galaw ai kashun kashe du daw sai hkaw amu hpe shingdang da lu nga ai.

¹⁶Nang gaw sung ai panglai kata na hka hpawk de shang yu sani? Nang gaw nammukdara htumpa a ntsa e hkawm yu sani?

¹⁷Nang hpe kadai wa sin mak ai katsan ga hpe sin ai chyinghka ni hpe madun yu sani?

¹⁸Mungkan ga kade kaba nga ai hpe nang myit yu n ni? Nang chye ai rai yang, ngai hpe tsun dan e.

¹⁹Nhtoi gaw gara kaw na sa wa ai shing n rai nsin a npawt kanang na rai nga ai hpe nang chye n ni?

²⁰Dai ni kade daram tsan ai de du nna kaning rai bai nhtang du ai lam, nang madun dan lu n ni?

²¹Mungkan ga hpe hpan da yang, nang asak grai kaba nga nit dai majaw nang lu galaw na re, ngu ngai teng teng kam nngai.

²²Nang gaw ahkyen hte sin tawn da ai sut gawk ni de sa chyai yu nit ni?

²³Ngai gaw dai ni hpe ru tsang hkrum ai aten ni a matu hte majan gasat ai nhtoi ni a matu jin jin kyem da nngai.

²⁴Nang gaw jan pru lung wa ai shara de mung, sinpraw nbung bung wa ai shara de mung du yu sani?

²⁵Marang hka lwi na matu hka hkawng hpe kadai htu nna, mu ngoi ai nbung laru lam hpe kadai hpaw jasan a ni?

²⁶Kadai mung n nga ai shara hta kadai wa marang htu shangun a ta?

²⁷Tsingdu tsingman prut wa u ga, hkun hkraw nna hpang gara ai lamu ga hpe kadai hka madit ya a ta?

²⁸Marang mung, numri mung kawa lu a ni?

²⁹Hka ge hte hkyen tawng a kanu gaw kadai rai nga a ni?

³⁰Hka gaw nlung tai mat nna panglai hka man gaw hpa majaw ge mat a ni?

³¹Nang gaw kru majan ni hpe shabawn da ai hte Nhtoi Gintawng a shingkyit ni hpe kaw raw ya lu nga n ni?

³²Nang gaw shagan ni hpe ladaw hte ladaw woi shapraw lu ai hte dingdung maga na shagan majaw kaba hte dingda maga na shagan majaw kaji ni hpe woi awn lu n ni?

³³Sumsing lamu ni hpe up hkang ai tara ni a lam hpe nang chye ai hte dai ni hpe ga ntsa e akyu jashawn lu n ni?

³⁴Nang gaw sumwi ni hpe aming jaw jahtau tsun lu nna, dai ni hpe marang hte nang hpe madi shangun lu nga n ni?

³⁵Myihprap gala na matu nang hkang dat ai rai yang, dai gaw nang kaw sa nna, “Shi hpe hpa karum la na rai ta?,” ngu nna tsun na ra ai.

³⁶Nila hka nu tung wa na rai yang, ibis [3] ntsa malen u hpe kadai tsun a ta? Marang htu hkrat na rai yang ula hpe kadai tsun a ta?

³⁷Sumwi ni hpe hti lu hkra mung, ga nhpu ni gumdin nna

³⁸ga tawng ni ja ahkak mat yang dai ni a ntsa e marang ru shapraw dat lu hkra kadai wa hpaji rawng nga a ta?

³⁹Hkanghkyi ni shanhte a lungpu hku ni hta gyem makoi nna, hkanghkyi lawng ni hta hpum nga ma ai shaloi, nang gaw dai ni sha na lusha mu tam ai hte kawsi kyet ai hkanghkyi hkalung ni hpe jahkru shakat lu n ni?

⁴¹U hka ni kawsi nna nwan pyen nga yang mung, u hka hkalung ni lusha a matu ngai kaw hpyi jahtau yang mung, shanhte hpe kadai jaw sha a ta?