Read Jinghpaw Common Language Bible 2009 YOBA 39 Bible Online

YOBA 39 - Jinghpaw Common Language Bible 2009 bible

YOBA 39

¹Bum e nga ai aya ni galoi aten hta kasha hkai ai gaw nang chye n ni? Shan nga ni kasha hkai ai hpe nang mu yu nit ni?

²Dai ni shanhte a kasha ni hpe kade na hkra gun da nga ai hpe nang chye n ni? Shanhte shangai na aten hpe nang chye n ni?

³Dai ni galoi aten hta makan jahkrat dat nna shanhte a hkalung ni mungkan ga de prang mat wa ai hpe nang chye n ni?

⁴Dai hkalung ni gaw prang yang ga hkan e kaba wa ai hte n-gun ja wa ma ai rai nna hkawm mat wa nhtawm bai n wa ma ai.

⁵Lawze nhprang ni hpe kadai wa ndut ndang dat dat a ta? Dai ni brak hkawm mu ga, kadai wa shanhte hpe raw dat lu a ni?

⁶Ngai gaw dai ni hpe shanhte a shingbyi shara tai na nam mali jaw ni ai, dai ni gaw jum nga ai prang yang hkan shanu nga mu ga.

⁷Dai ni gaw garu kachyi nsen ngoi ai mare ni hte tsan ai shara e nga ma ai, kadai mung dai ni hpe amu galaw shangun na matu bik la lu ai n rai.

⁸Bum ni gaw dai ni a lusha udat shara ni rai nna, tsit lali ai hpa hpe mung tam sha nga ma ai.

⁹Hpawlam gaw na a matu hpa galaw ya na rai ta? Shi gaw na a wulawng hta lana mi sa rawng nga na sharawng nga a ni?

¹⁰Nang gaw shi hpe sumri hte gyit nna nahtai htai shangun ai hte, na a yi sun hkauna ni hpe masit shangun lu na a ni?

¹¹Shi a n-gun hpe nang kam nna na a li la ai amu galaw shangun na myit mada lu na n ni?

¹²Na a chyarang pa kaw na nsi naisi shinggyin la nna shu la sai hpe dum hta wa bang da na matu shi hpe myit mada nga n ni?

¹³U gawla-uk a singkaw ni kade sha lawan kahprap nga a hka! Rai ti mung u kawp ni zawn pyen lu ai n rai.

¹⁴U gawla-uk gaw shi a di ni hpe ga hta di nna; ga nhpu gaw dai ni hpe shalum ya nga ai.

¹⁵Lagaw hte dai ni hpe kabye agrawp kau na hte matse labye dusat dai ni hpe kabye ga kau na hpe shi n tsang nga ai.

¹⁶Dai udi ni gaw shi a n rai nga ai zawn shi galaw nga ai, kaman be be hpa n seng ai zawn shi nawn da wu ai.

¹⁷Dai gaw ngai shi hpe angawk shangun ai hte shi hpe hpaji byeng-ya n jaw ai majaw rai nga ai.

¹⁸Rai ti mung, shi kagat hpang wa yang, gumra hte gumra jawn ai wa hpe mani asawng lu nga ai.

¹⁹Dai zawn, Yoba e, gumra ni hpe n-gun grai ja shangun nna; dai ni a singgung mun ni hpe nang shatut ya lu n ni?

²⁰Dinggam-yaw ni zawn shi a sharat ai nsen gaw masha ni hpe jahkrit kajawng shangun ai hte shanhte hpe gumtawng shangun lu nit ni?

²¹Shanhte gaw kadit hkan na ga hpe lahkut sharawng nga ai rai nna; shanhte a n-gun mahkra hte majan de kanawng shang ma ai.

²²Shanhte gaw hkrit ai lachyum hpe n chye ma ai; kaning re ai nhtu hte mung shanhte hpe nhtang kau dat lu ai n rai.

²³Shanhte a jawn masha ni laknak ni hpai hkrawk hkrak ma ai rai nna; jan hta tu kabrim nga ma ai.

²⁴Myit kahtet ai hte gari ashun nga ai gumra ni shawng gat shingjawng ma ai rai nna, pahtau dum dat ai shaloi, shanhte naw tsap nga lu ma ai n rai.

²⁵Pahtau dum dat shagu shanhte a nsen sharat nga ma ai; shanhte garai n kahtep sa wa yang, hpyen majan sama rai nga ai hpe chye lu ma ai; shing rai du salang ni jahtau garu hkang dat ai ga ni hpe shanhte na ma ai.

²⁶Langji gaw shi a singkaw ni hpe kahpyan nna dingda maga de kaning rai pyen sa wa na lam nang kaw na sharin la nga a ni?

²⁷Langda gaw bum tsaw shara ni hkan tsip tsip na matu na a hkang da ai ga hpe ala chye nga ma ni?

²⁸Shi gaw tsaw htum ai lunghtawn ntsa hta shi a nga shara shatai nna; bum pungding masen ni hpe shi a shanu shara shatai nga ai.

²⁹Dai yang kaw nna, lama ma hpe htim sat sha na matu ni ai, tsan ai shara hkan e mada yu nga ai.

³⁰Si mang grup grup hkan e langda ni hpawng nga ma ai; langda hkalung ni mung asai lu ma ai.