Read Jinghpaw Common Language Bible 2009 YOBA 4 Bible Online

YOBA 4 - Jinghpaw Common Language Bible 2009 bible

YOBA 4

¹Yoba e, ngai ga shaga yang, nang sharu shatsang na wu ni? ngai gaw asim sha galoi mung lu nga nngai n rai.

³Nang gaw masha law law hpe sharin achyin ya nit dai, n-gun kya ai lata ni hpe n-gun shaja ya nit dai.

⁴Marai langai ngai ahtu kataw nna, n-gun kya ai hte hki ba mat jang, shi hpe shadaw shangang na matu na a ga ni hte n-gun jaw ya nga ndai.

⁵Ya chyawm gaw, nang ru yak tsin-yam tsindam hkrum na aten rai nga sai, nang gaw dai hpe hkrum kapa na matu nau wa sai kajawng nga ndai.

⁶Nang gaw Karai Kasang hpe nawku ndai, na a asak hkrun lam gaw mara shagun shara n nga nga ai; dai rai nna nang gaw kam hpa ai hte myit mada shara lu la ang nga ndai.

⁷Ya gaw, nhtang myit yu u. Ding hpring ai masha langai tsin-yam tsindam hkrum yu ai shara langai mi a amu langai madun u.

⁸Yubak hpe shawt nna, nli tum zawn n hkru ai hpe gat hkai ai masha ni hpe ngai mu yu se ai; ya chyawm gaw dai n hkru ai hte yubak hpe shanhte dan la nga ma ai.

⁹Karai Kasang gaw shi pawt sindawng ai majaw, shanhte hpe nbung laru zawn jahten shaza nga ai.

¹⁰N hkru ai gaw hkanghkyi ni zawn shabam nga ai, rai ti mung Karai Kasang gaw dai ni hpe shazim kau nna, shanhte a awa ni hpe agrawp daw kau ya nga ai.

¹¹Hpa mung n kawa sha lu ai hkanghkyi ni zawn, shanhte si mat nna shanhte a kashu kasha ni yawng bra ayai mat nga ai.

¹²Bai lang mi, mungga langai ngai kaw du ai, dai rai nna dai gaw grai sim ai hku du ai rai nna, ngai gaw dai hpe ganoi n na kau lu nngai.

¹³Dai gaw ngai yup pyaw nga yang yup dip zawn ngai hpe sharu shatsang nga ai.

¹⁴Ngai gaw hkrit gari ai hte gari gawa rai mat nngai; nye a hkum ting hkrit kahpra ai hte ashun mat nga li ai.

¹⁵Nbung bungtsin gaw nye myi man hpe ahpawt hkra ai rai nna, hkrit kajawng ai hte ngai hta nshung si hprwi nga wa ai.

¹⁶Ngai gaw dai yang e lama mi tsap nga ai hpe mu lu nna, mau nngai, rai ti mung, dai hpa rai nga ai hpe n lu tsun dan nngai. Dai hpang atsin zim nga ai kata na nsen langai na nngai:

¹⁷dai gaw, “Karai Kasang a man e kadai wa ding hpring lu a ni? Kadai wa shi a Hpan Wa Ningsang Wa a man e san pra lu a ni?

¹⁸Karai Kasang gaw shi a sumsing shangun ma ni hpe n kam nga ai; shi gaw shi a lamu kasa ni hta pyi shut ai mara mu tam nga ai.

¹⁹Ga kagam hkrung kanu hte manut zawn jahten shaza kau lu ai ga nhpu arai ni hta shi kam na ra ai ngu, nang myit nawn da wu ni?

²⁰Masha gaw jahpawt e naw hkrung nga ga ai, rai ti mung shana de garai n du yang, hpa n tsun ai sha si mat mai nga ga ai.

²¹Masha lu ai arai yawng mayawng gaw dawm la kau hkrum nga ai; hpaji byeng-ya naw ra kadawn nga yang, masha gaw si mat chye nga ai.”