Read Jinghpaw Common Language Bible 2009 YOBA 41 Bible Online

YOBA 41 - Jinghpaw Common Language Bible 2009 bible

YOBA 41

¹Nang gaw baren numraw Lewihtan hpe nga myek hte rim la lu na rai ni? Shing n rai, mahkam kata hta shi a ladi hpe gyit lu na n ni?

²Nang gaw shi a ladi hpe sumri hte lashoi shoi nna, shi a shakap hpe chyinghkyi hte mahkai la lu na n ni?

³Shi hpe sa shangun na matu shi nang hpe hpyi lajin na rai wu ni? Shi gaw nang hpe matsan yu dum la na matu hpyi nem na rai wu ni?

⁴Shi gaw nang hpe htani htana daw jau na matu ga sadi jaw nna nang hte myit hkrum ga shaka tawn da na rai wu ni?

⁵Na a shangun ma numsha ni hpe myit shapyaw ya ai arai lama ma zawn mung, shingnyeng ginsup ai ntsa malen u zawn nang shi hpe manang shatai la na rai wu ni?

⁶Nga hkan sha ai ni gaw shi hpe manu dara na rai ma ni? Hpaga yumga ga ai ni mung shi hpe kahtam dut na rai ma ni?

⁷Nang gaw shi a hpyi hpe nga galun ai nri ni hte mung, shi a baw hpe nri hte galun waw ya lu na rai ni?

⁸Shi hpe lang mi sha hkra yu ai hte nang galoi mung bai shakut mayu na ndai n rai; dai gasat gala ai hpe nang galoi mung malap kau lu na rin dai n rai.

⁹Lewihtan hpe mu ai kadai rai ti mung myit htum n-gun daw mat nna, ga de kadawng taw mat na ra ai.

¹⁰Shi bai bu wa nna masin pawt wa ai shaloi, kadai mung shi a man e tsap gwi nga ai n rai.

¹¹Shi hpe kadai gasat lu nna naw shim nga lu na rai ta? Ndai mungkan ga masha ni kadai mung dai hpe galaw lu ma ai n rai.

¹²Lewihtan lagaw a lam ngai nang hpe tsun dan de ga; shi kade wa galu kaba ai hte n-gun rawng ai hpe tsun dan na nngai.

¹³Shi a ntsa palawng hpe kadai mung gang je kau lu ai n rai; shi hpun sumraw da ai hpri palawng hpe kadai mung achyaw galun lu ai n rai.

¹⁴Nyin jahkrit lu ai awa grup grup rawng ai shi a shakap ni hpe kadai wa mahka shangun lu a ta?

¹⁵Shi a shingma hpe ninggang ni hte hkrep da nna gyit shangang da nga ai majaw nlung zawn ja nga ai.

¹⁶Langai hte langai gaw htep htep matut hkat nga ai rai nna, nbung pyi de a lapran de shang lu ai n rai.

¹⁷Dai ni yawng gaw shada da grai ngang kang ai hte shakap da nga ai; dai ni hpe hpa arai hte mung gang ashin kau lu nga ai n rai.

¹⁸Shi kahti yang htoi kabrim nga nna; shi a myi gaw ajan rawt lung wa ai zawn htoi tu nga ai.

¹⁹Shi a n-gup hta na wan shinglet grung pru wa nhtawm, wan num-ya ni kamawng pru nga ai.

²⁰Shi a ladi hku kaw na wan hkut mawng pru wa ai hte dai gaw di npu e tsing ni hte nat shamawng ai wan hkut zawn rai nga ai.

²¹Shi nsa sa jang, wan hkru hpang wa nna; shi a n-gup kaw nna wan shinglet pru nga ai.

²²Shi a du gaw grai n-gun rawng nga ai; shi hte hkrum katut ai ni yawng hkrit gari nga ma ai.

²³Shi a hpyi shan hta kya ai shara n nga nga ai; dai gaw n ju kapru kau ai hpri zawn ja nga ai.

²⁴Nlung zawn ja ai shi a salum gaw hkrit myit rawng ai n rai; dai gaw htumrin nlung zawn ja nga ai.

²⁵Shi rawt lung wa yang n-gun ja htum ai ni pyi hkrit kajawng mat ma ai; shanhte gaw matsan mayan hkrum ai hte hkrit nga ma ai.

²⁶Shi hpe ningma shakap ya na nhtu nga ai n rai; shi hpe machyi hkra shangun lu ai nri, pala hte galun htinggrang lu ai laknak nga ai n rai.

²⁷Shi a matu hpri gaw yihku zawn, magri mang gaw tsam mat ai hpun zawn rai nga lu ai.

²⁸Shi hpe hprawng jahtaw shangun lu ai pala nga ai n rai; shi hpe lunghkrung hte kabai bun ai gaw yihku nhtan zawn rai nga ai.

²⁹Shi a matu bat bau gaw yihku hkyep langai zawn sha rai nna; masha ni nri jinghkyen bun yang shi mani nga ai.

³⁰Shi a kan hta kap ai asep ni gaw di bu chyen ni zawn rai nna; dai ni gaw hkumpup ga hpe masit ya ai nahking zawn rai nga ai.

³¹Shi gaw panglai hpe prut nga ai hka zawn shalut kabrawng dat nna; di prut ai zawn abawp pru shangun nga ai.

³²Shi lai wa ai lam hkang gaw tu ala nga ai rai nna; panglai hpe hkumbawp hpraw shatai kau wu ai.

³³Ndai ginding aga ntsa e shi hte shadawn mai ai hpa mung n nga nga ai; shi gaw hkrit tsang shara hpa mung n nga ra ai hkrung kanu rai nga ai.

³⁴Gumrawng htum ai dusat ni hpe pyi shi yu kaji nga ai; shi gaw matse labye ni yawng a hkawhkam rai nga ai.