Read Jinghpaw Common Language Bible 2009 YOBA 6 Bible Online

YOBA 6 - Jinghpaw Common Language Bible 2009 bible

YOBA 6

¹Nye a ru yak tsin-yam tsindam ni hte yawn hkyen ai lam ni hpe joi hta shen yu ai rai yang,

³dai ni gaw panglai zaibru ni hta grau li na rai nga ai, dai rai nna nye a matsa ai ga hte nang hpe shamau ang ai n rai.

⁴Chyahtum Chyalai N-gun Rawng Ai Karai Kasang gaw ngai hpe pala ni hte gap jung nna, dai ni a agung gaw nye a hkum kata de tsim shang wa ai. Karai Kasang gaw ngai hpe ninghkap na matu hkrit hpa lam ni hpe dingren da nu ai.

⁵Lawze gaw tsingdu lu makret nga yang, myit dik nga ai; dumsu kanu gaw yihku lu maya nga yang, zim nga ai.

⁶Rai ti mung jum n bang ai lusha hpe kadai wa n chyim ai sha sha lu a ni? Udi kata na hpyi hpraw hta hpa baw nam chyim rawng a ta?

⁷Dai zawn re ai lusha gaw ngai hta n-gup namta n nga nga li ai; ngai sha ai lusha shagu mung ngai hpe machyi shangun nga ai.

⁸Karai Kasang gaw ngai hpyi ai hpe hpa majaw n jaw lu na rai ta? Shi gaw nye a akyu hpyi ga hpe hpa majaw n htan ya lu na rai ta?

⁹Shi shawng sa magang nna ngai hpe sat u ga!

¹⁰Shi dai hku galaw na wu ai hpe ngai chye taw gaw, dai nni nkri kade wa kaba nga ti mung, ngai kabu gara gumlawt na nngai. Karai Kasang gaw chyoi pra nga ai hpe ngai chye nngai; ngai gaw shi hkang da ai ga hpe galoi mung n ninghkap kau nngai.

¹¹Ngai ahkrung nga na matu hpa baw n-gun rawng ra a ta? Myit mada shara n nga sayang, ngai hpa majaw naw hkrung nga na rai ta?

¹²Ngai gaw nlung hte galaw da hkrum nga nngai kun? Nye a hkum shan gaw magri mang rai nga a ni?

¹³Ngai gaw nye hkum hpe mawai la na n-gun hpa mung n rawng sali ai; karum lam a matu ngai kayin hkawm lu ai shara n nga sai.

¹⁴Ngai gaw Karai Kasang hpe kau ai mi rai rai, n kau da ai mi rai rai, ndai zawn tsin-yam tsindam hkrum ai aten hta myit magam rawng ai manang ni hpe ngai ra nngai;

¹⁵Rai ti mung, nanhte, nye a manang ni e, nanhte chyawm gaw marang n htu yang hkun hkraw mat ai hka shi ni zawn ngai hpe masu nga myit dai.

¹⁶Dai hka shi ni gaw hkyen hte ntsin ge ni hte magap da ti mung,

¹⁷kahtet ai shaloi, byawng mat wa nna, hka lam ni dawng pru wa ai hte hkun hkraw mat nga ai.

¹⁸Hpaga ga ai ni gaw hka tam shamat kau ma ai; shanhte brak hkawm let nam mali kata si mat ma ai.

¹⁹Sheba hte Tema mung na hpaga ni tam sawk ma ai,

²⁰rai ti mung dai hkun hkraw ai hka shi ni a makau du jang, shanhte myit htum mat ma ai.

²¹Nanhte gaw nye a matu dai hka shi ni zawn rai nga myit dai; nanhte gaw nye a hkrit hpa gam maka hpe mu nna hkrit kanung nga myit dai.

²²Ngai gaw nanhte hpe kumhpaw kumhpa jaw mi ngu nna mung, nye a matu marai langai ngai hpe mayun kumhpa jaw ya mi ngu nna mung,

²³gumlau hpyen shing n rai gumshem magam wa a lata kaw nna ngai hpe hkye la mi law, ngu nna ngai hpyi yu a ni?

²⁴Rai sa, ngai hpe sharin ya mi; nye a mara ni tsun dan mi. Ngai azim sha nga nna nanhte a ga madat na nngai.

²⁵Ding man ai ga gaw chye na shangun nga ai, rai ti mung nanhte mahtang ga laban shaga nga myit dai.

²⁶Ngai shaga nga ai ga gaw kaman lila hte nbung sha re, ngu nna nanhte myit nawn da myit dai; dai rai yang, nye a myit htum ga ni hpe nanhte hpa majaw htan myit ni?

²⁷Nanhte gaw jahkrai ma mayam ni a matu hpaida pyi da nna, shanhte a manang ni hpe mung hpaga rai zawn dut sha nga myit hka!

²⁸Nye a myi man yu yu mu. Ngai n masu nngai.

²⁹Nanhte gaw grai hpyau manit dai. N teng n man ai hpe jahkring kau mu. Ngai hpe hkum daw dan myit. Ngai gaw ding hpring nga nngai.

³⁰Rai ti mung, ngai masu nga nngai ngu, nanhte myit nawn nga myit dai, ngai gaw shut ai kaw nna jaw hkrak ai hpe n lu tsun dan ai ngu nanhte myit nawn da nga myit dai.