Read Jinghpaw Common Language Bible 2009 SHAKAWN KUNGDAWN 101 Bible Online

SHAKAWN KUNGDAWN 101 - Jinghpaw Common Language Bible 2009 bible

SHAKAWN KUNGDAWN 101

¹[91] O MADU e, nye a mahkawn ga gaw sadi dung ai hte teng man ai lam rai nga ai, dai hte, ngai nang hpe mahkawn mangoi nngai.

²Nye a sat lawat ni mara n kap na ra ai. Nang ngai kaw galoi aten e, du sa wa na n ni? Ngai gaw nye a nta hta san seng ai asak hkrun lam hte shanu nga na nngai;

³n hkru n hkra ai lam hpe ngai galoi mung, hkam sharang na nngai n rai. Karai Kasang a man kaw nna myi man kayin mat wa ai ni a shamu shamawt ai lam ni hpe ngai n dawng nga nngai; ngai gaw shanhte hte hpa seng na nngai n rai.

⁴Ngai gaw masu magaw ai masha tai na n rai, n hkru ai masha ni hte ngai hpa mung n galaw na nngai.

⁵Langai ngai a n kaja ai lam ni hpe kahte tsun ai wa kadai hpe rai tim, ngai shaden kau na we ai. Gumrawng gumtawng ai hte myit tsaw myit dap rawng ai wa hpe ngai hkam sharang na nngai n rai.

⁶Karai Kasang hta sadi sahka nga ai ni hpe ngai ra sharawng nga na we ai; shanhte hpe nye a hkawhkam wang hta shanu nga shangun na nngai. Tsep kawp myit malang ai ni, ngai hpe daw jau na ahkang hkam la lu na mara ai.

⁷Masu magaw ai wa kadai mung, nye a hkawhkam wang hta shanu nga lu na n rai; sawt ai wa kadai mung nye a man e, grin nga lu na n rai.

⁸Anhte a lamu ga hta shanu nga nna, tara n lang ai ni hpe, lani hte lani ngai jahten sharun kau na we ai; n hkru ai masha ni yawng hpe mung, MADU a mare kaw nna gawt shapraw kau na we ai.