Read Jinghpaw Common Language Bible 2009 SHAKAWN KUNGDAWN 103 Bible Online

SHAKAWN KUNGDAWN 103 - Jinghpaw Common Language Bible 2009 bible

SHAKAWN KUNGDAWN 103

¹[93] Nye a wenyi e, dai MADU hpe shakawn u! Nye a hkum hkrang, myit masin mahkra hte e, shi a chyoi pra ai mying nsang hpe shakawn nga u!

²Nye a wenyi e, MADU hpe shakawn u! Shi a chyeju yawng hte hpe hkum malap kau nga et!

³Shi gaw nye a yubak yawng hte hpe raw dat kau ya nga ai; nye a ana ahkya yawng hte hpe mung, shi shamai shatsai ya nga ai.

⁴Shi ngai hpe nsung hku hta na hkye hkrang la nga ai shi a tsaw ra matsan dum ai myit hte shaman ya nga ai.

⁵Shi gaw nye a prat hpe mai kaja ai hte shakat ya ai majaw, ngai gaw galang zawn ram prat bai pra nna n-gun ja nga nngai.

⁶MADU gaw dip gamyet sha hkrum nga ai ni hpang maga de, tara dara ya nga nna; shanhte lu la ang ai ahkaw ahkang ni hpe jaw ya nga ai.

⁷Shi gaw Mawshe hpe shi a yaw shada ai lam madun dan nu ai, shi a mauhpa magam amu ni hpe Israela amyu masha ni hpe mu la shangun wu ai.

⁸Dai MADU gaw matsan dum ai, tsaw ra ai, myit galu kaba ai hte dinggrin tsaw ra myit hpring nga ai wa rai nga ai.

⁹Shi tut nawng e, daru nga ai n rai, shi htani htana apawt nga ai wa n rai.

¹⁰Anhte hkam la ging ai mara hte maren, shi anhte hpe ari jaw mi ai n rai; anhte a yubak ni hte shut hpyit ai mara ni hte maren, shi bai tai mi ai n rai.

¹¹Lamu gaw ginding aga hta tsaw nga ai hte maren, shi hpe hkrit hkungga nga ai ni a ntsa e shi a tsaw ra myit mung, dai hte maren galu kaba nga ai.

¹²Sinpraw gaw Sinna hte tsan gang nga ai zawn, shi anhte a yubak ni hpe anhte kaw nna shatsan kau ya mi ai.

¹³Kawa gaw kasha ni hpe matsan dum lama ai zawn, Dai MADU gaw shi hpe shagrau sha-a ai ni hpe matsan dum nga ai.

¹⁴Anhte hpe hpa hte galaw da nga ai hpe shi chye nga ai; anhte ga nhpu ni rai nga ga ai hpe shi dum nga ai.

¹⁵Anhte a asak prat chyawm gaw tsingdu zawn rai nga ai; nam na nampan zawn, anhte tu kaba wa nna pu lagra nga ga ai.

¹⁶Dai hpang, de a ntsa e, nbung bung ahpawt wa nna, dai gaw mat mat nga ai; dai hpe kadai mung bai mu lu nga ai n rai.

¹⁷Rai ti mung, MADU hpe shagrau sha-a nga ai ni a ntsa e, shi a tsaw ra myit htani htana agrin nga ai,

¹⁸shi a ga shaka hpe hkan nang nga ai ni hte shi a hkang da ai ga ni hpe kangka ai hte madat mara hkan sa nga ai ni a ntsa e, shi a mai kaja ai gaw hpang ban ni yawng a matu anga nga na ra ai.

¹⁹Dai MADU gaw shi a tingnyang hpe sumsing lamu ntsa e, shadun da nna; shi gaw yawng mayawng a ntsa na hkawhkam wa rai nga ai.

²⁰Chyahtum Chyalai n-gun hte hpring nga nna MADU a hkang da ai ga ni hpe madat mara hkan sa let, shi tsun ai ga ni hpe madat mara nga ai lamu kasa ni e, shi hpe shakawn kungdawn nga mu.

²¹Shi ra sharawng ai hku amu galaw nga ai shi a shangun ma ni rai nga ai sumsing lamu na daru magam n-gun hte hpring nga ai ni e, MADU hpe shakawn kungdawn nga mu!

²²Shi up hkang nga ai shara shagu hkan na, hpan hpajang da mada yawng hte e, MADU hpe shakawn kungdawn nga mu! Nye a wenyi e, MADU hpe shakawn u!