Read Jinghpaw Common Language Bible 2009 SHAKAWN KUNGDAWN 105 Bible Online

SHAKAWN KUNGDAWN 105 - Jinghpaw Common Language Bible 2009 bible

SHAKAWN KUNGDAWN 105

¹Dai MADU a chyeju hpe shakawn nga mu, shi a galu kaba ai lam hpe htawn tsun nga mu; shi galaw dan sai magam bungli ni, amyu baw ni hpe tsun dan mu.

²Dai MADU hpe mahkawn shakawn nga mu; shi galaw dan sai mauhpa amu nlang hte hpe tsun hkai dan mu.

³Anhte hpe shi madu da nga ai majaw kabu gara nga mu; shi hpe nawku daw jau ai ni myit dik myit pyaw lu mu ga.

⁴Karum hpyi na matu, dai MADU hpang de sit shang wa mu, shi hpe n sim n sa nawku daw jau nga mu.

⁵Shi a shangun ma Abraham a aru arat ni hte shi lata la sai Yaku a aru arat ni e, Karai Kasang galaw dan sai lamik kumla ni hte shi jaw da sai tara dara lam ni hpe adum nga mu.

⁷Dai MADU gaw anhte a Karai Kasang rai nga ai, shi a hkang da ai tara ni mungkan ting a matu rai nga ai.

⁸Shi gaw shi a ga shaka hpe htani htana shagrin da na ra ai; shi a ga sadi ni prat ban hkying mi a matu rai nga ai.

⁹Shi gaw Abraham hte tawn da sai myit hkrum ga shaka hte, Isak hpe jaw da sai shi a ga sadi hpe shagrin da na ra ai.

¹⁰“Ngai nang hpe Hkanan mung jaw na nngai, dai hpe nang madu lu na ra ai,” nga nna MADU gaw Yaku hte ga shaka tawn da nu ai hte maren,

¹¹dai gaw prat dingsa htani htana agrin nga na ra ai.

¹²Karai Kasang a amyu masha ni gaw hti hkum hku nna n law nga ma ai; shanhte gaw Hkanan mungdan hta masha tsasam ni rai ma ai.

¹³Shanhte gaw mungdan langai mi kaw nna langai mi de; hkawhkam mungdan mi kaw nna mungdan mi de, kayin hkawm nga ma ai.

¹⁴Rai ti mung, Karai Kasang gaw shanhte hpe dip gamyet sha lu na ahkang, kadai hpe mung n jaw ya nga ai; shanhte hpe makawp maga la na matu,

¹⁵MADU gaw, “Ngai lata san da sai shangun ma ni hpe hkum machyi shangun myit, nye a myihtoi ni hpe hkum hkra ya mi,” nga nna hkawhkam ni hpe sadi jaw nu ai.

¹⁶MADU gaw shanhte a mungdan e hku wa dat dat ya nna, shanhte a lusha mahkra hpe dawm la kau ya nu ai.

¹⁷Rai ti mung, shi gaw shanhte a shawng e mayam hku nna, dut kau hkrum ai Yosep ngu ai masha langai mi shangun dat wu ai.

¹⁸Shi tsun ai myihtoi ga dik wa ai aten du hkra, shi a lagaw gyit hkang da ai hkrum nna; shi a du hpe mung, hpri sumri hte gyit da ya nga ma ai.

¹⁹Dai MADU a mungga gaw shi a teng man ai lam hpe sakse madun dan nga ai.

²⁰Dai shaloi, Egutu hkawhkam wa shi hpe raw dat nna, amyu baw ni a du wa gaw shi hpe shalawt dat wu ai.

²¹Hkawhkam wa gaw shi a mung up magam bungli hta woi awn na matu, shi hpe san da mu ai hte, mungdan ting a ntsa e up hkang na du, shi hpe shatai nu ai rai nna,

²²shi gaw hkawhkam wa a up hkang du ni a ntsa e mung, hkaw kata na hpaji jaw du, salang ni hpe sharin matsun na ahkang mung shi hkam la nu ai.

²³Dai hpang Yaku gaw Egutu mung de yu wa nna, dai mungdan hta sa shanu nga ai.

²⁴Dai MADU gaw shi a amyu masha ni hpe kashu kasha law law mayat maya shangun nna; shanhte a gumlau hpyen ni hta grau nna, n-gun ja wa shangun nga ai.

²⁵Shi gaw Egutu masha amyu ni hpe shi a amyu masha ni hte n ju n dawng shangun nna; shi a shangun ma ni hte hkalem hkalau amu shabyin dat wu ai.

²⁶Dai hpang, shi lata san da sai shi a shangun ma Mawshe hte Arun yan hpe shi shangun dat wu ai.

²⁷Shanhte gaw, Karai Kasang a mauhpa magam amu ni hte lamik kumla amyu myu ni hpe Egutu mung hta e, madun dan manu ai.

²⁸Karai Kasang gaw dai mungdan a ntsa e, nsin jasin dat nu ai; rai ti mung, Egutu amyu masha ni shi a hkang da ai ga hpe n madat ya mu ai.

²⁹Shi shanhte a hka nu ni hpe sai shatai kau ya nna, dai hta rawng ai nga ni yawng hpe sat kau ya wu ai.

³⁰Shanhte a mungdan hta shu ni hte hpring nga nna; hkawhkam wa a gawk de du hkra, shu ni hte hpring kaput nga ai.

³¹Karai Kasang hkang dat ai hte maren, jinghkam hte ji nu ni, mungdan ting hta prang hkawm nga ma ai.

³²Shi gaw shanhte a mungdan hta marang a malai sin hte myi hprap wan dat dat wu ai.

³³Shi gaw sabyi ru ni hte maihpang hpun ni hpe jahten kau nna; mungdan ting na hpun ni yawng hpe agrawp shadaw kau nu ai.

³⁴Shi hkang dat ai hte, sen sen wan wan n dang hti hkra law ai dinggam-yaw ni du sa wa nga ma ai.

³⁵Dai ni gaw mungdan na hpun lawn kasha ni yawng hpe sha kau nga ma ai; nsi naisi yawng hpe mung mayu kau ma ai.

³⁶Egutu mungdan na dinghku yawng a shadang sha alat ni hpe shi sat kau ya mu ai.

³⁷Dai hpang shi gaw Israela amyu masha ni hpe woi shapraw mat wa nna, shanhte gaw gumhpraw hte aja ni hpe mung, htaw mat wa ya nga ma ai; shanhte yawng hte mung hkam kaja ai hte n-gun hpring shajang nga ma ai.

³⁸Egutu amyu masha ni mung shanhte hpe hkrit nga ma ai; shanhte pru mat wa ai shaloi, kabu gara nga ma ai.

³⁹Karai Kasang gaw shi a amyu masha ni a ntsa e, sumwi ka-up da ya nna; shana e, shanhte hpe wan jahtoi ya nga ai.

⁴⁰Shanhte hpyi mu ai hte maren, u preng ni hpe dat dat ya nna; shanhte myit dik hkra sha lu na matu, lamu na lusha shanhte hpe jahkrat jaw ya wu ai.

⁴¹Shi gaw lunghkrung hpe hpaw dat nna hka ni kapaw pru wa nhtawm; hkun hkraw ai shara hkan, hka nu langai mi zawn lwi nga ai.

⁴²Shi a shangun ma kaja Abraham hte tawn da ai chyoi pra ai ga sadi ndat ga ni hpe shi dum nga wu ai.

⁴³Dai majaw shi lata la hkrum ai shi a amyu masha ni hpe woi shapraw mat wa ai; shanhte kabu gara jahtau garu ai hte mahkawn shakawn ma ai.

⁴⁴Shi shanhte hpe kaga amyu masha ni a lamu ga ni hpe jaw ya nna; shanhte mung kaga masha ni a sun, hkauna ni hpe madu la nga ma ai.

⁴⁵Shing rai, shi a amyu masha ni shi a tara ni hpe madat nna; shi a hkang da ai ga ni yawng hpe hkan shatup na mu ai. Dai MADU hpe shakawn nga mu law!