Read Jinghpaw Common Language Bible 2009 SHAKAWN KUNGDAWN 108 Bible Online

SHAKAWN KUNGDAWN 108 - Jinghpaw Common Language Bible 2009 bible

SHAKAWN KUNGDAWN 108

¹[94] O Karai Kasang e, ngai nang hpe tsep kawp kam hpa nga nngai; ngai nang hpe mahkawn mangoi ai hte nang hpe shakawn na nngai! Nye a wenyi e, dum hprang u!

²Nye a tingse hte sumpyi e, dum hprang u! Jan hpe mung ngai jasu na nngai.

³O MADU e, amyu baw ni a ka-ang hta, nang hpe ngai chyeju dum nga na nngai; amyu masha ni a man e, ngai nang hpe shakawn nga na nngai.

⁴Na a dinggrin tsaw ra myit sumsing lamu ni de dep nga nna; na a sadi sahka gaw lamu kaw du hkra dep nga ai.

⁵O Karai Kasang e, lamu hta na a galu kaba ai lam hte aga ntsa ting hta e mung, na a hpung shingkang dan hkung nga ai hpe madun dan nga u law.

⁶Na a daru magam n-gun hte anhte hpe hkye hkrang la mi; anhte a akyu hpyi ai ga hpe mung htan ya mi, shing rai jang, nang tsaw ra ai amyu masha ni hkye mawai la ai hkrum na mara ai.

⁷Shi a chyoi pra ai shara kaw na Karai Kasang gaw, “Awng padang hte ngai Shehkem hpe garan na nngai, Suhkot kadit hpe mung nye a amyu masha ni a lata de garan ya na nngai.

⁸Gilead gaw nye a rai nga ai, Manashe mung nye a rai nga li ai; Ehprim gaw nye a hpri gup chyawp rai nna, Yuda gaw nye a hkawhkam sumdoi rai nga ai.

⁹Rai ti mung, Moba hpe nye a lagaw kashin ai di zawn ngai lang kau na nngai; Edom a ntsa e mung, nye a hkyepdin hpe kabai tawn na nngai; dai gaw ngai madu la na ngu ai kumla rai nga ai. Hpilisti gaw nye a ntsa e, awng padang jahtau garu lu na mu ai nga nna, shanhte myit nawn nga masai kun?,” nga nna tsun wu ai.

¹⁰Karai Kasang e, dai ngang kang ai mare de ngai hpe kadai woi sa na rai nga a ta? Edom de ngai hpe kadai woi sa na rai nga a ta?

¹¹Nang anhte hpe teng teng kau da nu ni? Anhte a hpyen luksuk ni hte rau nang n pru sa nga n ni?

¹²Gumlau hpyen wa hpe hkap daw na matu, anhte hpe karum la mi; masha a karum la ai lam gaw kaman sha rai nga ai.

¹³Karai Kasang anhte a hpang maga de tsap yang, anhte awng padang lu la na ga ai; shi gaw anhte a gumlau hpyen ni hpe shamyit kau na ra ai.