Read Jinghpaw Common Language Bible 2009 SHAKAWN KUNGDAWN 109 Bible Online

SHAKAWN KUNGDAWN 109 - Jinghpaw Common Language Bible 2009 bible

SHAKAWN KUNGDAWN 109

¹[95] Karai Kasang e, ngai nang hpe shakawn kungdawn nngai; atsin sha hkum nga nga et!

²Tara n lang ai masha ni hte masu magaw ai ni ngai hpe htim gasat kau mani ai. Shanhte nye a lam hpe masu magaw ga ni hte tsun shatan nga ma ai.

³Nye a lam hpe n hkru n hkra ai shatan nhkan ga ni hte shanhte tsun nhtawm; mara kata e, ngai hpe hpyen galaw ma ai.

⁴Ngai shanhte hpe tsaw ra ai hte shanhte a matu akyu hpyi ya tim pyi, shanhte ngai hpe ninghkap nga ma ai.

⁵Shanhte gaw kaja ai a malai n hkru n shawp ai, tsaw ra myit a malai n ju n dawng ai myit ni hte ngai hpe bai tai ma ai.

⁶Nye a gumlau hpyen wa hpe tara jeyang na matu gumhpraw marin ai tara agyi ni hpe lata san da u, shi a gumlau hpung kaw na marai langai ngai shi hpe mara shagun ai wa tai shangun u.

⁷Shi san jep ai hkrum nna, shut ai mara mu hkrum nga u ga; shi a akyu hpyi ai ga pyi ru hka amu sawn ya u ga!

⁸Shi a asak mung, kade nna yang, htum mat u ga; shi a bungli hpe masha kaga wa lu la mat u ga!

⁹Shi a kashu kasha ni jahkrai nmai tai mat nna; shi a madu jan mung gaida gaina tai mat u ga!

¹⁰Shi a kashu kasha ni dum nta n lu ai mawhpyi ni tai mat mu ga; shanhte shanu nga ai nta chyahten ni kaw nna mung, gawt shapraw kau ai hkrum nga mu ga!

¹¹Shi a hka madu ni shi a sut gan arung arai yawng hte hpe la kau ya nga mu ga; masha tsasam ni mung, shi galaw ai bungli akyu mahkra hte hpe hkam sha lu mu ga.

¹²Shi hpe matsan yu dum ai masha kadai mung n nga u ga; shi kau da ai jahkrai nmai ni hpe kadai mung n lanu lahku nga u ga.

¹³Shi a aru arat ni yawng hte mung si mat mu ga; shi a mying hpe hpang ban prat hta n dum shajang mu ga.

¹⁴MADU gaw shi a kaji kawa ni galaw ai n hkru n shawp ai amu ni hpe adum ya nga u ga; shi a kanu tawt lai ai yubak ni hpe galoi mung n raw dat ya lu u ga.

¹⁵Dai MADU gaw shanhte a yubak ni hpe, tut nawng e adum ya nga u ga; rai ti mung, shanhte hkum nan tsep kawp malap kau ai hkrum nga mu ga.

¹⁶Dai masha wa matsan dum na lam, galoi mung n myit yu ai hte; shi gaw matsan mayan re ai wa, ra kadawn ai wa hte karum la na masha n lu ai ni hpe zingri sat kau nu ai.

¹⁷shi gaw dagam ai hpe tsaw ra nga ai, shi nan dagam dala ai bai hkrum nga u ga! shi shaman chyeju jaw ya na hpe n ju n dawng nga ai majaw, kadai mung shi hpe n shaman ya u ga!

¹⁸Shi bu hpun palawng hpun man nga ai zawn dagam dala ga hpe man man atsun nga u ga; shi a dagam dala ga gaw hka zawn hkum kata de madi shang wa nna, sau zawn shi a nrut nra de du hkra tsim shang wa u ga!

¹⁹Dai dagam ai gaw hpun palawng zawn shi hpe ka-up da u ga; shingkyit zawn shi hpe tut nawng e, kyit shinggrup da u ga!

²⁰MADU e, dai zawn n hkru n shawp ai lam hte ngai hpe tsun shatan nga ai, nye a gumlau hpyen ni hpe, dai lam hku nna ari jaw u.

²¹Rai ti mung, nye a Tsaw Htum Ai MADU e, nang jaw da sai ga sadi hte maren, ngai hpe karum la e; na a mai kaja ai tsaw ra myit a majaw, ngai hpe mawai la e.

²²Ngai gaw matsan mayan re ai wa hte ra kadawn nga ai wa rai nga nngai; nye a myit masin de du hkra, achyaw machyi ai ngai hkrum nga nngai.

²³Shana de na shingnip zawn, ngai wai mat wa magang nga nngai; latung shingtai zawn tsan tsan de shapoi kau ai ngai hkrum nga nngai.

²⁴Lusha kadawn ai majaw, nye a lahput lagaw ni gawng kya nga li ai; ngai gaw nra hta hpyi kap mat sai daram sha rai mat nga nngai.

²⁵Masha ni ngai hpe mu ma ai shaloi shanhte ngai hpe mani asawng nga ma ai; shanhte gaw n kaw n law re ai hku nna, shanhte a baw ni hpe kanga dan ma ai.

²⁶Nye a MADU Karai Kasang e, na a dinggrin tsaw ra myit a majaw ngai hpe karum la e! Ngai hpe hkye hkrang la e!

²⁷Ngai hpe hkye hkrang la ai wa gaw nang rai nga ndai hpe nye a gumlau hpyen ni hpe chye shangun e law.

²⁸Shanhte gaw ngai hpe dagam nga ma ti mung, nang ngai hpe shaman ya na rin dai; ngai hpe zingri zingrat di ai ni sum mat mu ga, na a shangun ma ngai chyawm gaw kabu gara lu n ga.

²⁹Nye a gumlau hpyen ni gaw myi man sum ai hte htinggrum da ai hkrum nga mu ga; shanhte gaw kaya kahpa hpe nba zawn lawai da nga mu ga.

³⁰Ngai gaw dai MADU hpe nsen ja ja hte chyeju shakawn nga na nngai; ngai shi hpe amyu masha ni a hpawng hta shakawn nga na nngai.

³¹Hpa majaw nga yang, shi gaw matsan mayan wa hpe makawp maga ya nna; shi hpe si na tara daw dan ya ai ni a lata kaw nna hkye hkrang la ai majaw rai nga ai.