Read Jinghpaw Common Language Bible 2009 SHAKAWN KUNGDAWN 115 Bible Online

SHAKAWN KUNGDAWN 115 - Jinghpaw Common Language Bible 2009 bible

SHAKAWN KUNGDAWN 115

¹O MADU e, na a dinggrin tsaw ra myit hte sadi sahka lam a majaw, na a hpung shingkang gaw nang hta chyu sha, rai sa, nang hta chyu sha, anga nga u ga, anhte hta dai hpung shingkang nga ai n rai.

²“Nanhte a Karai Kasang kanang nga nga a ta?,” nga nna amyu baw ni anhte hpe hpa majaw san nga ma ni?

³Anhte a Karai Kasang gaw sumsing lamu hta nga nga ai; shi ra ai hku hpa lam hpe mung shi galaw nga ai.

⁴Shanhte a hpara ni hpe aja gumhpraw hte galaw da nna; dai ni hpe masha a lata hte tawk galaw da nga ai.

⁵Shanhte hta n-gup tu nga ma ti mung, ga n lu shaga nga ai; myi tu ti mung, n mu lu nga ma ai.

⁶Shanhte hta na tu nga ma ti mung, n na lu nga ma ai; ladi tu ti mung, n lu manam nga ma ai.

⁷Shanhte hta lata tu ti mung, n jum lu nga ma ai, lagaw tu nga ma ti mung, n lu hkawm nga ma ai; shanhte gaw nsen hpe mung n shapraw lu ma ai.

⁸Dai hpara sumla ni hpe tawk galaw ai ni hte, shanhte hpe kam sham nga ai ni gaw shanhte galaw ai hpara sumla ni zawn sha, rai nga mu ga.

⁹Israela amyu masha ni e, dai MADU hpe kam hpa nga mu. Shi nanhte hpe karum ya nna, makawp maga nga ai.

¹⁰Karai Kasang a hkinjawng ni e, dai MADU hpe kam hpa nga mu. Nanhte hpe karum let makawp maga nga ai.

¹¹Dai MADU hpe nawku daw jau nga ai ni yawng hte e, dai MADU hpe kam hpa nga mu. Shi nanhte hpe karum ya nna, makawp maga nga ai.

¹²Dai MADU anhte hpe adum nga ai hte shaman ya na ra ai; Shi gaw Israela amyu masha ni hte Karai Kasang a hkinjawng ni yawng hte hpe shaman ya na ra ai.

¹³Shi hpe shagrau sha-a ai masha shagu hta na, kaji ai kaba ai n nga, yawng hpe shaman ya na ra ai.

¹⁴Dai MADU gaw nanhte hte nanhte a aru arat ni hpe kashu kasha ni jaw ya nga u ga!

¹⁵Sumsing lamu hte ginding aga hpe hpan tawn da ai, MADU gaw nanhte hpe shaman ya nga u ga!

¹⁶Sumsing lamu hpe dai MADU chyu sha madu nga ai; ginding aga hpe chyawm gaw shinggyim masha ni hpe ap ya nu ai.

¹⁷Si mat sai ni hte, katsi katsang re ai shara de, du shang mat wa ai ni gaw dai MADU hpe shakawn lu ma ai n rai.

¹⁸Rai ti mung, asak hkrung nga ai anhte ni chyawm gaw ya kaw nna, htani htana prat dingsa du hkra, shi hpe chyeju dum shakawn kungdawn nga na ga ai. Dai MADU hpe shakawn mu!