Read Jinghpaw Common Language Bible 2009 SHAKAWN KUNGDAWN 116 Bible Online

SHAKAWN KUNGDAWN 116 - Jinghpaw Common Language Bible 2009 bible

SHAKAWN KUNGDAWN 116

¹Dai MADU gaw nye a nsen hpe na ya ai majaw, ngai shi hpe tsaw ra nga nngai; shi nye a akyu hpyi ai ga ni hpe madat ya nga ai.

²Ngai shi hpe aten shagu shaga yang, nye a nsen hpe shi madat ya nga ai.

³Si du a sumgawn gaw ngai hpe htinggrum da nna; katsan ga na ru tsang ni, ngai hpe wang shinggrup da nga sai. Shing rai, ngai gaw hkrit ai hte nchyi nmu myit kahtet nga li ai.

⁴Shaloi, ngai gaw, “MADU e, ngai nang hpe hpyi nem nga nngai, ngai hpe hkye hkrang la e,” ngu nna dai MADU hpe shaga ni ai.

⁵Dai MADU gaw matsan dum ai hte mai kaja ai wa rai nga ai; anhte a Karai Kasang gaw matsan chye dum ai wa rai nga ai.

⁶Dai MADU gaw matsan mayan hkrum ai masha ni hpe makawp maga ya nga ai; ngai hkrit tsang hpa hkrum ai shaloi, shi ngai hpe hkye hkrang la sai.

⁷Nye a myit masin e, dai MADU gaw nang hpe mai kaja ai chyeju madun dan nit dai majaw, kam hpa nga u.

⁸Dai MADU gaw ngai hpe si ai kaw nna mung, nye a myi prwi pru ai kaw nna mung, nye a lagaw kashawt ai kaw nna mung, hkye hkrang la sai.

⁹Dai majaw, hkrung nga ai ni a mungkan hta dai MADU a man e, ngai hkawm nga na nngai.

¹⁰“Ngai gaw tsep kawp agrawp mani kau ai hkrum nga nngai,” nga nna tsun nga ai shaloi pyi, ngai kam sham nga dingyang naw rai nga nngai.

¹¹Ngai hkrit tsang ai aten hta pyi, “Kadai hpe mung n kam lu nga ai,” ngu nna tsun ni ai.

¹²Dai MADU ngai hpe jaw ya ai chyeju nlang hte hpe, hpa baw hte wa daw jau lu na rai nga a ta?

¹³Ngai hpe hkye hkrang la ai majaw, dai MADU hpe chyeju dum shakawn na matu; shi hpe sabyi hkungga nawng jau ya na nngai.

¹⁴Ngai shi hpe ga shaka tawn da ai hte maren, shi a amyu masha ni yawng a hpawng hta, ngai dai hpe shatup na nngai.

¹⁵Shi a amyu masha ni hta na langai mi si mat wa yang, dai MADU gaw kade wa gawng run machyi nga a hka?

¹⁶MADU e, ngai gaw na a shangun ma wa rai nga nngai; nye nu galaw daw ai zawn ngai nang hpe daw jau nga na nngai. Nang ngai hpe si ai kaw na hkye hkrang la nit dai.

¹⁷Chyeju dum hkungga ni hte ngai nang hpe nawng jau na nngai, nye a akyu hpyi ai ga hte nang hpe sak jaw na nngai.

¹⁸Ngai nang hpe ga sadi tawn da ai hte maren, na a amyu masha ni yawng a hpawng hta mung, Yerusalem na na a chyoi pra ai Htingnu hta mung, dai ga sadi hpe ngai shatup na nngai. Dai MADU hpe shakawn mu!